Read Caribbean Javanese Itungan 33 Bible Online

Itungan 33 - Caribbean Javanese bible

Itungan 33

¹Iki kabèh panggonané sing diliwati wong Israèl sakwisé budal sangka negara Egipte, sak golongan-sak golongan dituntun karo Moses lan Harun.

²Panggonan sing dilèrèni dipengeti karo Moses miturut préntahé GUSTI, iki kabèh panggonané sing dilèrèni mau.

³Budal sangka Rameses ing sasi kaping pisan tanggalé kaping limalas sak bubaré Paskah, wong Israèl pada budal awit karo tangan sing ngatyung, ing ngarepé wong Egipte kabèh.

⁴Waktu semono wong Egipte ijik mbeneri pada ngubur sakkèhé anak mbarep sing pada dipatèni karo GUSTI, awit GUSTI nibakké ukuman marang para allahé.

⁵Sakwisé wong Israèl budal sangka Rameses mau terus lèrèn ing Sukot.

⁶Terus budal sangka Sukot lan lèrèn ing Etam, sing sisih pinggir ara-ara samun.

⁷Budal sangka Etam terus bali menyang ing Pi-Hakirot, sing sisih ing peneré Baal-Séfon, lan pada nginep ing wétané Migdol.

⁸Terus budal sangka Pi-Hakirot, pada nyabrang mlaku ing tengahé segara nuju menyang ara-ara samun, terus mlaku ing ara-ara samun Etam nganti telung dina, terus pada lèrèn ing Mara.

⁹Terus budal sangka Mara lan tekan ing Elim; ing Elim kono ana sumber rolas lan wit kurma pitung puluh; terus pada nginep ing kono.

¹⁰Sangka Elim terus lèrèn ing pinggiré segara Abang.

¹¹Budal sangka pinggiré segara Abang, terus nginep ing ara-ara samun Sinai.

¹²Budal sangka ara-ara samun Sinai, nginep ing Dofka.

¹³Budal sangka Dofka terus lèrèn ing Alus.

¹⁴Sangka Alus terus lèrèn ing Rafidim, ing kono wong-wong pada ora olèh banyu sing kena diombé.

¹⁵Budal sangka Rafidim, terus lèrèn ing ara-ara samun Sinai.

¹⁶Terus budal sangka ara-ara samun Sinai, lan nginep ing Kibrot-Hatawa.

¹⁷Budal sangka Kibrot-Hatawa terus pada ngedekké tarup ing Hazérot.

¹⁸Budal sangka Hazérot lan lèrèn ing Ritna.

¹⁹Budal sangka Ritna terus nginep ing Rimon-Pèrès.

²⁰Terus budal sangka Rimon-Pèrès lan lèrèn ing Libna.

²¹Terus budal sangka Libna lan lèrèn ing Risa.

²²Terus budal sangka Risa lan nginep ing Kéhélata.

²³Terus budal sangka Kéhélata lan lèrèn ing Har-Syafér.

²⁴Terus budal sangka Har-Syafér lan ngedekké tarup ing Haranda.

²⁵Terus budal sangka Haranda lan nginep ing Makélot.

²⁶Terus budal sangka Makélot lan lèrèn ing Tahat.

²⁷Terus budal sangka Tahat, lan ngedekké tarup ing Tarah.

²⁸Terus budal sangka Tarah lan nginep ing Mitka.

²⁹Terus budal sangka Mitka lan lèrèn ing Hasmona.

³⁰Terus budal sangka Hasmona lan lèrèn ing Mosérot.

³¹Terus budal sangka Mosérot lan ngedekké tarup ing Bené-Yaakan.

³²Terus budal sangka Bené-Yaakan lan nginep ing Hor-Gidgad.

³³Terus budal sangka Hor-Gidgad lan ngedekké tarup ing Yotbata.

³⁴Terus budal sangka Yotbata lan lèrèn ing Abrona.

³⁵Terus budal sangka Abrona lan nginep ing Esion-Geber.

³⁶Terus budal sangka Esion-Geber lan ngedekké tarup ing ara-ara samun Sin, ya kuwi Kadèsy.

³⁷Terus budal sangka Kadès lan nginep ing gunung Hor, ing tapel watesé negara Edom.

³⁸Waktu kuwi Harun munggah ing gunung Hor awit sangka préntahé GUSTI, terus mati ing kono, ing taun kaping patang puluh diitung sangka budalé wong Israèl sangka negara Egipte, ing sasi kaping lima, ing tanggal sepisan.

³⁹Waktu mati ing gunung Hor kuwi umuré Harun 123 taun.

⁴⁰Ing waktu kuwi ratu Arad sing klebu bangsa Kanaan, sing manggon ing tanah Negeb, krungu kabar bab tekané wong Israèl.

⁴¹Sakwisé mengkono bangsa Israèl terus budal sangka gunung Hor, terus lèrèn ing Salmona.

⁴²Terus budal sangka Salmona lan nginep ing Funon.

⁴³Terus budal sangka Funon lan lèrèn ing Obot.

⁴⁴Terus budal sangka Obot lan ngedekké tarup ing sak tyedaké jugrukan ing Abarim ing bawah tanah Moab.

⁴⁵Terus budal sangka gempuran kuwi lan nginep ing Dibon-Gad.

⁴⁶Terus budal sangka Dibon-Gad lan ngedekké tarup ing Almon-Diblataim.

⁴⁷Terus budal sangka Almon-Diblataim lan lèrèn ing pegunungan Abarim, ing ngarepé gunung Nébo.

⁴⁸Terus budal sangka pegunungan Abarim lan nginep ing tanah daratan ing Moab, ing pinggir laut Yordan ing sak tyedaké Yériko.

⁴⁹Enggoné pada nginep ing pinggir laut Yordan wiwit sangka Bèt-Yésimot tekan ing Abel-Sitim ing tanah daratan ing Moab mau.

⁵⁰Waktu ing tanah daratan ing Moab ing pinggir laut Yordan ing sak tyedaké Yériko mau, GUSTI ngetokké tembung marang Moses:

⁵¹“Kowé ngomonga marang wong Israèl lan tuturana mengkéné: Yèn kowé wis pada nyabrang ing laut Yordan lan mlebu ing negara Kanaan,

⁵²wong sing manggon ing kono terus pada kok tundungana kabèh sangka ngarepmu, lan sakkèhé watu ukir-ukirané pada kok rubuhna, uga sakkèhé retya tyitakan ya pada kok gempurana, kabèh sakkèhé brahala sesembahané pada bubrahana.

⁵³Negarané pada kwasanana lan engonana, awit kowé sing pada Tak wènèhi negara kuwi supaya dadi duwèkmu.

⁵⁴Nanging enggonmu ngedum tanah kuwi sing terus dadi tanah duwèkmu kuwi nganggoa dilotré, miturut golongané: golongan sing gedé, kuwi didumi okèh, lan sing tyilik kuwi pandumané ya setitik, miturut lotréné; pandumané miturut taleré para leluhurmu.

⁵⁵Nanging yèn kowé pada ora nundungi wong rayat ing negara kuwi sangka ngarepmu, mesti sak pira wong-wong sing kèri kuwi bakal pada dadi klilép ing mripatmu, kaya eri sing nantyep ing awakmu, lan bakal pada gawé susahmu ing negara sing kok enggoni kuwi.

⁵⁶Aku bakal nindakké marang kowé, apa sing dadi rantyaman-Ku sing arep Tak tibakké marang para bangsa kuwi.”