Read Caribbean Javanese Itungan 1 Bible Online

Itungan 1 - Caribbean Javanese bible

Itungan 1

¹Waktu taun sing kaping pindo ing sasi kaping pindo ing tanggal sepisan sakwisé pada metu sangka negara Egipte, GUSTI ngetokké tembung marang Moses ana ara-ara samun ing gunung Sinai ing sak njeruhné Tarup Kumpulan:

²“Kowé ngitunga umat Israèl kabèh manut kulawargané ing sak njeruhné taleré, sakkèhé wong lanang ing Israèl tulisana jenengé siji-sijiné,

³sing umuré rong puluh taun munggah, sing wis bisa perang, kuwi itungana karo Harun manut golongané déwé-déwé.

⁴Lan sing kanggo ngréwangi kowé saben taler wong siji, kanggo penggedéné kulawargané.

⁵Iki jenengé wong-wong sing pada kanggo ngréwangi kowé: Sangka taler Rubèn: Elizur anaké Syédéur;

⁶sangka taler Siméon: Sélumièl anaké Surisyadai;

⁷sangka taler Yéhuda: Nahason anaké Aminadab;

⁸sangka taler Isakar: Nétanéèl anaké Suar;

⁹sangka taler Sébulon; Eliab anaké Helon;

¹⁰kanggo turunané Yosèf, sangka taler Efraim: Elisama anaké Amihud; lan sangka taler Manasé: Gamalièl anaké Pedasur;

¹¹sangka taler Bényamin: Abidan anaké Gidéoni;

¹²sangka taler Dan: Ahiézer anaké Amisyadai;

¹³sangka taler Asyèra: Pagièl anaké Okran;

¹⁴sangka taler Gad: Elyasaf anaké Rehuèl;

¹⁵sangka taler Naftali: Ahira anaké Enan.”

¹⁶Kuwi wong sing dipilih sangka antarané para umat kuwi, siji-sijiné dadi penggedéné taler para leluhuré, kuwi pada dadi penggedéné suradadu Israèl.

¹⁷Moses lan Harun terus nyeluk wong-wong sing wis pada disebut jenengé mau.

¹⁸Bareng tanggal sepisan sasi kaping pindo terus pada nglumpukké kabèh pasamuan. Sakwisé mengkono terus diitungi para wong Israèl miturut turunané sing ketemu ing saben taler. Wong-wong sing umuré rong puluh taun munggah ditulisi jenengé siji-sijiné,

¹⁹kaya sing dipréntahké karo GUSTI marang Moses. Mengkono Moses enggoné ngitungi umat ing ara-ara samun Sinai.

²⁰Kanggo turunané Rubèn mbarepé Israèl kuwi miturut turunané ing taleré, tyatyahé wong lanang sing umur rong puluh taun munggah, sing wis bisa perang, pada ditulisi jenengé déwé-déwé.

²¹Gunggungé sangka taler Rubèn sing ketulis kuwi ana 76.500 wong.

²²Kanggo turunané Siméon kuwi miturut turunané ing taleré, tyatyahé wong lanang sing umur rong puluh taun munggah, sing wis bisa perang, pada ditulisi jenengé déwé-déwé.

²³Gunggungé sing ketulis sangka taler Siméon ana 59.300 wong.

²⁴Kanggo turunané Gad kuwi miturut turunané ing taleré, tyatyahé wong lanang sing umuré rong puluh taun munggah, sing wis bisa perang pada ditulisi jenengé.

²⁵Gunggungé sing ketulis sangka taler Gad kuwi ana wong 44.650.

²⁶Kanggo turunané Yéhuda kuwi miturut turunané, tyatyahé wong lanang sing umur rong puluh taun munggah, sing wis bisa perang pada ditulisi jenengé.

²⁷Gunggungé sing ketulis sangka taler Yéhuda kuwi ana 74.600 wong.

²⁸Kanggo turunané Isakar kuwi manut turunané ing taler, tyatyahé wong lanang sing umur rong puluh taun munggah, sing wis bisa perang pada ditulisi jenengé.

²⁹Gunggungé sing ketulis sangka taler Isakar kuwi ana 54.400 wong.

³⁰Kanggo turunané Sébulon kuwi miturut turunané ing taleré, tyatyahé wong lanang sing umur rong puluh taun munggah, sing wis bisa perang pada ditulisi jenengé.

³¹Gunggungé sangka taler Sébulon sing ketulis kuwi ana 57.400 wong.

³²Kanggo turunané Yosèf, sing mlebu getihé Efraim kuwi miturut turunané ing taleré, tyatyahé wong lanang sing umur rong puluh taun munggah, sing wis bisa perang pada ditulisi jenengé.

³³Gunggungé sangka taler Efraim sing ketulis kuwi ana wong 40.500.

³⁴Sing mlebu getihé Manasé, manut turunané ing taleré, tyatyahé wong lanang sing umur rong puluh taun munggah, sing wis bisa perang pada ditulisi jenengé.

³⁵Gunggungé sangka taler Manasé sing ketulis kuwi ana 32.200 wong.

³⁶Kanggo turunané Bényamin kuwi miturut turunané ing taleré, tyatyahé wong lanang sing umur rong puluh taun munggah, sing wis bisa perang, pada ditulisi jenengé.

³⁷Gunggungé sangka taler Bényamin sing ketulis kuwi ana 35.400 wong.

³⁸Kanggo turunané Dan kuwi miturut turunané ing taleré, tyatyahé wong lanang sing umur rong puluh taun munggah, sing wis bisa perang pada ditulisi jenengé.

³⁹Gunggungé sangka taler Dan sing ketulis kuwi ana wong 62.400.

⁴⁰Kanggo turunané Asyèra kuwi miturut turunané ing taleré, tyatyahé wong lanang sing umur rong puluh taun munggah, sing wis bisa perang pada ditulisi jenengé.

⁴¹Gunggungé sangka taler Asyèra sing ketulis kuwi ana wong 41.500.

⁴²Kanggo turunané Naftali kuwi miturut turunané ing taleré, tyatyahé wong lanang sing umur rong puluh taun munggah, sing wis bisa perang, pada ditulisi jenengé.

⁴³Gunggungé sangka taler Naftali sing ketulis kuwi ana wong 53.400.

⁴⁴Semono okèhé sing pada diitung karo Moses lan Harun lan para penggedéné wong Israèl rolas, sing siji-sijiné makili taleré.

⁴⁵Dadi sakkèhé wong Israèl sing diitung miturut taleré sing umur rong puluh taun munggah, sing wis bisa perang ing sak tengahé wong Israèl,

⁴⁶gunggungé 603.550 wong.

⁴⁷Nanging wong-wong sing mlebu turunané Lévi, kuwi enggoné diitung ora tyampur karo wong-wong kuwi,

⁴⁸awit Moses wis diomongi karo GUSTI, mengkéné:

⁴⁹“Mung taler Lévi kuwi aja kok tyateti lan aja kok itung tyatyahé bebarengan karo wong Israèl,

⁵⁰nanging kuwi pada dadia sing njaga Tarup Sutyi, panggonan pernatan uga prabot lan pirantiné kabèh; pada nggotonga Tarup Sutyi lan kabèh pirantiné; lan pada ngladèni nang kono, uga enggoné manggon ing sak ubengé.

⁵¹Yèn Tarup Sutyi budal, wong Lévi sing kudu ngutyuli, lan yèn lèrèn, wong Lévi sing kudu ngedekké; yèn ana wong lumrah sing nyedaki, diukum pati.

⁵²Wong Israèl yèn pada manggon, siji-sijiné manggona ing tarupé déwé-déwé, tyedak karo gendéra gendérané, manut golongané,

⁵³nanging wong Lévi kudu manggon ing sak ubengé Tarup Sutyi panggonané angger-anggeré Gusti Allah, supaya umat Israèl aja nganti kena ing memala; wong Lévi kudu njaga Tarup Sutyi, panggonané angger-angger kuwi.”

⁵⁴Nanging wong Israèl ya pada nglakoni kaya ngono; kaya sing dipréntahké karo GUSTI marang Moses, kuwi digatèkké kabèh.