Read Caribbean Javanese Itungan 12 Bible Online

Itungan 12 - Caribbean Javanese bible

Itungan 12

¹Miryam lan Harun pada nutuh marang Moses perkara wong wadon bangsa Etiopia sing wis dijikuk dadi bojoné, awit Moses pantyèn wis njupuk bojo wong bangsa Etiopia kuwi.

²Tembungé Miryam lan Harun: “Apa GUSTI kuwi enggoné ngekèki tembungé mung lantaran Moses waé, apa ora ya lantaran kita uga?” Sing mengkono mau dikrungu karo GUSTI.

³Nanging Moses kuwi luwih alus tindak-tanduké, ngungkuli sakkèhé wong sak lumahé bumi.

⁴Sak nalika GUSTI terus ngetokké tembung marang Moses lan Harun lan uga Miryam: “Kowé wong telu pada ngadepa menyang Tarup Kumpulan.” Wong telu kuwi terus ya pada ngadep.

⁵GUSTI terus medun ing sak njeruhné tugu mega, lan ngadek ing lawangé tarup, terus nyeluk Harun lan Miryam. Loro-loroné ya pada terus ngadep.

⁶Panjenengané terus ngetokké tembung: “Saiki kowé pada rungokna tembung-Ku iki: Yèn ing sak tengahmu ana nabi, enggon-Ku ngétok marang wong kuwi karo wahyu, lan enggon-KU ngekèki tembungé karo impèn:

⁷ora kaya mengkono kanggo abdi-Ku Moses, dèkné setia déwé ing antarané umat-Ku kabèh,

⁸saben tembung enggon-Ku omong-omongan marang dèkné, karo terus terang, ora karo bedèkan, malah nganti dililani weruh praupané GUSTI. Kanggo kuwi kenèng apa kowé kok ora wedi nutuh marang abdi-Ku Moses kuwi?”

⁹Ing kono muntap nesuné GUSTI marang wong loro mau lan terus lunga.

¹⁰Bareng mendungé wis ngalih sangka sak nduwuré tarup, Miryam kuwi ngalami lara lépra, rupané putih kaya salju; waktu Harun nolèh marang Miryam, kétok wis ngalami lara lépra.

¹¹Harun terus ngomong marang Moses: “Ah bendara kula, dosa iki mbok aja ditibakké marang aku lan Miryam, sing nandangi mengkono ing sak njeruhné kebodohan kula.

¹²Yuné aja ditégakké ing sak njeruhné kahanan kaya bayi lair wis mati, ing waktu metu sangka wetengé ibuné, dagingé wis setengah bosok.”

¹³Moses terus sambat marang GUSTI, tembungé: “Duh Gusti Allah, Gusti muga gelem maraské dèwèké.”

¹⁴Tembungé GUSTI marang Moses: “Sak umpama diidoni rainé karo bapaké, apa ora ngalami isin nganti pitung dina? Dèwèké singkirna ing sak njabané tarupé nganti pitung dina, sakwisé mengkono kena ditampani menèh.”

¹⁵Miryam dadi terus disingkirké ing sak njabané tarup suwéné pitung dina; lan wong-wong Israèl pada ora budal sak durungé Miryam ditampa menèh.

¹⁶Sakwisé mengkono terus budal sangka Hazérot, terus pada manggon ing ara-ara samun Paran.