Read Caribbean Javanese Amos 3 Bible Online

Amos 3 - Caribbean Javanese bible

Amos 3

¹Hé wong Israèl, pada rungokna tembungé sing dipréntahké karo GUSTI kanggo kowé, ya kanggo bangsa sak kabèhé sing wis Tak etoké sangka negara Egipte, mengkéné tembungé:

²“Mung kowé sing Tak kenal, sangka sak kabèhé bangsa ing sak lumahé bumi, mulané kowé bakal Tak ukum awit sangka sak kabèhé kesalahanmu.

³Apa ana wong loro sing mlaku bebarengan, yèn durung sak rembukan?

⁴Apa ana singa sing nggeruh ing alas, yèn durung olèh memangsané? Singa nom apa nyuwara ing panggonané, yèn durung nubruk apa-apa?

⁵Apa ana manuk sing kejebak ing pasangan nang lemah, yèn ora dipasangi pakan? Pasangan apa jeprèt sangka lemah yèn durung olèh apa-apa?

⁶Apa ana trompèt diunèkké ing sakwijiné kuta, sing ora ndadèkké gemeteré wong-wong? Lan apa ana tyilaka sing nyerang sakwijiné kuta, yèn duduk GUSTI sing nindakké?

⁷Tenan, GUSTI, Gusti Allah ora nindakké apa-apa tanpa disik putusané diomongké marang para abdiné, nabiné.

⁸Singa wis nggeruh, sapa sing ora wedi? GUSTI, Gusti Allah wis ngomong, sapa sing ora nubuat?”

⁹Pada kabarna ing kraton ing Asyur, lan ing sak njeruhné kraton ing negara Egipte, lan ngomonga: “Pada nglumpuka ing gunung-gunung ing sak tyedaké Samaria, lan nyawanga gègèran gedé ing sak tengahé kuta kuwi lan penggawé ala ing kuta kono.”

¹⁰“Wong-wong kuwi pada ora weruh marang tumindak sing jujur,” mengkono tembungé GUSTI, “ya kuwi wong sing pada numpuk penindes lan penggawé ala ing kutané.”

¹¹Kanggo kuwi tembungé GUSTI, Gusti Allah mengkéné: “Mungsuh bakal ngepung negaramu, lan bakal ngilangké kekuwatanmu, lan kratonmu bakal dirampas!”

¹²Tembungé GUSTI mengkéné: “Kaya pangon sing ngrebut sikil loro utawa kuping sak tyuwél sangka tyangkemé singa, kaya mengkono wong Israèl sing manggon ing Samaria enggoné bakal dietokké, mung sak bagéan, kaya sak bagéan sikilé ambèn sing kanggo lèyèh-lèyèh.”

¹³Tembungé GUSTI, Gusti Allah sing ngwasani langit lan bumi: “Pada rungokna, lan turunané Yakub pada élingna.”

¹⁴“Ing dina enggon-Ku ngukum Israèl, awit sangka penggawé-pengawéné sing ala, Aku ya bakal nibakké paukuman marang mesbèh-mesbèhé Bétel, nganti sunguné mesbèh kuwi pada ditugeli lan pada tiba ing lemah.

¹⁵Omah sing dienggoni ing waktu bediding bakal Tak gempuri bareng karo omah sing dienggoni ing waktu panas, omah-omah gading pada remuk, uga omah gedé pada entèk,” mengkono tembungé GUSTI.