Read Caribbean Javanese Itungan 10 Bible Online

Itungan 10 - Caribbean Javanese bible

Itungan 10

¹GUSTI ngetokké tembung marang Moses, mengkéné:

²“Kowé nggawéa trompèt slaka loro; sing digawé sangka slaka gemblèngan, kuwi pada dienggo nglumpukké umat Israèl lan kanggo mbudalké suradadu.

³Yèn trompèt loro kuwi diunèkké, wong Israèl kabèh pada nglumpuka ngadep marang kowé ing ngarep lawang Tarup Kumpulan.

⁴Nanging yèn mung siji sing diunèkké, kuwi sing kudu ngadep marang kowé para pemimpin, para penggedé suradadu Israèl.

⁵Yèn uniné tyekak-tyekak kuwi tandané para taler sing manggon ing sak wétané Tarup Sutyi kudu budal.

⁶Yèn kowé pada ngunèkké tyekak-tyekak kaping pindoné, umat sing manggon ing sisih kidul kuwi pada budal; yèn budal pada kudu nganggo tyekak swarané.

⁷Nanging yèn nglumpukké pasamuan, kowé ya ngunèkna trompèt, karo dawa swarané.

⁸Sing pada ngunèkké trompèt kuwi para imam anaké Harun; lan kuwi dadi pernatan langgeng marang turun turunmu.

⁹Uga yèn kowé ing negaramu pada ngluruk perang nglawan mungsuh sing nggawé angèlmu, kowé ya ngekèkana tenger nganggo trompèt, nganti kowé bakal pada diélingi ing ngarepé GUSTI, Gusti Allahmu, lan pada ditulungi sangka mungsuhmu.

¹⁰Mengkono menèh ing dina kebungahanmu, lan ing dina riyayamu uga ing sasi anyar, kowé ya ngunèkna trompèt mbarengi enggonmu masrahaké kurban obongan lan kurban keslametan; nganti bakal pada dadi pengéling-éling ing ngarepé Gusti Allahmu. Aku iki GUSTI, Gusti Allahmu.”

¹¹Ing taun sing kaping pindo, sasi kaping pindo tanggal rong puluh, mendungé mumbul sangka Tarup Sutyi, panggonané angger-anggeré Gusti Allah.

¹²Wong Israèl terus pada budal sangka ara-ara samun gunung Sinai miturut pernatané budalan, nanging mandeké mendung ing ara-ara samun Paran.

¹³Kuwi mlakuné sing wiwitan miturut préntahé GUSTI lantaran Moses.

¹⁴Sing mlaku ing ngarep déwé golongan sing nang ngisoré gendéra-gendérané turunané Yéhuda miturut golongané déwé-déwé, sing mimpin golongan kuwi: Nahason anaké Aminadab,

¹⁵sing mimpin golongan taleré turunané Isakar kuwi: Nétanéèl anaké Suar;

¹⁶lan sing mimpin golongan taleré turunané Sébulon kuwi: Eliab anaké Helon.

¹⁷Sakwisé mengkono Tarup Sutyi terus dibungkar, lan para turunané Gèrson lan turunané Mérari terus pada budal ngusung Tarup Sutyi mau.

¹⁸Kuwi terus disambung karo golongan sing nang ngisoré gendéra gendérané Rubèn miturut golongané déwé-déwé; sing mimpin golongan kuwi: Elizur anaké Syedéur;

¹⁹nanging sing mimpin golongan taleré turunané Siméon kuwi: Sélumièl anaké Surisyadai;

²⁰lan sing mimpin golongan taleré turunané Gad kuwi: Elyasaf anaké Rehuèl.

²¹Kuwi terus disambung karo para turunané Kéhat, sing ngusung piranti omah sutyi; sak tekané ing panggonan liyané, Tarup Sutyi kudu wis didekké menèh.

²²Terus sing nyambung menèh golongan sing nang ngisoré gendéra-gendérané turunané Efraim miturut golongané déwé-déwé;

²³sing mimpin golongan kuwi: Elisama anaké Amihud; nanging sing mimpin golongan taleré turunané Manasé kuwi: Gamalièl anaké Pedasur;

²⁴lan sing mimpin golongan taleré turunané Bényamin kuwi: Abidan anaké Gidioni.

²⁵Golongan sing mburi déwé golongan sing nang ngisoré gendéra gendérané turunané Dan miturut golongané déwé-déwé, sing mimpin golongan kuwi: Ahiézer anaké Amisyadai,

²⁶Pagièl bin Okran mimpin golongan-golongané taler Asyèr.

²⁷Lan uga Ahira bin Enan mimpin golongan-golongan taler Naftali.

²⁸Kaya mengkono urut-urutané klompok, lan golongané saben umat Israèl mlaku ngalih panggonan.

²⁹Nanging Moses ngomong marang Hobab, anaké imam Rehuèl wong Midian, maratuwané Moses, mengkéné: “Mlakuku pada menyang panggonan sing wis dipréntahké karo GUSTI, tembungé: Kuwi bakal Tak wènèhké marang kowé. Mulané sampéyan mbok mèlu aku, mesti bakal pada tak rumat apik, awit GUSTI wis njanjèkké sing apik kanggo Israèl.”

³⁰Nanging semauré marang Moses: “Kula ora mèlu, kula bakal mulih menyang negara kula lan menyang panggonané kulawarga kula.”

³¹Tembungé Moses: “Aku aja kok tinggal ta, awit ing ara-ara samun kéné sampéyan sing weruh, ngendi sing kena pada tak enggo manggon, mulané sampéyan dadia tukang nduduhké dalan kanggo kita.

³²Yèn sampéyan mèlu kita, kabetyikan sing bakal diwènèhké karo GUSTI marang kita, ya bakal pada kita kèkké marang sampéyan.”

³³Terus pada budal sangka gunungé GUSTI, adoh nganti lakon telung dina, lan petiné perjanjiané GUSTI diusung ing ngarep déwé sak njeruhné mlaku telung dina mau, golèk panggonan kanggo manggon.

³⁴Nanging ing waktu budal sangka tarup, ing wayah awan pada diiyupi karo mendungé GUSTI.

³⁵Nanging sak budalé peti, Moses ngomong marang GUSTI mengkéné: “Duh GUSTI, Gusti supaya ngadek, supaya mungsuh Panjenengan pada pating slebar uga wong-wong sing pada sengit marang Gusti pada mlayu sangka ngarepé Gusti.”

³⁶Nanging yèn petiné mandek, tembungé Moses: “Duh GUSTI, Panjenengan supaya gelem mulih menyang ing sak tengahé umat Israèl sing atusan éwon kuwi.”