Read Caribbean Javanese Hoséa 10 Bible Online

Hoséa 10 - Caribbean Javanese bible

Hoséa 10

¹Israèl kuwi wit anggur sing betyik tukulé, sing ngetokké woh, mundak okèh pametuné, mundak okèh enggoné nggawé mesbèh lan mundak apik lemahé, mundak apik enggoné nggawé tugu-tugu brahala.

²Atiné lamis, saiki kudu pada nanggung wohé kesalahané, Gusti bakal ngremuk mesbèh-mesbèhé, lan mbubrah tugu-tuguné brahala.

³Lah saiki pada ngomong: “Kita pada ora nduwé ratu, awit kita pada ora tau ngajèni marang GUSTI, nanging ratu kuwi bisa nindakké apa ta kanggo kita?”

⁴Pada umuk-umukan, pada nglairké sumpah palsu, pada nggawé perjanjian ala, sak nalika ngadili kliru tukul kaya wit upas ing singkalané kebon.

⁵Para wong sak isiné Samaria pada gemeter, ing atasé pedèté emas ing Bétel.[9] Lah rayaté bakal sedih awit sangka kuwi, lan para imamé pada sambat, awit wis ilang kamulyané.

⁶Pedèté bakal diboyong menyang Asyur, kanggo pisungsung marang ratu “Gedé”. Efraim bakal kewirangan, ya, Israèl bakal kisinan awit sangka rantyamané.

⁷Samaria bakal dientèkké, ratuné kaya pang sing kemampul ing banyu.

⁸Panggonan pangurbanan duwur dirusak, ya kuwi dosané Israèl, bakal pada dientèkké. Mesbèh-mesbèhé bakal pada ketukulan eri lan rerungkutan. Lan wong bakal pada nylatoni gunung-gunung: “Aku pada urukana!”, lan marang puntuk-puntuk: “Aku diembrukna!”

⁹Hé Israèl, wiwit jamané Gibéa kowé wis nggawé dosa; ing kana pada ngadek nglawan. Ing Gibéa apa ora bakal ketututan karo perang sing nglawan marang para wong lityik?

¹⁰Aku teka perlu nggebuki wong-wong kuwi, bangsa-bangsa bakal pada nglumpuk nglawan marang wong-wong kuwi, yèn pada kesiksa awit sangka kesalahané rong perkara.

¹¹Efraim kuwi mbiyèn pedèt sing wis dilatih lan seneng nutu, lan Aku seneng marang gitoké sing apik, Efraim kuwi Tak rakitké, Yéhuda kudu ngluku, Yakub kudu nggaru lemah kanggo awaké déwé.

¹²Kowé pada nyebara sing tyotyok karo keadilan, ngunduha karo katrésnan! Mbukaki negara anyar, awit wis wantyiné nggolèki marang GUSTI, nganti Panjenengané teka lan ngekèki keadilan sing lubèr marang kowé.

¹³Kowé wis pada ngluku duraka, sing ala sing kok unduh, lan kowé wis pada mangan wohé ngapus, awit kowé wis pada ngendelké krétamu, uga okèhé penggedéné suradadumu.

¹⁴Bakal njedul gembruduké perang ing antarané bangsamu, lan sak kabèhé bèntèngmu bakal digempur, kaya Salman enggoné ngentèkké Bèt-Arbel ing waktuné gègèré perang, ibu uga anak-anaké pada diremuk.

¹⁵Kuwi sing dilakoni Bétel kanggo kowé, hé turunané Israèl, awit sangka bangeté durakamu. Ing wayah ésuk wétan ratuné Israèl bakal dientèkké babar pisan.[10]