Read Caribbean Javanese Hoséa 4 Bible Online

Hoséa 4 - Caribbean Javanese bible

Hoséa 4

¹Hé wong Israèl, pada rungokna tembungé GUSTI, awit GUSTI nduwé perkara karo wong isiné negara kéné, awit ora ana kasetian lan ora ana katrésnan marang Gusti Allah, lan ora ana sing kenal marang Gusti Allah ing negara kéné.

²Sing ana mung sepata-sepata, goroh, matèni lan nyolong, laku bédang, lan ngutahké getih tanpa mandek.

³Mulané negara iki bakal kasusahan, lan sing manggon bakal pada kétok gloyoran; uga kéwan-kéwan ing ara-ara lan manuk ing awang-awang, uga iwak-iwak ing segara bakal pada entèk.

⁴Mung waé aja ana wong sing nuntut, lan aja ana wong sing nyalahké, awit kowé sing Tak tuntut, hé imam!

⁵Bab kuwi kowé bakal keplèsèt tiba ing wayah awan, uga nabi bakal keplèsèt tiba bareng karo kowé ing wayah mbengi; lan Israèl, ibumu bakal Tak entèkké!

⁶Umat-Ku entèk awit ora kenal marang Gusti Allah, awit kowé sing emoh kenal, mulané kowé Tak tampik dadi imam-Ku, lan awit kowé kuwi ninggal piwulangé Gusti Allahmu, mulané Aku uga bakal nyingkur marang anak-anakmu.

⁷Saya mundak okèh tyatyahé para imam, dosané marang Aku ya mundak tambah, kaluhurané bakal Tak ganti sing njijiki.

⁸Pada olèh pangan awit sangka dosané umat-Ku, lan ngarep-arep supaya umat-Ku nindakké kesalahan.

⁹Mulané kaya nasipé rayat, ya kaya mengkono kuwi nasipé imam: bakal Tak ukum kelakuané lan Tak wales sing dadi penggawéné.

¹⁰Bakal pada mangan, nanging ora bisa warek, pada laku bédang, nanging ora tangkar-tumangkar, awit wis pada ninggal marang GUSTI lan nggondèli sundel.

¹¹Pikirané didadèkké buntet, karo anggur anyar lan anggur lawas.

¹²Umat-Ku takon marang wité; lan tekené sing ngekèki weruh, awit pada disasarké karo bédang, lan pada laku bédang lan terus ninggal marang Gusti Allahé.

¹³Pada pasrah kurban ing putyuké gunung-gunung, lan ngobong kurban ing puntuk-puntuk, ing grumbulé wit gedé, wit ringin lan wit terbantin, awit kuwi grumbulé kétok apik. Ya kuwi sing njalari anakmu wadon pada laku bédang, lan mantumu wadon pada dadi wong wadon nakal.

¹⁴Aku ora bakal ngukum anak-anakmu wadon senajan pada laku bédang, utawa mantu-mantumu wadon, senajan dadi wong wadon nakal awit kowé déwé wong lanang pada manggon karo para wong wadon lonté, lan pada nggawé sajèn bebarengan karo sundel-sundel agama, mulané umat sing ora nduwé pangertèn kuwi bakal nemoni karusakan.

¹⁵Hé, Israèl, yèn kowé laku bédang, Yéhuda aja nganti mèlu nggawé kesalahan, aja lunga menyang Gilgal, lan aja munggah menyang Bèt-Awèn,[5] omah ala lan aja sumpah: “Nganggo jenengé GUSTI sing urip!”

¹⁶Nanging Israèl kuwi wis dadi wangkot, kaya sapi sing mbèlot, mulané apa ya GUSTI bakal ngengon kaya wedus gèmbèl ing pangonan sing jembar?

¹⁷Efraim wis nunggal karo brahala-brahala, ujonen waé!

¹⁸Rembukané para wong mendem! Wis pada masrahaké awaké marang wong wadon nakal, pada luwih trésna marang sing njijiki tenimbangané marang kamulyan.

¹⁹Pada ketutupan ing swiwiné angin, lan bakal pada ngalami kewirangan awit sangka kurban-kurbané.