Read Caribbean Javanese Hoséa 14 Bible Online

Hoséa 14 - Caribbean Javanese bible

Hoséa 14

¹Samaria kudu nampa ukuman, awit nglawan marang Gusti Allahé. Bakal pada mati karo pedang, bayi-bayiné bakal pada diremuk, wong wadon sing meteng bakal pada dibedèl.

²Hé Israèl, pada mratobata marang GUSTI, Gusti Allahmu, nanging enggonmu keplèsèt kuwi awit sangka kesalahanmu.

³Pada ngomonga tembung getunmu, lan mratobat marang GUSTI, ngomonga marang Panjenengané: “Panjenengan supaya gelem ngapura kabèh kesalahan, sing apik supaya terus dikèkké, banjur kita pada bakal ngunggahké pengaku kita.

⁴Asyur ora bakal bisa mitulungi kita; kita ora bakal numpak jaran, lan kita ora bakal omongan malih: Duh, Gusti Allah kita! marang penggawéané tangan kita, awit Panjenengan trésna botyah lola.”

⁵Aku bakal mulihké wong-wong kuwi sangka ninggalké Aku, lan bakal trésna karo sak legané ati, awit nesu-Ku marang dèwèké wis mandek.

⁶Aku bakal dadi kaya ebun kanggo Israèl, dèwèké bakal metu kembangé kaya kembang bakung, lan oyoté tambah-tambah kaya wit Libanon.

⁷Pangé pada megar, lan apiké kaya wit saitun, lan ambuné wangi kaya wit Libanon.

⁸Wong-wong mau bakal pada bali lan manggon ing pangayoman-Ku, lan bakal pada tukul kaya tanduran gandum; lan bakal pada kembang kaya wit anggur, sing kesuwur kaya anggur ing Libanon.

⁹Efraim, brahala-brahala kuwi gegandèngan apa karo Aku? Aku sing semaur lan mikir marang kowé! Aku iki kaya wit beros sing kétok ijuh, sangka Aku enggonmu olèh woh.

¹⁰Sapa sing wityaksana, bèn ngerti marang perkara iki kabèh; sapa sing ngerti, bèn weruh kuwi; awit dalan-dalané GUSTI kuwi kentyeng, lan dilakoni karo para wong bener, nanging para wong sing nglawan pada keplèsèt tiba ing kono.