Read Caribbean Javanese Hoséa 7 Bible Online

Hoséa 7 - Caribbean Javanese bible

Hoséa 7

¹Yèn Aku maraské Israèl, terus kétok dosané Efraim, lan penggawé alané Samaria; nanging wis pada tumindak ngapusi, maling mlebu karo ngrusak omah, grombolan ing njaba pada mbégal.

²Pada ora mikir yèn Aku éling marang kabèh penggawé alané. Saiki uga wis pada dikepung karo pokalé, kabèh kuwi ing ngarep-Ku.

³Penggawé alané kuwi ndadèkké senengé ratuné, lan pangertiné sing goroh ndadèkké bungahé para penggedéné.

⁴Kabèh pada laku bédang, kaya pawon sing murup terus, waktu tukangé roti lèrèn nggedèkké geni, lan waktu ngulet jladrèné nganti mumpluk karo ragi.

⁵Ing dina riyaya ratu kita, pada nggawé larané para penggedéné karo mendem anggur; uga ratu kuwi komplotan karo wong sing seneng memoyok.

⁶Wong-wong kuwi batiné kaya pawon murup, atiné murup mulat-mulat; sewengi muput nesuné mandek, bareng ésuk murup menèh kaya geni sing nylalat-nylalat.

⁷Wong-wong kuwi pada panas kabèh kaya pawon murup, sing ngentèkké para penggedéné. Sak kabèhé ratuné wis pada mati, wong-wong kuwi ora ana siji-sijia sing sambat marang Aku.

⁸Efraim dadi siji karo bangsa-bangsa, kedadiané Efraim kaya roti bunder sing ora diwalik.

⁹Kekuwatané wis dientèkké karo wong liyané, nanging awaké déwé ora ngerti; uwané ya wis okèh, nanging ya ora ngerti.

¹⁰Gemunggungé Israèl dadi paseksi kanggo awaké déwé, nanging pada ora mratobat marang GUSTI, Gusti Allahé, lan ing sak njeruhné sak kabèhé kahanan sing mengkono kuwi mau ya ora terus nggolèki Panjenengané.

¹¹Efraim wis kaya manuk dara sing bodo, tanpa pangertèn, ya kuwi enggoné njaluk tulung marang Egipte, lan enggoné marani Asyur.

¹²Yèn budal mbrana, Aku bakal masang jaring-Ku ing nduwuré, bakal Tak gèrèt medun kaya manuk ing awang-awang, bakal Tak gebuki awit sangka ala-alané.

¹³Tyilaka wong-wong kuwi, awit wis pada minggat ninggalké Aku, pada nemoni karusakan, awit wis pada mbruntak marang Aku! Arep pada Tak tulungi, nanging pada ngomong goroh marang Aku.

¹⁴Sambaté marang Aku kuwi ora metu sangka karepé atiné, nanging pada nangis ing peturoné. Pada natoni awaké supaya olèha jagung lan anggur, lan pada nglawan marang Aku.

¹⁵Senajan wis pada Tak latih lan Tak kuwatké tangané, senajan mengkono pada ngrantyam arep nindakké sing ala marang Aku.

¹⁶Pada mbalik marani Baal,[8] lan pada kaya gendéwa sing goroh, para penggedéné bakal pada mati karo pedang, awit sangka tembungé sing kasar. Ya kuwi sing bakal dadi jalarané enggoné bakal pada dipoyoki ing negara Egipte.