Read Caribbean Javanese Itungan 34 Bible Online

Itungan 34 - Caribbean Javanese bible

Itungan 34

¹GUSTI terus ngetokké tembung marang Moses:

²“Kowé ngomonga marang wong Israèl lan tuturana mengkéné: Yèn kowé pada mlebu ing negara Kanaan, terus sing mesti bakal dadi duwèkmu ya kuwi negara Kanaan miturut tapel watesé.

³Nanging watesé negaramu sing sisih kidul kuwi wiwit sangka ara-ara samun Sin ing sak uruté negara Edom; dadi watesé sing sisih kidul kuwi ing sisih wétané wiwit ing pungkasané segara Uyah.

⁴Sangka kono tapel watesé negaramu ménggok ing sak kidulé unggah-unggahan ing Akrabim, terus tekan ing Sin, lan mandek ing sak kidulé Kadès-Barnéa, banjur terus menyang ing Hasar-Adar, lan terus nganti tekan ing Asmon.

⁵Sangka Asmon, watesé terus ménggok menyang ing kali Egipte, terus nganti tekan ing segara.

⁶Kanggo tapel watesé negaramu sing sisih kulon segara gedé kabèh pinggiré segara, ya kuwi sing dadi tapel watesé sing sisih kulon.

⁷Nanging tapel watesé sing sisih lor kuwi: wiwit sangka segara gedé watesé nuju tekan ing gunung Hor,

⁸sangka gunung Hor nuju tekan ing Hamat, lan terus nganti tekan ing Sédad.

⁹Tapel watesé mau terus tekan ing Sifron, nganti notok ing Hasar-Enan; kuwi tapel watesé sing sisih lor.

¹⁰Nanging tapel watesé sing sisih wétané kuwi nuju sangka Hasar-Enan mau tekan ing Séfam.

¹¹Sangka Séfam kuwi terus medun menyang Ribla ing wétané Ain; watesé terus medun menèh nganti tekan ing pinggir tlaga Kinèrèt ing sisih wétané.

¹²Watesé kuwi terus medun menèh nganti tekan ing laut Yordan lan terus nganti tekan ing tlaga Uyah. Ya kuwi negaramu miturut tapel watesé mubeng.”

¹³ Moses terus ngongkon marang wong Israèl: “Kuwi mau negara sing bakal dadi duwèkmu karo dilotré, sing dipréntahké karo GUSTI supaya dikèkké marang taler sing sanga setengah kuwi.

¹⁴Awit golongané taleré Rubèn lan golongané taleré turunané Gad wis pada nampa negara panduman, mengkono uga separo taler Manasé ya wis pada nampa panduman.

¹⁵Loro setengah taler kuwi wis pada nampa tanah panduman ing sabrangé laut Yordan ing sak tyedaké Yériko bawah wétan.”

¹⁶GUSTI ngetokké tembung menèh marang Moses:

¹⁷“Iki jenengé wong sing kudu pada ngedum tanah mau marang kowé kanggo tanah panduman, ya kuwi imam Eléazar lan Yosua anaké Nun.

¹⁸Uga menèh sangka saben taler ngangkat penggedéné siji sing mèlu ngedum tanah kuwi dadi tanah panduman.

¹⁹Iki jenengé wong-wong mau: sangka taler Yéhuda: Kalèb anaké Yéfuné;

²⁰sangka taler turunané Siméon: Samuèl anaké Amihud;

²¹sangka taler Bényamin: Elidad anaké Kislon;

²²sangka taler turunané Dan sakwijiné penggedéné: Buki anaké Yogli;

²³sangka turunané Yosèf, sing sangka taler turunané Manasé sakwijiné penggedéné: Hanièl anaké Efod;

²⁴lan sangka taler turunané Efraim sakwijiné penggedéné: Kemuèl anaké Siftan;

²⁵sangka taler turunané Sébulon sakwijiné penggedéné: Elisafan anaké Parnak;

²⁶sangka taler turunané Isakar sakwijiné penggedéné: Paltièl anaké Asan;

²⁷sangka taler turunané Asyèra sakwijiné penggedéné: Akihud, anaké Sélomi;

²⁸sangka taler turunané Naftali sakwijiné penggedéné: Pédaèl anaké Amihud.

²⁹Kuwi mau wong-wong sing pada dikarepké karo GUSTI ngedum tanah panduman marang wong Israèl ing negara Kanaan.”