Read Caribbean Javanese Itungan 2 Bible Online

Itungan 2 - Caribbean Javanese bible

Itungan 2

¹GUSTI ngetokké tembung marang Moses lan Harun:

²“Wong Israèl enggoné manggon kuwi pada nyedaka gendéra-gendérané, nuruta tengeré taleré. Enggoné manggon kuwi anaa ing sak ubengé Tarup Kumpulan rada adoh.

³Sing manggon ing sisih wétan, tyedak karo gendéra gendérané, kuwi turunané Yéhuda, miturut golongané; sing dadi penggedéné turunané Yéhuda: Nahason anaké Aminadab.

⁴Suradadu-suradaduné sing diitung kuwi ana wong 74.600.

⁵Sandingé kuwi sing manggon taler Isakar, penggedéné turunané Isakar ya kuwi: Nétanéèl, anaké Suar.

⁶Suradadu-suradaduné sing diitung ana 54.400 wong.

⁷Terus taler Sébulon, penggedéné turunané Sébulon ya kuwi: Eliab anaké Helon.

⁸Suradadu-suradaduné sing diitung ana wong 57.400.

⁹Gunggungé suradadu sing diitung ing tarupé Yéhuda, miturut golongané ana 186.400 wong. Kuwi yèn budal ing ngarep déwé.

¹⁰Gendéra-gendérané taler Rubèn ing sisih kidul, miturut golongané, sing dadi penggedéné turunané Rubèn ya kuwi: Elizur anaké Syédéur.

¹¹Suradadu-suradaduné sing diitung ana wong 46.500.

¹²Sing manggon ing sandingé ya kuwi taler Siméon, sing dadi penggedéné turunané Siméon ya kuwi: Sélumièl anaké Surisyadai.

¹³Suradadu-suradaduné sing diitung ana wong 59.300.

¹⁴Terus taler Gad; sing dadi penggedéné taler Gad ya kuwi: Elyasaf anaké Rehuèl.

¹⁵Suradadu-suradaduné sing diitung ana wong 45.650.

¹⁶Gunggungé sing diitung ing tarupé Rubèn, miturut golongané ana wong 151.450. Kuwi budalé nomer loro.

¹⁷Sakwisé kuwi terus disambung Tarup Kumpulan karo suradadu-suradaduné turunané Lévi ing tengah-tengahé suradadu liya-liyané. Kaya sing waktu manggon, ya mengkono uga yèn budalan, siji-sijiné ing panggonané déwé-déwé miturut gendéra gendérané.

¹⁸Sing ing sisih kulon kuwi gendéra gendérané taler Efraim, miturut golongané; sing dadi penggedéné turunané Efraim ya kuwi: Elisama anaké Amihud.

¹⁹Suradadu-suradaduné sing diitung ana wong 40.500.

²⁰Sing ing sandingé taler Manasé, sing dadi penggedéné turunané Manasé ya kuwi: Gamalièl anaké Pedasur.

²¹Suradadu-suradaduné sing diitung kuwi ana 32.200 wong.

²²Terus taler Bényamin, sing dadi penggedéné taler Bényamin ya kuwi Abidan anaké Gidioni.

²³Suradadu-suradaduné sing diitung kuwi ana wong 35.400.

²⁴Gunggungé sing diitung ing tarupé Efraim, manut golongané ana 108.100 wong. Kuwi budalé sing nomer telu.

²⁵Sing ing sisih lor gendéra-gendérané taler Dan, miturut golongané, sing dadi penggedéné turunané Dan ya kuwi: Ahiézer anaké Amisyadai.

²⁶Suradadu-suradaduné sing diitung kuwi ana 62.700 wong.

²⁷Sing manggon ing sak tyedaké kuwi taler Asyèra, sing dadi penggedéné taler Asyèra ya kuwi: Pagièl anaké Okran.

²⁸Suradadu-suradaduné sing diitung kuwi ana 41.500 wong.

²⁹Terus taler Naftali, sing dadi penggedéné taler Naftali ya kuwi: Ahira anaké Enan.

³⁰Suradadu-suradaduné sing diitung kuwi ana wong 53.400.

³¹Gunggungé sing diitung ing tarupé Dan ana wong 157.600. Kuwi budalé anaa ing mburiné déwé, miturut gendéra gendérané.”

³²Semono okèhé mau gunggungé wong Israèl sing pada diitung miturut taler-taleré. Sakkèhé sing diitung ing tarup miturut golongané kabèh ana 603.550 wong.

³³Nanging wong Lévi ora mlebu diitung bareng karo wong Israèl, kaya sing wis dadi préntahé GUSTI marang Moses.

³⁴Wong Israèl pada nglakoni apa préntahé GUSTI marang Moses; kaya mengkono enggoné pada manggon miturut gendéra-gendérané, lan uga enggoné pada budal, siji-sijiné miturut turunané lan taleré.