Read Caribbean Javanese Yunus 3 Bible Online

Yunus 3 - Caribbean Javanese bible

Yunus 3

¹Yunus terus diomongi karo GUSTI sing kaping pindoné:

²“Lungaa, menyanga ing Ninewé, kuta sing gedé kuwi lan ngomonga marang kuta kuwi, tembung sing bakal Tak wènèhké marang kowé.”

³Yunus terus tata-tataa lan terus budal menyang ing Ninewé, tyotyok karo tembungé Gusti Allah. Nanging Ninewé kuwi kuta sing gedéné ngidap-idapi, jembaré mlaku telung dina.

⁴Yunus terus mlebu ing kuta kono, adoh nganti mlaku sedina, terus mbengok: “Kurang patang puluh dina, Ninewé mesti bakal digempur.”

⁵Wong Ninewé kuwi pada ngandel marang Gusti Allah, mulané terus pada préntah pasa lan nganggo salin kasusahan, wiwit sing déwasa tekan botyah-botyah.

⁶Perkara kuwi bareng dikrungu karo Ratu ing Ninewé, Panjenengané terus medun sangka dampar, ngutyuli sandangané kraton, lan nganggokké salin kasusahan lan terus njagong nglésot ing awu.

⁷Atas sangka préntahé Ratu lan para penggedéné, terus diumumké lan dipréntahké ing Ninewé mengkéné: “Manungsa lan kéwan-kéwan, ya sapi lan wedus, aja ana sing mangan apa-apa, aja ana sing diengon, lan aja ana sing ngombé banyu.

⁸Manungsa lan kéwan-kéwan kudu pada nganggo salin kasusahan, lan terus pada sambat-sambata marang Gusti Allah, karo siji-sijiné pada mratobat, ninggala pokalé sing ala lan mbuwangi penggawé ala sing dilakoni.

⁹Sapa ngerti, mbok menawa Gusti Allah terus melas atiné lan getun lan gelem ngendek bebenduné sing mulat-mulat kuwi, terus kita ora sida dientèkké.”

¹⁰Bareng Gusti Allah weruh apa sing digawé wong-wong mau, ya kuwi enggoné pada mratobat ninggal mlakuné sing ala, Gusti Allah terus melas ing bab enggoné ngrantyam arep nibakké tyilaka marang wong-wong mau, terus kuwi diwurungké.