Read Caribbean Javanese Itungan 25 Bible Online

Itungan 25 - Caribbean Javanese bible

Itungan 25

¹Waktu bangsa Israèl ijik pada manggon ana Sitim, bangsa kuwi terus wiwit laku bédang karo para wong wadon Moab.

²Wong wadon mau pada ngajak wong Israèl ngepung kurban sing dibelèh kanggo allahé, bangsa mau terus mèlu mangan kurban kuwi lan sujut marang allahé wong-wong kuwi.

³Waktu Israèl gegandèngan karo Baal Péor, bebenduné GUSTI mulat-mulat marang Israèl.

⁴GUSTI terus ngetokké tembung marang Moses: “Sak kèhé pemimpiné bangsa kuwi pada tyekelana, terus pada gantungen ana ngarepé GUSTI ing panggonan padang, supaya nesuné GUSTI sing mulat-mulat kuwi minggir sangka Israèl.”

⁵Moses terus ngomong marang para rèkter Israèl: “Kowé pada matènana wong-wongmu sing wis gegandèngan karo Baal Péor.”

⁶Ketepakan ana sakwijiné wong Israèl sing teka nggawa wong wadon bangsa Midian menyang sak tengahé para seduluré, konangan karo Moses lan diweruh karo sak golongan wong Israèl kabèh sing ijik pada nangis ing ngarepé lawangé Tarup Kumpulan.

⁷Bareng Pinéhas anaké Eléazar anaké Harun weruh lelakon kuwi, sak nalika terus ngadek sangka sak tengahé kumpulan karo nyekel tumbak,

⁸terus nututi wong Israèl mau nganti tekan ing sentong tengah, wong loro mau pada ditumbak wetengé, ya kuwi wong Israèl lan wong wadon, memala sing nyerang wong Israèl terus sirep.

⁹Nanging kanggo wong sing wis pada mati kena ing memala kuwi tyatyahé ana 24.000 wong.

¹⁰GUSTI terus ngetokké tembung marang Moses:

¹¹“Pinéhas anaké Eléazar anaké Harun kuwi sing njalari sirepé bebendu-Ku ing sak tengahé wong Israèl, awit karo mempeng enggoné mbélani kahurmatan-Ku ing sak tengahé umat, nganti Aku ora matèni marang wong Israèl ing sak njeruhné panas ati-Ku.

¹²Mulané kabèh pada kok omongana: Pinéhas kuwi Tak wènèhi perjanjian keslametan duwèk-Ku,

¹³kanggo perjanjian imam kanggo selawasé kanggo awaké déwé lan turunané, awit karo mempeng enggoné wis mbélani Gusti Allahé lan nganakké rukunan kanggo wong Israèl.”

¹⁴Nanging wong Israèl sing dipatèni bareng karo wong wadon bangsa Midian mau, jenengé Simri anaké Salu, penggedéné salah sijiné kulawargané wong Siméon,

¹⁵lan wong wadon bangsa Midian sing dipatèni kuwi jenengé Kosbi anaké Sur; Sur kuwi sakwijiné penggedéné golongan; ya kuwi kulawargané ing Midian.

¹⁶Sakwisé mengkono GUSTI ngetokké tembung marang Moses mengkéné:

¹⁷“Wong Midian kuwi pada luruken lan pada kok patènana,

¹⁸awit wis pada nglawan marang kowé karo akal sing dirantyam kanggo kowé, ing bab Péor lan ing bab Kosbi, seduluré wadon, ya kuwi anaké wadon sakwijiné penggedéné bangsa Midian; Kosbi kuwi dipatèni mbarengi memala sing jalaran sangka Péor kuwi.”