Read Caribbean Javanese Hoséa 8 Bible Online

Hoséa 8 - Caribbean Javanese bible

Hoséa 8

¹Ngunèkna trompèt! Ana sing nyerang bangsané GUSTI kaya manuk garuda; mulané mengkono awit wong-wong kuwi wis pada mbubrah perjanjian-Ku, lan mbangkang marang angger-angger-Ku.

²Pada sambat marang Aku: “Duh Gusti Allah kula, kita, bangsa Israèl kenal karo Panjenengan!”

³Israèl wis mbuwang sing betyik, mulané bèn diuber karo mungsuh!

⁴Wis pada ngedekké ratu, nanging ora karo setuju-Ku. Pada ngedekké penggedéné, nanging Aku ora dikèki ngerti. Emas lan slaka dienggo nggawé brahala-brahala kanggo awaké déwé, mulané pada dientèkké.

⁵Hé Samaria, pedètmu Tak tampik, bebendu-Ku mulat-mulat marang wong-wong kuwi! Nganti pira suwéné enggoné ora bisa pada nyutyèkké awaké

⁶wong-wong Israèl kuwi? Iku tukang sing nggawé, lan duduk Gusti Allah! Lah pedèt Samaria kuwi bakal ajur dadi sak walang-walang.

⁷Awit pada nyebar angin, mulané bakal panèn lésus; jagungé ora bisa tuwa, ora metu glepungé; nanging yèn ana sing bisa metu, kuwi mesti dientèkké karo bangsa liyané.

⁸Israèl wis diuntal; saiki pada ing antarané bangsa-bangsa kaya barang tampikan.

⁹Wis pada lunga menyang Asyur kaya waé kimar alas sing ndéwé. Efraim mbayar bédangané kanggo katrésnan.

¹⁰Senajan nemokké bédangané ing antarané bangsa-bangsa, Aku bakal ngukum wong-wong kuwi, nganti sedilut engkas bakal pada lèrèn enggoné ditindes ratu lan para penggedéné Asyur.

¹¹Lah Efraim wis ngakèhké mesbèh, mesbèh-mesbèhé kuwi njalari terus pada nindakké dosa.

¹²Senajan Tak tulisi piwulang-Ku pirang-pirang, nanging kuwi pada dianggep perkara sing kanggo wong mantya.

¹³Pada seneng pasrah kurban sing dibelèh, pada pasrah daging lan pada mangan kuwi; nanging kuwi ora ndadèkké senengé GUSTI. Saiki paneraké bakal diélingi, lan dosané bakal diukum. Wong-wong mau kudu pada bali menyang Egipte!

¹⁴Israèl wis nglalèkké Sing nggawé, lan wis ngedekké kraton-kraton; Yéhuda wis ngakèhké kuta-kuta sing kuwat, nanging Aku bakal nibakké geni ing kuta-kutané, sing mangan kraton nganti ludes.