Read Caribbean Javanese Itungan 17 Bible Online

Itungan 17 - Caribbean Javanese bible

Itungan 17

¹Sakwisé mengkono GUSTI ngetokké tembung marang Moses:

²“Kowé ngomonga marang wong Israèl lan kowé njaluka teken siji kanggo saben taler, sakkèhé penggedéné miturut taleré leluhuré, masrahaké siji, dadi kabèh ana teken rolas. Teken mau siji-sijiné tulisana jenengé penggedéné sing nduwèni,

³nanging tekené Lévi kuwi kok tulisana jenengé Harun. Dadi saben penggedéné taler kudu ana teken siji.

⁴Teken mau terus pada kok sèlèhké ing njeruh Tarup Kumpulan ing ngarepé petiné angger-angger ing panggonan sing adat saben Aku ketemu karo kowé.

⁵Wong sing Tak pilih kuwi tekené bakal semi; kaya mengkono enggon-Ku bakal ngendek panggrundelé wong Israèl sing ditujukké marang kowé, nganti bakal wis ora perlu Tak krungu menèh.”

⁶Moses terus ngomongi kuwi marang Israèl, terus saben penggedéné nggawa teken siji, miturut taleré leluhuré, dadi kabèh ana teken rolas lan tekené imam Harun ya tyampur karo teken-teken kuwi.

⁷Teken mau terus pada disèlèhké karo Moses ing ngarepé GUSTI ing tarup angger-anggeré Allah.

⁸Ing ésuké bareng Moses mlebu ing tarupé panggonan angger-angger, tekené imam Harun sing diitung taleré Lévi wis semi, metu putyuké lan kembangé lan woh ketèpèng sing mateng.

⁹Moses terus nggawa sakkèhé teken kuwi mau sangka ngarepé GUSTI menyang ngarepé wong Israèl kabèh; wong-wong pada weruh kuwi lan terus njupuka tekené déwé-déwé.

¹⁰GUSTI terus ngetokké tembung marang Moses: “Tekené Harun kuwi kok balèkna menèh menyang ing ngarepé peti angger-angger, disimpen kanggo tanda para wong sing duraka, nganti panggrundelé wis kok ilangi lan ora Tak krungu menèh, supaya aja pada mati.”

¹¹Moses ya terus nindakké apa sing dipréntahké karo GUSTI, kabèh ditandangi mengkono.

¹²Nanging wong Israèl pada ngomong marang Moses: “Wis kula iki mesti bakal mati, bakal tyilaka, ya pada bakal mati tyilaka kabèh.

¹³Sapa waé sing nyedekki Tarup Sutyi duwèké GUSTI, mesti nemoni pati. Apa kula bakal pada bakal mati kabèh?”