Read Caribbean Javanese Amos 6 Bible Online

Amos 6 - Caribbean Javanese bible

Amos 6

¹“Tyilaka para wong sing rumangsa ayem ing Sion, lan sing rumangsa tentrem ing gunungé Samaria; ya para penggedéné bangsa sing nomer siji, sing diparani karo turunané Israèl.

²Pada menyanga ing Kalné lan deloken, sangka kono menyanga ing Hamat negara sing gedé kuwi, terus menyanga ing Gat, negarané wong Filistèn, apa kuwi pada ngungkuli apiké kraton-kraton iki, utawa panggonané apa luwih jembar tenimbangané panggonanmu?

³Hé, kowé sing pada nganggep adoh sangka dinané tyilaka, nanging nyedekké pemrintahan penggawé ala;

⁴sing turu ing peturonmu gading, lan nglèyèh turu ing ambèn, lan mangan tyempéné kumpulan wedus, uga pedèt sangka sak tengahé kumpulané kéwan lemu,

⁵sing pada nyanyi miturut uniné siter, lan nggawé piranti musik kaya Daved;

⁶sing ngombé anggur sangka bokor, lan nglengani awak karo lenga sing apik déwé, nanging ora perduli bab rusaké turunané Yosèf.

⁷Mulané saiki, wong-wong kuwi bakal pada budal menyang pembuwangan lan dadi putyuké barisané; Raméné péstamu lan sing pada lèyèh-lèyèh sirep.”

⁸Gusti, GUSTI, wis sumpah kanggo Panjenengané piyambak; — mengkono tembungé GUSTI, Gusti Allah sing ngwasani langit lan bumi — “Aku jelèh weruh sombongé Yakub, lan sengit marang kratoné; negara sak isiné bakal Tak pasrahké.”

⁹Ing kono yèn ing omah siji ijik ana wong sing kèri sepuluh, kuwi bakal pada mati kabèh.

¹⁰Lan yèn pamané sing ngobong layoné kuwi, sing teka arep ngangkat lan ngetokké layon sangka omah kuwi lan takon marang ing mburiné: “Apa ijik ana wong menèh kejaba kowé?” Nanging disemauri: “Ora ana, wis menenga! Awit ora apik nyebut asmané GUSTI.”

¹¹Awit GUSTI wis mréntah, omah sing gedé bakal dirubuhké dadi ambruk, lan omah sing tyilik bakal dadi bobrok.

¹²Jaran apa pada mblayu ing gunung watu, lan sapi apa mluku ing kono?[2] Lah kowé wis ngowahi keadilan dadi ratyun, lan sing bener dadi salah?

¹³Hé kowé, sing pada bungah-bungah awit sangka Lodebar, lan sing pada ngomong: “Apa duduk kita sing ngrebut Karnain karo karosan kita?”

¹⁴“Awit Aku bakal ngedekké sakwijiné bangsa, sing bakal nglawan marang kowé, hé turunané Israèl,” mengkono tembungé GUSTI, Gusti Allahé sing ngwasani langit lan bumi, “lan kowé bakal ditindes wiwit sangka dalan sing nuju ing Hamat nganti tekan ing kali ing Araba.”