Read Caribbean Javanese Yéhèskièl 45 Bible Online

Yéhèskièl 45 - Caribbean Javanese bible

Yéhèskièl 45

¹“Yèn kowé pada ngedum negara kuwi dadi tanah pandumanmu karo tyara dilotré, kowé ndèwèkna sak bagéan lemah kuwi dadi pisungsung sing sutyi kanggo GUSTI, dawané 25.000 éluh lan ambané 20.000 éluh. Tanah ing njeruhné wates iki kabèh kuwi sutyi.

²Tanah kuwi ana sing disediakké kanggo panggonan sutyi, rupané pesagi papat, dawané lan ambané 500 éluh lan ing sak ubengé ana lapangan sing ambané sèket éluh.

³Ing tanah sing wis diukur mau kowé ngukura sak bagéan sing dawané 25.000 éluh lan ambané 10.000 éluh: ya ing kono kuwi panggonané panggonan sutyi lan pérangan iki Mahasutyi.

⁴Iki pérangan sing sutyi kanggo negara kuwi lan dadi panggoné para imam sing nindakké ngabekti ing panggonan sutyi, sing pada ngadep ngladèni marang GUSTI. Kuwi panggonan omahé para imam lan dadi bawah sutyi kanggo ing panggonan sutyi.

⁵Sing dawané 25.000 éluh lan ambané 10.000 éluh kuwi dadi duwèké wong-wong Lèwi sing kuwajipané ngladèni ing griya sutyi; kuwi kuta-kutané, panggonané.

⁶Sing dadi duwèké kuta Yérusalèm temokna: ambané 5000 éluh, dawané 25.000 éluh lan adu watesé karo pisungsung kanggo Aku. Kuwi kanggo turunané Israèl kabèh.

⁷Nanging bagéan ratu kuwi kudu manggon ing kuloné lan wétané pisungsung sing sutyi lan duwèké kuta kuwi kudu adu watesé karo pérangan loro mau. Sisihé kulon kudu nganti tekan wates kulon lan sisihé wétan kudu tekan wates wétan. Dadi dawané kudu pada karo dawané bagéané taler Israèl siji, ya kuwi wiwit wates kulon nganti tekan wates wétan ing negara kuwi.

⁸Kuwi sing dadi bagéané ing negara Israèl. Lan para ratu Israèl ora bakal nindes umat-Ku menèh lan bakal pada masrahaké negara kuwi marang turunané Israèl miturut taler-taleré.”

⁹Mengkéné tembungé Gusti GUSTI: “Kuwi wis tyukup, hé, para ratu Israèl, kowé ngedohana nandangi nindes lan aniaya lan nandangana keadilan lan kabeneran; mandeka enggonmu nindakké penindesan, ya kuwi enggonmu nundungi umat-Ku sangka negara, sing dadi duwèké; mengkono tembungé Gusti GUSTI.

¹⁰Wis sak pantesé yèn kowé nggunakké timbangan sing bener, éfa sing bener lan bat sing bener.

¹¹Wis sak pantesé yèn éfa lan bat kuwi takerané pada, dadi sak bat isiné sak prasepuluh omèr lan sak éfa uga sak prasepuluh omèr. Dadi takeran-takeran kuwi manut omèr.

¹²Kanggo kowé kabèh wis sak pantesé yèn sak syikal kuwi pada karo rong puluh géra, limang syikal ya limang syikal lan sepuluh syikal ya sepuluh syikal, lan sèket syikal kuwi ana sak mina.

¹³Iki pisungsung sing kudu pada kok pasrahké: sak para enem éfa sangka gandum sak homèr lan sak para enem éfa sangka jewawut sak homèr.

¹⁴Nanging katetepan kanggo lenga mengkéné: sak prasepuluh bat sangka sak kor; sak kor kuwi pada karo sepuluh bat.

¹⁵Saben tyempé wedus gèmbèl 200 duwèké brayat siji dijukuk siji. Kuwi kabèh kanggo kurban panganan lan kurban obongan lan kurban keslametan kanggo nganakké rukunan kanggo wong-wong mau. Mengkono tembungé Gusti GUSTI.

¹⁶Kabèh rayaté negara kudu masrahaké pisungsung marang ratuné Israèl.

¹⁷Nanging ratu sing tanggung jawap kanggo kurban obongan, kurban panganan, kurban ombèn-ombèn yèn nalika dina gedé, sasi anyar, dina sabat lan saben turunané Israèl nganakké riyaya. Ratu sing kudu nyawiské kurban ngluwari dosa, kurban panganan, kurban obongan lan kurban keslametan kanggo nganakké rukunan kanggo turunané Israèl.”

¹⁸Mengkéné tembungé Gusti GUSTI: “Ing sasi kaping pisan, tanggal siji sasi kuwi kowé njupuka sapi lanang nom siji sing tanpa tyiri, panggonan sutyi kuwi terus sutyèkna.

¹⁹Imam njupuka getih kurban ngluwari dosa setitik lan lèlètna ing tyagak-tyagaké griya sutyi lan ing pojoké papat lés-pinggiré mesbèh lan ing tyagak-tyagaké gapura plataran njeruh.

²⁰Mengkono uga ing tanggal sepisan sasi kaping pitu kowé ya tumindaka mengkono kanggo para wong sing nglakoni dosa ora karo disengaja lan ora weruh.

²¹Ing sasi kaping pisan, tanggal patbelas sasi kuwi kowé pada nganakna riyaya Paskah lan ing sak njeruhné pitung dina kowé pada mangana roti tanpa ragi.

²²Ing dina kuwi ratu nyawisna sapi lanang kanggo kurban ngluwari dosa tumuju marang awaké déwé lan wong sak negara kabèh.

²³Ing sak njeruhné pitung dina ing dina gedé kuwi, ratu nyawisna kurban obongan kanggo GUSTI: saben dina sapi lanang pitu lan wedus gèmbèl lanang pitu sing tanpa tyiri lan kanggo kurban ngluwari dosa saben dina wedus lanang siji.

²⁴Kanggo kurban panganan ratu nyawisna glepung sak éfa karo sapi siji lan glepung sak éfa karo wedus gèmbèl lanang siji lan lenga sak hin kanggo sak éfa.

²⁵Ing sasi kaping pitu, tanggal limalas sasi kuwi, ya kuwi ing dina gedé, ratu ya nganakna tyetyawisan kaya mengkéné iki suwéné pitung dina: kurban ngluwari dosa, kurban obongan, kurban panganan lan lenga.”