Read Caribbean Javanese Itungan 3 Bible Online

Itungan 3 - Caribbean Javanese bible

Itungan 3

¹Iki turunané Harun lan Moses ing nalikané GUSTI ngetokké tembung marang Moses ing gunung Sinai.

²Jenengé para anaké Harun, sing mbarep Nadab, terus Abihu, Eléazar lan Itamar.

³Kuwi mau jenengé anaké Harun, para imam sing pada dijebatani, lan wis ditetepaké supaya nindakké dadi imam.

⁴Nanging Nadab lan Abihu wis ninggal ndonya ana ngarepé GUSTI ing ara-ara samun ing Sinai, waktu pada masrahaké geni sing ora sak mestiné ing ngarepé GUSTI, lan pada ora nduwé turun. Mulané Eléazar lan Itamar sing nindakké imam waktu Harun, bapaké, ijik urip.

⁵GUSTI ngetokké tembung marang Moses mengkéné:

⁶“Taleré Lévi pada tyeluken maju lan ngadep marang imam Harun, supaya pada ngladèni Harun.

⁷Wong-wong kuwi pada netepana kuwajipané kanggo Harun lan kanggo para umat Israèl kabèh ing ngarepé Tarup Kumpulan, dadi pada nglakoni penggawéan sing ngladèni ana Tarup Sutyi.

⁸Wong-wong kuwi pada ngrumati marang sakkèhé pirantiné Tarup Kumpulan, lan pada netepana kuwajipané kanggo wong Israèl, dadi pada nglakoni penggawéan sing ngladèni ing Tarup Sutyi.

⁹Wong-wong Lévi kuwi pada dipasrahké marang Harun lan para anaké; sangka antarané wong Israèl wong-wong mau pada dipasrahké sak kabèhé marang Harun.

¹⁰Nanging kanggo Harun lan anak-anaké kuwi sing kudu dadi imam, nanging wong liyané sing nyedaki diukum pati.”

¹¹GUSTI ngetokké tembung marang Moses mengkéné:

¹²“Aku sing njupuk wong Lévi sangka sak tengahé wong Israèl, digawé gantiné sakkèhé anaké mbarep, sing lair sangka wetengé ibuné; wong Lévi kuwi pada dadia duwèk-Ku,

¹³awit kabèh anak mbarep kuwi duwèk-Ku. Waktu Aku matèni sak okèhé anak mbarep ing negara Egipte, terus sak okèhé anak mbarep ing Israèl pada Tak sutyèkké dadi duwèk-Ku; Aku iki GUSTI.”

¹⁴GUSTI ngetokké tembung marang Moses ing ara-ara samun ing gunung Sinai:

¹⁵“Wong turunané Lévi kuwi pada itungen miturut kulawargané lan miturut turunané; sakkèhé sing lanang sing umuré sesasi munggah, kuwi pada itungen kabèh.”

¹⁶Moses terus ngitungi turunané Lévi miturut tembungé GUSTI, kaya enggoné wis dipréntah.

¹⁷Iki jenengé para anaké Lévi: Gèrson, Kéhat lan Mérari.

¹⁸Iki jenengé anaké Gèrson miturut turunané: Libni lan Simèi.

¹⁹Para anaké Kéhat miturut turunané, ya kuwi: Amram, Yizhar, Hébron lan Yizhar.

²⁰Iki anaké Mérari miturut turunané: Makli lan Musi. Ya kuwi turunané para Lévi miturut kulawargané.

²¹Gèrson nurunké Libni lan Simèi; ya kuwi turunané Gèrson.

²²Tyatyahé sing lanang sing umur sesasi munggah kuwi, diitung ana 7500 wong.

²³Turunané Gèrson kuwi enggoné pada manggon ing sak mburiné Tarup Sutyi ing pinggiran kulon.

²⁴Sing dadi penggedéné kulawargané turunané Gèrson kuwi: Elyasaf anaké Laèl.

²⁵Kuwajipané turunané Gèrson ing Tarup Kumpulan ya kuwi: ngrumat Tarup Sutyi, Tarup lan payoné, geberé lawangé Tarup Kumpulan,

²⁶geber ing plataran lan geberé plataran ing sak ubengé Tarup Sutyi lan mesbèh, tali-taliné, lan liya-liyané sing gegandèngan karo sak kabèhé mau.

²⁷Sing mlebu kulawargané Kéhat ya kuwi turunané Amram, turunané Yizhar, turunané Hébron lan turunané Yizhar; ya kuwi turunané Kéhat.

²⁸Wong-wong sing lanang sing umur sesasi munggah nalika ketulis tyatyahé ana 8600, kuwi pada ngrumati barang-barang ing omah sutyi.

²⁹Turunané Kéhat kuwi enggoné manggon ing sak kidulé Tarup Sutyi.

³⁰Sing dadi penggedéné kulawargané lan turunané Kéhat kuwi: Elisafan anaké Yizhar.

³¹Kuwajipané ngrumati: peti, méja, kandelar, mesbèh lan piranti ing Tarup Sutyi sing dienggo pangabekti, uga geber, lan liya-liyané sing gegandèngan karo penggawéan kabèh.

³²Nanging Eléazar, anaké imam Harun kuwi sing dadi putyuké pimpinané wong turunané Lévi, sing dadi penggedéné marang sing pada njaga barang-barang ing panggonan sutyi.

³³Sing mlebu kulawargané Mérari ya kuwi turunané Makli lan turunané Musi; ya kuwi turunané Mérari.

³⁴Tunggalané sing lanang sing umuré sesasi munggah nalika diitungi tyatyahé ana 6200 wong.

³⁵Sing dadi penggedéné kulawargané lan turunané Mérari kuwi: Surièl anaké Abihail. Tarupé ing loré Tarup Sutyi.

³⁶Kuwajipané para turunané Mérari kuwi: ngrumati plangané Tarup Sutyi, kayu sing malang, tyagaké kabèh umpaké lan sakkèhé pirantiné, lan liya-liyané sing gegandèngan karo penggawéan mau kabèh;

³⁷uga tyagaké plataran mubeng kabèh umpaké, patoké lan tali-taliné.

³⁸Sing manggon ing ngarepé Tarup Sutyi ing sisih wétan, ing ngarepé Tarup Kumpulan, Moses lan Harun sak anak-anaké, sing pada nglakoni kuwajipané njaga omah sutyi kanggo wong Israèl; lan wong liya sing nyedaki kuwi mesti diukum pati.

³⁹Sakkèhé wong turunané Lévi sing diitung karo Moses miturut préntahé GUSTI, miturut turunané, sing lanang sing umur sesasi munggah kuwi ana 22.000 wong.

⁴⁰GUSTI terus ngetokké tembung marang Moses: “Kowé ngitunga sakkèhé anak lanang mbarep Israèl sing umuré sesasi munggah, pada itungen tyatyahé,

⁴¹Aku pilihna wong-wong Lévi - Aku iki GUSTI - dadia gantiné sakkèhé anaké mbarep wong Israèl, lan kéwan-kéwané wong Lévi dadia gantiné sakkèhé anak mbarep ing antarané kéwan-kéwané wong Israèl.”

⁴²Moses terus ngitungi sakkèhé anaké mbarep wong Israèl, kaya sing dadi préntahé GUSTI marang dèkné.

⁴³Sakkèhé anak mbarep lanang sing umur sesasi munggah sing pada ketulis jenengé, tyatyahé ana 22.273 wong.

⁴⁴GUSTI terus ngetokké tembung marang Moses:

⁴⁵“Aku jukukna wong Lévi dadia gantiné sakkèhé anak mbarep wong Israèl, lan uga kéwan-kéwané wong Lévi gantiné kéwan-kéwané wong Israèl; wong Lévi kuwi dadia duwèk-Ku; Aku iki GUSTI.

⁴⁶Kanggo tebusan para anak mbarep wong Israèl sing 273 wong, sing tyatyahé ngluwihi wong turunané Lévi kuwi,

⁴⁷saben wong siji omongana kudu mbayar duwit limang sèkel, miturut sèkel sutyi, sèkelé iki boboté rong puluh géra.

⁴⁸Duwit kuwi kok kèkké marang Harun lan para anaké kanggo tebusané wong-wong sing keluwihan kuwi.”

⁴⁹Moses terus njupuk duwit tebusan kanggo wong-wong sing tyatyahé keluwihan sing wis ditebus karo para wong Lévi mau,

⁵⁰duwit kuwi dijikuk sangka para anak mbarepé wong Israèl, gunggungé 1.365 sèkel, miturut timbangan sèkel sutyi.

⁵¹Duwit tebusan kuwi terus dipasrahké marang Moses marang imam Harun lan para anaké tyotyok karo tembungé GUSTI, sing wis dipréntahké karo GUSTI marang Moses.