Read Caribbean Javanese Hoséa 2 Bible Online

Hoséa 2 - Caribbean Javanese bible

Hoséa 2

¹“Ibumu ngaduha, ya ngaduha, awit kuwi duduk bojo-Ku, lan Aku iki duduk bojoné; kongkonen mbuwang nglonténé sangka praupané, lan enggoné laku bédang sangka selané susuné,

²supaya aja nganti Tak dèdèli sandangané nganti wuda, Tak dadèkké pada kaya ing waktu lairé, Tak gawé kaya ara-ara samun, Tak dadèkké kaya negara mati, terus Tak tégakké nganti mati ngelak.

³Uga anak-anaké pada ora Tak welasi, awit kuwi pada anak-anak lonté.

⁴Awit ibuné dadi lonté; sing metengké wis nindakké sing njijiki, awit tembungé: Aku arep ngetutké para katrésnanku, sing ngekèki roti lan banyu ngombéku kain wol lan sutraku, lenga lan ombèn-ombènku.

⁵Mulané dalané bakal Tak pasangi eri, lan wong kuwi bakal Tak pageri témbok mubeng, terus ora bisa nemu dalan-dalané.

⁶Terus arep ngoyak-oyak para bédangané, nanging ora bakal ketyandak, lan arep nggolèki para bédangané kuwi, nanging ora ketemu. Nganti terus ngomong: Tak bali mulih menyang bojoku sing pisanan, awit kahananku waktu semono luwih kepénak tenimbangané karo saiki.

⁷Nanging dèwèké kuwi ora ngrumangsani yèn Aku sing ngekèki jagung, anggur lan lenga, lan sing ngekèkké slakané sing okèh lan emas sing dienggo nggawé retya Baal.

⁸Mulané Aku bakal njupuk baliné jagung-Ku ing waktuné, lan anggur-Ku ing saben waktuné, uga ngrampas wol lan sutra-Ku sing kanggo nutupi kewirangané.

⁹Lan saiki bakal Tak bukak kewirangané, ing ngarepé para bédangané, lan ora ana wong sing bakal ngluwari dèwèké sangka tangan-Ku.

¹⁰Sak kabèhé kabungahané bakal Tak rampungi riyayané, lan sasiné anyar uga dina sabaté lan sak kabèhé dinané gedé.

¹¹Aku bakal ngentèkké wité anggur lan wité anjir, sing wis pada diutyapké: Iki kabèh pawèhé marang aku, sing diwènèhké marang aku karo para katrésnanku. Kuwi bakal Tak dadèkké alas, lan kéwan ing ara-ara bakal mangani kuwi nganti entèk.

¹²Mengkono dèwèké bakal Tak ukum awit sangka dina-dina waktu masrahaké kurban marang para Baal, lan nganggo anting-antingé lan kalungé, lan terus ngetutké para bédangané nanging lali marang Aku,” mengkono tembungé GUSTI.

¹³“Awit bab kuwi, dèwèké bakal Tak réh-réh, lan Tak ejak menyang ing ara-ara samun, lan Tak omongi sing nggawé legané atiné.

¹⁴Aku bakal ngekèkké kebon angguré ing kana, uga Tak wènèhi legokan Akor kanggo gapurané pengarep-arep. Ing kono dèwèké bakal ngidung-ngidung kaya waktu ijik nom, kaya waktu budal metu sangka negara Egipte.

¹⁵Ing dina kuwi - mengkono tembungé GUSTI—, Aku bakal kok tyeluk: Bojo kula, lan Aku ora kok tyeluk menèh: Baal[3] kula!

¹⁶Uga menèh jenengé sak kabèhé Baal bakal Tak resiki sangka tutukmu, terus ora disebut-sebut menèh kaya ing dina-dina ijik nom.

¹⁷Lan ing dina kuwi kowé bakal Tak gawèkké perjanjian karo kéwan-kéwan ing ara-ara lan manuk-manuk ing awang-awang, uga karo sak kabèhé kéwan sing nggremet ing bumi. Gendéwa, pedang lan pirantiné perang bakal pada Tak entèkké sangka bumi, lan kowé bakal Tak gawé bisa nglèyèh turu karo tentrem.

¹⁸Kowé bakal Tak jikuk bojo kanggo ing sak lawas-lawasé, lan enggon-Ku njupuk bojo kowé kuwi karo keadilan lan sing bener, lan karo kawelasan lan katrésnan.

¹⁹Kowé bakal Tak jikuk bojo karo setia, terus kowé bakal kenal marang GUSTI.

²⁰Ing waktu kuwi - mengkono tembungé GUSTI - Aku bakal ngrungokké marang langit, lan langit bakal nyuburké bumi.

²¹Bumi bakal ngrungokké marang jagung, anggur lan lenga, lan kuwi bakal pada ngrungokké marang Yisreèl.

²²Terus kuwi bakal Tak buyaraké ing bumi lan dadi duwèk-Ku, lan Aku bakal ngekèki kawelasan marang Lo-Rukama, lan Aku bakal ngomong marang Lo-Ami, kuwi: Kowé kuwi umat-Ku! Nanging kowé bakal ngomong: Duh Gusti Allah kula!”