Read Caribbean Javanese Itungan 23 Bible Online

Itungan 23 - Caribbean Javanese bible

Itungan 23

¹Biléam terus ngomong marang Balak: “Sak iki ing kéné kula sampéyan nggawèké mesbèh pitu, lan kula uga sampéyan tyawiské sapi lanang nom pitu lan wedus gèmbèl lanang ya pitu.”

²Balak terus nindakké kaya sing dadi penjaluké Biléam, lan terus pada masrahaké kurban ing saben mesbèh rupa sapi siji lan wedus siji.

³Biléam terus ngomong marang Balak: “Sampéyan kula njaluk ngadek ing tyedaké kurban obongan sampéyan, nanging kula bakal lunga; menawa kula bakal ditemoni karo GUSTI, terus ngomongi apa sing diomongké marang kula, kuwi bakal kula omongaké marang sampéyan.” Sakwisé mengkono Biléam terus munggah ing gunung sing gundul.

⁴Gusti Allah terus nemoni Biléam; Biléam terus ngomong marang Panjenengané: “mesbèh pitu kuwi wis kula tyawiské, lan ing saben mesbèh kula kurbané sapi lanang nom siji karo wedus gèmbèl lanang siji.”

⁵GUSTI terus ngisèni tembung ing tutuké Biléam lan ngetokké tembung: “Kowé balia menyang ngarepé Balak lan ngomonga mengkono kuwi.”

⁶Sak tekané ing ngarepé Balak, ketemu ijik ngadek sandingé kurbané obongan, bebarengan karo penggedéné bangsa Moab.

⁷Biléam terus ngutyapké kidungé: “Balak ratu ing Moab, nekaké aku sangka negara Aram, sangka pegunungan wétan, tembungé: Kowé tekaa, aku tulungana, mbendu Yakub, lan tekaa, sepatani Israèl.

⁸Kepriyé bisané mbendu, sing ora dibendu karo Gusti Allah? Kepriyé enggonku mbendu marang sing ora dibendu karo GUSTI?

⁹Awit bangsa kuwi tak deleng sangka putyuké gunung-gunung tak sawang sangka pegunungan. Kuwi bangsa sing manggon déwé, lan ora gelem diitung kegolong karo tunggalé bangsa liyané.

¹⁰Sapa sing bisa ngitung lebuné Yakub, utawa sapa sing bisa ngitungi golongané Israèl? Enggonku mati supaya bisa kaya patiné wong sing jujur, lan pungkasané uripmu kayaa pungkasané wong kuwi!”

¹¹Ing kono tembungé Balak marang Biléam: “Kepriyé tumindakmu marang aku iki? Enggonku nekakké kowé kuwi tak kongkon mbendu mungsuhku, nanging malah kok berkahi!”

¹²Tembung semauré Biléam: “Kula kudu ngomongké apa sing diisèkké karo GUSTI ing tutuk kula!”

¹³Balak terus ngomong marang Biléam: “Hayuk, kowé mèlua aku menyang panggonan liyané, sangka kono kowé bisa nyawang bangsa kuwi; sing kétok kuwi mung pungkasané tarupé waé, ora kétok sak kabèhé; terus aku tulungana, mbendu bangsa kuwi sangka kono.”

¹⁴Biléam terus digawa menyang ing ara-ara kanggo ngindik, ing putyuké gunung-gunung Pisga; Balak terus nggawé mesbèh pitu, lan ing saben mesbèh dipasrahké sapi lanang nom siji lan wedus gèmbèl lanang siji.

¹⁵Biléam terus ngomong marang Balak: “Sampéyan kula jaluk ngadek ing tyedaké kurban obongan, nanging kula bakal lunga mrana, nemoni ing ngarepé GUSTI!”

¹⁶GUSTI terus nemoni Biléam, lan tutuké diisèni tembung, lan diomongi: “Kowé balia menyang ngarepé Balak, lan ngomonga kaya mengkono kuwi.”

¹⁷Sak tekané ing ngarepé Balak, ijik ngadek ing sandingé kurbané obongan, bebarengan karo para penggedéné bangsa Moab. Balak terus ngomong marang Biléam: “Tembungé GUSTI kepriyé?”

¹⁸Biléam terus nggelarké kidung, semauré: “Duh Balak, ing waktu kula omongi ngadek kula gelem ngrungokké; duh anaké Sipor, saiki kula njaluk ngrungokké marang tembung kula.

¹⁹Gusti Allah kuwi duduk manungsa, kok nganti goroh, ya duduk anaké manungsa, kok nganti getun. Apa sing Panjenengané ngetokké tembung terus ora ditindakké, utawa ngetokké tembung terus ora dileksanani?

²⁰Mangertènana, kula nampa tembung supaya mberkahi, nanging yèn Panjenengané mberkahi, kula mesti ora bisa malik.

²¹Wong ora ngerti marang kasangsarané turunané Yakub, lan ora bisa weruh kasusahané wong Israèl, awit dadi siji karo GUSTI Allahé, pada surak-surak, awit Ratu ing sak tengahé.

²²Gusti Allah sing ngentasaké sangka negara Egipte, kuwi kanggo wong-wong mau kaya sungu kekuwatané sapi alasan.

²³Awit ora ana jopa-japu sing bisa mempan marang Yakub, utawa tenung sing bisa mempan marang Israèl. Teka ing waktuné, Yakub bakal dityritakké, mengkono uga marang Israèl, mujijat sing ditindakké karo Gusti Allah.

²⁴Salah sijiné bangsa sing ngadek kaya singa wédok, sing ngadek jejek kaya singa lanang, sing ora gelem njerum, sak durungé mangan memangsané lan ngombé getihé sing dipatèni.”

²⁵Ing kono Balak terus ngomong marang Biléam: “Yèn kowé blas ora gelem mbendu, ya aja pisan-pisan mberkahi.”

²⁶Tembung semauré Biléam marang Balak: “Kula apa ora wis ngomong marang sampéyan, yèn sing bakal kula omongaké ya apa kabèh préntahé GUSTI, lan ya kuwi sing kula lakoni.”

²⁷Sakwisé mengkono Balak terus ngomong marang Biléam: “Hayuk, kowé arep tak gawa menyang liya panggonan, menawa Gusti Allah nglilani bangsa kuwi kok bendu sangka kono.”

²⁸Biléam terus digawa menyang ing putyuké gunung Péor, sing ngadep menyang ara-ara samun.

²⁹Tembungé Biléam marang Balak: “Hayuk kula sampéyan nggawèké mesbèh pitu ing kéné, lan kula sampéyan tyawiské sapi lanang nom pitu lan wedus gèmbèl lanang pitu.”

³⁰Balak terus ya nindakké apa sing dadi tembungé Biléam, lan terus ngurbanké sapi siji lan wedus siji ing saben mesbèh.