Read Caribbean Javanese Hoséa 12 Bible Online

Hoséa 12 - Caribbean Javanese bible

Hoséa 12

¹Aku wis dikepung Efraim karo goroh, lan ngapus karo turunané Israèl, nanging Yéhuda ngilang sangka tyedaké Gusti Allah, sangka sak tyedaké sing Mahasutyi sing setia.

²Efraim kuwi njaga angin, lan nguber angin wétan sedina muput, ngakèhké tumindak goroh lan penggawé ala, pada nggawé perjanjian karo Asyur, lan nggawa lenga menyang negara Egipte.

³GUSTI bantahan karo Yéhuda, lan bakal ngukum Yakub miturut pertingkahé, lan bakal mbales sing pantes karo tindak-tanduké.

⁴ Ing wetengé Yakub ngapusi seduluré, lan bareng wis rosa gelut karo Gusti Allah.

⁵Dèwèké gelut karo mulékat lan menang, karo nangis njaluk kawelasan marang Panjenengané. Ing Bétel ketemu karo Panjenengané, lan ing kono Panjenengané ngomongi mengkéné:

⁶Ya iki GUSTI, Gusti Allahé sing ngwasani langit lan bumi, asmané GUSTI.

⁷“Kowé kuwi kudu mratobat marang Gusti Allahmu, netepana katrésnan lan angger-angger, lan tansah ngarep-arepa marang Gusti Allahmu.”

⁸Pada kaya pedagang Kanaan, sing nyekel timbangan sing goroh, lan sing seneng memeres.

⁹Efraim ngomong: “Aku apa ora wis dadi sugih, wis olèh banda. Nanging sak kabèhé wohé kangèlanku ora ngetokké kesalahan sing tegesé dosaku.”

¹⁰Nanging Aku iki GUSTI, Gusti Allahmu wiwit waktu kowé ing negara Egipte. Aku ijik gelem manggonké kowé ing tarup-tarup menèh kaya mbiyèn, kaya dina riyaya ing ara-ara samun.

¹¹Aku ngomongi para nabi, lan wis ngekèki wahyu bola-bali uga ngekèki semonan lantaran para nabi mau.

¹²Yèn ing Giléad ana tindak dursila, wong-wong kuwi wis pada dadi tanpa guna; ing Gilgal pada pasrah kurban sapi-sapi lanang, mulané mesbèh-mesbèhé uga pada dadi kaya tumpukan watu ing singkalan-singkalané kebon.

¹³Yakub mblayu menyang ing tanah Aram, Israèl kerja supaya olèh bojo, malah nganti dadi pangon supaya olèh bojo kuwi.

¹⁴Lantaran nabi, GUSTI nuntun Israèl metu sangka negara Egipte, malah terus dirumati karo nabi.

¹⁵Efraim wis nggawé nesuné atiné Gusti sing banget, nganti Gustiné bakal neruské enggoné ketèmplèkan utang getih, lan bakal ngekèki balesan kanggo tyiriné.