Read Caribbean Javanese Yoèl 3 Bible Online

Yoèl 3 - Caribbean Javanese bible

Yoèl 3

¹“Nanging ing dina kuwi lan ing waktu kuwi, yèn Aku mulihké kahanané Yéhuda lan Yérusalèm,

²ing kono Aku bakal nglumpukké sak kabèhé bangsa, Tak tuntun medun menyang legokan Yosafat, terus Aku bakal ngadili para bangsa kuwi ing kana bab umat-Ku lan duwèk-Ku, Israèl, nanging wis pada dipentyarké ing sak tengahé para bangsa lan tanah duwèk-Ku diedum-edum.

³Enggoné ngrebut umat-Ku kuwi karo mbuwang lotré, botyah lanang didol karo wong wadon lonté, botyah wadon didol diijolké anggur, supaya bisa ngombé.

⁴Nanging kanggo kowé, hé Tirus lan Sidon lan sak tanah pangwasané Filistèn, ana gegandengané apa, karo Aku? Apa kowé arep mbales penggawéan-Ku? Yèn kowé nindakké apa waé marang Aku, karo dadakan enggon-Ku, bakal mbalèkké penggawému kuwi marang kowé déwé.

⁵Awit slaka lan emas duwèk-Ku wis pada kok jikuk, lan barang-barang-Ku sing ana ajiné pada kok lebokké ing panggonan pangabektimu,

⁶lan wong-wong Yéhuda lan wong-wong Yérusalèm wis pada kok edol marang wong Yunani, karepmu supaya pisah adoh karo tanahé.

⁷Lan wongé bakal pada Tak tangèkké sangka panggonan kowé ngedol mau, lan nampekké penggawému kuwi marang sirahmu déwé.

⁸Nanging anakmu lanang lan wadon bakal Tak edol marang turunané Yéhuda, lan terus ngedol marang para wong Syéba, marang bangsa sing adoh, awit GUSTI wis ngomong mengkono.”

⁹Perkara iki kabarna ing sak tengahé para bangsa: pada tata-tataa kanggo perang, para pahlawan pada budalna, sak kabèhé suradadu pada préntahana supaya mèlu perang sutyi.

¹⁰Gaman kanggo mlukumu gemblèngen dadi pedang, lan aritmu digawé tumbak; wong sing ringkih ngutyapké: “Aku iki suradadu!”

¹¹Sak kabèhé para bangsa sangka ngendi-endi, pada ngadeka lan maraa, lan pada nglumpuka mbrana! Duh GUSTI, para suradaduné Panjenengan supaya digawa medun!

¹²Para umat pada budala lan nglurukka, menyang legokan Yosafat, nanging Aku bakal njagong ing kana, ngadili sak kabèhé para bangsa ing ngendi-endi.

¹³Aritmu pada empakna awit unduh-unduhané wis tuwa, pada rénéa, pada meresa, awit peresané wis kebak anggur, gentong-gentongé wis pada lubèr, awit okèh penggawé alané wong-wong kuwi.

¹⁴Akèh wong, okèh wong, ing legokan diputusi, awit wis tyedak dinané GUSTI, ing legokan diputusi!

¹⁵Srengéngé lan mbulan pada dadi peteng, lintang-lintang wis pada ilang padangé,

¹⁶GUSTI bakal nggeruh sangka Sion, ngetokké swarané sangka Yérusalèm, langit lan bumi gonjang-ganjing. Nanging GUSTI dadi pangungsèn kanggo umaté, lan dadi bèntèng kanggo wong Israèl.

¹⁷“Kowé terus bakal pada weruh yèn Aku, GUSTI, Gusti Allahmu, sing manggon ing Sion, gunung-Ku sing sutyi, lan Yérusalèm bakal dadi sutyi, lan ora diliwati menèh karo bangsa liyané.

¹⁸Ing waktu kuwi bakal kelakon gunung-gunung bakal pada nètèské anggur anyar, lan puntuk-puntuk pada mili mèlek, lan sak kabèhé kali ing negara Yéhuda pada mili banyu; uga bakal ana sumber metu sangka griyané GUSTI, lan bakal mbanyoni legokan Sitim.

¹⁹Negara Egipte bakal dadi sepi mamring, lan negara Edom dadi ara-ara samun, awit sangka penggawé ala sing ditindakké marang turunané Yéhuda, awit wis ngutahké getih resik ing negarané.

²⁰Nanging Yéhuda tetep dienggoni selawasé, lan uga Yérusalèm nganti turun-temurun.

²¹Lan Aku bakal mbales marang getihé, sak pira sing durung Tak wales. GUSTI tetep manggon ing Sion.”