Read Caribbean Javanese Yoèl 1 Bible Online

Yoèl 1 - Caribbean Javanese bible

Yoèl 1

¹Iki tembungé GUSTI sing dipréntahké marang Yoèl, anaké Petuèl.

²Hé, para pinituwa, pada rungokna, hé, para wong isiné negara, pada ngrungokna! Sakjekmu urip utawa ing jamané para leluhurmu apa tau ana lelakon sing kaya mengkéné iki?

³Anak-anakmu pada tyritanana lelakon kuwi, terus anak-anakmu gentèn kongkonen nyritakké marang anak-anaké, lan putumu ya nyritanana marang turunané.

⁴Turahé walang sing ngrikiti dipangan karo walang alihan, lan turahé walang alihan dipangan karo walang mlumpat, lan turahé walang mlumpat dipangan karo walang nggragas.

⁵Hé, para wong mendem, tangia lan nangisa! Hé, para wong sing kesenengané anggur, awit sangka anggur anyar, pada ngaduh-aduha, awit anggur kuwi wis direbut sangka tutukmu.

⁶Nanging ana bangsa sing ngluruk negaraku, bangsa sing kuwat lan tanpa itungan tyatyahé, untuné kaya untuné singa, lan siungé kaya siungé singa wédok.

⁷Witku anggur pada dirusak, lan witku anjir pada diketoki, diklèntèki lan dirubuhké, lan pangé pada dadi putih.

⁸Ngaduh-aduha kaya prawan sing nganggo salin kasusahan, awit sangka patyangané, katrésnané waktu ijik nom.

⁹Kurban panganan lan kurban ombènan wis ilang sangka griyané GUSTI; para abdiné GUSTI, ya kuwi para imam, pada susah.

¹⁰Kebon wis rusak, bumi ngenes, awit jagungé wis entèk angguré wis garing, lengané wis tipis.

¹¹Para wong tani pada kisinan, para tukang kebon anggur pada ngaduh-aduh, awit sangka gandum lan jewawut, awit panènané kebon wis lebur kabèh.

¹²Wité anggur wis garing lan wité anjir wis alum, mengkono uga wité mulwa, wité kurma lan wité apel, sak rupané wit ing ara-ara wis pada garing. Tenan, kabungahan entèk ontyat sangka para anak-anaké manungsa.

¹³Hé, para imam, pada nganggoa salin kasusahan lan sambat-sambata, hé, para sing ngladèni mesbèh, pada ngaduh-aduha, hé, para peladèné Gusti Allahku, pada mlebua, pada nginepa karo nganggo salin kasusahan, nanging griyané Gusti Allahmu wis ilang kurban panganan lan kurban ombènan.

¹⁴Pada nganakna pasa sing sutyi, nganakna kumpulan gedé, nglumpukna para tuwa-tuwané, uga sak kabèhé wong isiné negara ing griyané GUSTI, Gusti Allahmu lan pada sambat-sambata marang GUSTI.

¹⁵Oh tyilaka dina kuwi, nanging nyata wis tyedak dinané GUSTI, tekané rupa karusakan sangka sing Mahakwasa.

¹⁶Ing ngarepé mripat kita, apa ora wis entèk sak kabèhé pangan, kabungahan lan surak-surak sangka griyané Gusti Allah kita?

¹⁷Winih-winih pada garing ing njeruh lemah, lumbung-lumbung wis pada resik gasik, gudang-gudang wis pada ambruk awit jagungé wis entèk.

¹⁸Kaya apa jeritané kéwan-kéwan, kumpulan sapi pada bingung, awit wis ora ana pangonan menèh, uga wedus-wedus gèmbèl pada kontrang-kantring.

¹⁹Duh GUSTI, mung Panjenengan sing kula sambati, awit pangonan ing ara-ara, wis dipangan karo geni nganti entèk. Urupé geni wis nggosongké kabèh wit-witan ing ara-ara.

²⁰Uga kéwan-kéwan ing ara-ara uga pada sambat marang Panjenengan, awit kali-kali wis pada asat, lan pangonan ing ara-ara samun wis dipangan karo geni.