Read Caribbean Javanese Amos 7 Bible Online

Amos 7 - Caribbean Javanese bible

Amos 7

¹Iki wahyu sing dikèkké karo GUSTI, Gusti marang aku: Panjenengané nganakké grombolan walang, ing waktuné suket pungkasan wiwit tukul, ya kuwi suket pungkasan sakwisé dierit kanggo ratu.

²Waktu walang mau wiwit ngentèkké tetukulan ing bumi, terus tembungku: “Duh GUSTI, supaya Panjenengan gelem ngekèki ngapura! Kepriyé Yakub anggèné bisa tetep urip? Dèwèké apa ora tyilik, ta?”

³Ing kono GUSTI terus melas ing bab kuwi, tembungé: “Kuwi bakal ora kelakon.”

⁴GUSTI, Gusti terus ngekèki wahyu marang aku kaya mengkéné: GUSTI nyeluk geni kanggo paukuman, geni mau terus mangan segara gedé lan kebon nganti entèk.

⁵Aku terus ngomong: “Duh GUSTI, Gusti supaya Panjenengan gelem mandek! Kepriyé Yakub anggèné bisa tetep urip? Dèwèké kuwi apa ora tyilik, ta?”

⁶Ing kono GUSTI terus melas, tembungé: “Kuwi uga ora bakal kelakon.”

⁷Iki wahyu sing dikèkké marang aku: Gusti ngadek ing sak tyedaké témbok sing jejek lan nggawa tali timah gantung.

⁸Tembungé GUSTI marang aku: “Hé Amos, kowé weruh apa?” Tembungku: “Tali timah gantung!” Tembungé Gusti: “Umat-Ku Israèl bakal Tak pasangi tali timah gantung ing tengahé. Aku ora bakal ngekèki ngapura menèh.

⁹Puntuk-puntuk pangurbanané Isak bakal didadèkké ludes, lan panggonané sutyiné Israèl bakal dirusak, lan Aku bakal nglawan marang turunané Yérobéam karo pedang.”

¹⁰Waktu kuwi imam Amasia, imam ing Bétel kongkonan wong ngadep Yérobéam, ratu ing Israèl, dikongkon ngomong: “Amos wis nggawé komplotan bakal nglawan marang sampéyan ing kumpulané Israèl, negara kuwi ora bakal bisa tahan marang tembung-tembungé Amos kuwi.

¹¹Awit tembungé Amos mengkéné: Yérobéam bakal mati karo pedang, lan Israèl mesti lunga sangka negarané, dadi wong buwangan.”

¹²Imam Amasia mau terus ngomong marang Amos: “Wong tukang ndelok, lungaa, mblayua menyang negara Yéhuda! Golèka pangan mbrana lan medara wahyu ing kana waé.

¹³Nanging ing Bétel kéné kowé aja nubuat menèh, awit kéné iki panggonan sutyiné ratu lan griya sutyiné negara.”

¹⁴Amos terus nyauri marang imam Amasia: “Aku iki duduk tunggalé para nabi lan ya ora klebu golongané nabi, penggawéanku sing baku ngingu wedus lan ngunduhi woh anjir.

¹⁵Nanging Gusti nyeluk aku sangka penggawéanku angon wedus lan diomongi mengkéné: Kowé lungaa, medara nubuat marang umat-Ku Israèl.

¹⁶Nanging saiki kowé rungokna tembungé GUSTI! Tembungmu: Kowé aja nggelar nubuat nglawan Israèl, lan aja ngutyapké tetembungan nglawan marang turunané Isak.

¹⁷Mulané GUSTI ngomong mengkéné: Bojomu bakal dadi wong wadon lonté ing kuta, lan anak-anakmu lanang lan wadon bakal pada mati karo pedang; lemahmu bakal diedum-edum karo tali ukuran, lan kowé déwé bakal mati ing negara sing najis, lan Israèl mesti bakal dilungakké sangka negarané lan dadi wong buwangan.”