Read Caribbean Javanese Itungan 31 Bible Online

Itungan 31 - Caribbean Javanese bible

Itungan 31

¹GUSTI terus ngetokké tembung marang Moses:

²“Kowé nindakna mbalesé wong Israèl marang wong Midian; sakwisé mengkono kowé bakal diklumpukké karo leluhurmu.”

³Moses terus ngomong marang bangsa kuwi, tembungé: “Wong sak panunggalmu pada tata-tataa kanggo perang, ngluruk Midian, pada nindakna balesané GUSTI marang Midian kuwi.

⁴Sangka sakkèhé taleré Israèl, saben taler wong 1000 pada ngluruka perang.”

⁵Terus saben taler nyawiské wong 1000, dadi kabèh rolas èwu sing pada arep ngluruk perang.

⁶Kuwi terus diomongi karo Moses supaya ngluruk perang, saben taler wong 1000, lan dibarengi Pinéhas anaké Eléazar, sing nggawa piranti omah sutyi lan trompèt kanggo tenger.

⁷Terus pada nyerang perang nglawan Midian, netepi tembungé GUSTI marang Moses, lan wong lanang kabèh pada dipatèni.

⁸Sak liyané wong-wong sing pada dipatèni, wong Israèl ya matèni para ratu ing Midian, ya kuwi: Réba, Rekem, Sur, Hur lan Réba, kabèh tyatyahé lima; uga Biléam anaké Béor ya dipatèni karo pedang.

⁹Wong Israèl terus pada ngrampasi wong wadon bangsa Midian kabèh anak-anaké sing ijik tyilik, lan kéwan-kéwané duwèké ratu pada dirampas;

¹⁰nanging kuta panggonané lan sakkèhé tarup-tarupé pada diobongi.

¹¹Sak kèhé rayahané lan rampasané rupa manungsa lan kéwan-kéwan mau pada digawani.

¹²Sakkèhé wong bandangan, barang rampasan lan barang sing direbut kuwi kabèh pada dipasrahké marang Moses lan marang Eléazar lan marang umat Israèl ing tarupé ing tanah daratan Moab, sing prenahé ing pinggir laut Yordan ing sak tyedaké kuta Yériko.

¹³Moses lan Eléazar lan sakkèhé para penggedéné umat terus pada lunga mapak nganti tekan ing sak njabané tarup.

¹⁴Moses terus nesu banget marang para penggedé suradaduné, para komendan 1000 lan komendan 100 sing pada mulih sangka peperangan;

¹⁵tembungé Moses marang wong-wong kuwi: “Apa wong wadon pada kok uripi kabèh?

¹⁶Apa, ora para wong wadon kuwi ta, sing awit sangka rembuké Biléam, pada njalari wong Israèl nganti pada nyingkur marang GUSTI marang Péor, nganti umaté GUSTI terus ketiban memala.

¹⁷Kanggo kuwi sakkèhé anaké lanang wong-wong kuwi pada patènana, lan sakkèhé wong wadon sing wis tau turu tyampur karo wong lanang ya pada patènana;

¹⁸mung sakkèhé botyah wadon sing durung tau turu tyampur karo wong lanang kuwi pada uripana kanggo kowé.

¹⁹Nanging kowé kuwi pada manggona ing sak njabané tarupé lawasé pitung dina; sapa sing wis matèni wong lan sapa sing nggepok layoné sing mentas dipatèni, kuwi ngresikana najisé ing dina sing kaping telu, lan ing pitung dinané, kowé déwé lan para wong bandanganmu.

²⁰Uga menèh sak rupané sandangan lan sak rupané dandanan lulang lan sembarang gawèané sangka wulu wedus, uga sakkèhé piranti kayu kuwi kudu disutyèkké najisé.”

²¹Imam Eléazar terus ngomong marang suradadu sing entas pada ngluruk perang mau: “Iki pernatan sing dipréntahké karo GUSTI marang Moses:

²²Mung barang-barang emas, slaka, tembaga, wesi, tembaga putih lan timbel,

²³samubarang sing tahan geni, kuwi kudu diobong, supaya resik najisé. Nanging ya ijik perlu disutyèkké najisé karo banyu upatyara najis; nanging samubarang sing ora bisa tahan ing geni kuwi tyelupna ing banyu.

²⁴Uga kowé pada ngumbah sandanganmu ing dina sing kaping pitu, nganti bakal resik najismu, sakwisé mengkono kowé pada kena mlebu ing tarup.”

²⁵GUSTI terus ngetokké tembung marang Moses:

²⁶“Kowé ngitunga sak rupané bandangan, sing rupa manungsa lan kéwan-kéwan - ya kowé kabèh imam Eléazar lan para penggedéné umat kuwi;

²⁷terus kuwi diparo, kanggo sing pada ngluruk perang, lan kanggo wong sak umat kabèh;

²⁸terus kowé njupuka pisungsung kanggo GUSTI sangka para suradadu sing pada ngluruk perang, saben 500 siji, ya sangka manungsa, ya sangka sapi, sangka kimar lan sangka wedus.

²⁹Kuwi dijukuk sangka sing separo sing dadi pandumané, terus kowé pasrahna marang imam Eléazar kanggo pisungsung spésial kanggo GUSTI.

³⁰Nanging separo sing dadi pandumané wong Israèl, kuwi dijukuk saben sèket siji, ya sangka manungsa, sangka sapi, sangka kimar lan sangka wedus; dadi sangka sak rupané banda kéwan, lan kabèh kuwi kok pasrahké marang para wong Lévi sing nglakoni penggawéan ing Tarupé Sutyi GUSTI.”

³¹Moses lan Eléazar terus pada nglakoni apa sing dadi préntahé GUSTI marang Moses.

³²Nanging bandangané, ya kuwi turahé sing direbut sing wis dirampas karo para suradadu, kuwi gunggungé: wedus 675.000;

³³sapi 72.000,

³⁴kimar 61.000.

³⁵Sak terusé wong-wong, ya kuwi para wong wadon sing durung tau tyampur turu karo wong lanang, tyatyahé kabèh 32.000 wong.

³⁶Nanging sing separo ya kuwi pandumané wong sing pada mèlu perang mau tyatyahé ana wedus 337.500.

³⁷Dadi pisungsung sing dipasrahké marang GUSTI ana wedus 675.

³⁸Sapiné ana 36.000, dadi pisungsungé sing dipasrahké marang GUSTI pitung puluh loro.

³⁹Kimaré ana 30.500, dadi pisungsung sing dipasrahké marang GUSTI suwidak siji,

⁴⁰lan wongé kabèh 16.000 wong, dadi pisungsungé sing dipasrahké marang GUSTI telung puluh loro.

⁴¹Pisungsung sing spésial kanggo GUSTI kuwi terus dikèkké karo Moses Eléazar, kaya sing wis dipréntahké karo GUSTI marang Moses mau.

⁴²Nanging separoné sing dadi pandumané wong Israèl, sing wis dipisah karo Moses sangka pandumané wong sing pada ngluruk perang,

⁴³ya kuwi sing separo sing dadi pandumané umat kuwi: wedus 337.700,

⁴⁴sapi 36.000,

⁴⁵kimar 30.500,

⁴⁶lan wongé 16.000 wong.

⁴⁷Sing separo sing dadi pandumané wong Israèl kuwi saben sèketé dijaluki siji karo Moses, ya sing rupa manungsa lan sing rupa kéwan-kéwan: kuwi terus pada dikèkké marang wong turunané Lévi, sing pada njaga marang Tarup Sutyi, kaya sing wis dadi préntahé GUSTI marang Moses.

⁴⁸Para penggedé suradadu, ya kuwi para komendan 1000 lan para komendan 100, terus pada nemoni marang Moses,

⁴⁹lan pada ngomong: “Kita wis pada ngitungi suradadu sing bareng kita, ora ana sing tyètyèr siji waé.

⁵⁰Mila kita pada nggawa pisungsung ngadep marang GUSTI, saben wong sak olèhé déwé-déwé, rupa: barang mas-masan, kayata: gelang sikil, gelang tangan, ali-ali ségel, anting-anting lan rerégan gulu kanggo nganakké rukunan kanggo nyawa kita ing ngarepé GUSTI.”

⁵¹Moses lan imam Eléazar terus nampani barang mas-masan kuwi mau, kabèh rupa barang dandanan sing alus.

⁵²Nanging pisungsung emas sing spésial sing dipasrahké marang GUSTI kuwi kabèh boboté 16.750 sèkel, semono okèhé kuwi pisungsungé para komendan 1000 lan para komendan 100.

⁵³Nanging para suradadu kuwi siji-sijiné wis njukuk kanggo awaké déwé.

⁵⁴Bareng Moses lan imam Eléazar wis nampani emas kuwi sangka para komendan 1000 lan komendan 100, emas kuwi terus dilebokké ing Tarup Kumpulan, kanggo pengéling-éling marang wong Israèl ing ngarepé GUSTI.