Read Caribbean Javanese Itungan 4 Bible Online

Itungan 4 - Caribbean Javanese bible

Itungan 4

¹GUSTI ngetokké tembung marang Moses lan Harun:

²“Kowé pada ngitunga para turunané Kéhat lan dèwèkna sangka antarané para turunané Lévi, miturut turunané ing kulawargané.

³Itungen sing umur telung puluh taun munggah nganti tekan umur sèket taun, sak kabèhé wong sing kudu nandangi kuwajipan ngladèni ing Tarup Kumpulan.

⁴Sing dadi kuwajipané turunané Kéhat ing Tarup Kumpulan, ya kuwi: ngurus barang-barang sing Mahasutyi.

⁵Yèn budal sangka tarup, Harun lan para anaké terus pada mlebua perlu ngedunké geberé, terus digawé nutupi peti angger-angger,

⁶ing duwuré ditutupana lulangé iwak, ing duwuré menèh ditutup karo mori sing wungu tuwa, lan terus dipasang pikulané peti.

⁷Ing sak nduwuré méja kurban ditutupi karo mori wungu tuwa, terus ditata, piring uga tuwungé lan kendiné kurban kutyuran uga rotiné kurban ya kudu ajek ing kono.

⁸Ing nduwuré kuwi terus tutupen mori abang, terus nduwuré ditutupana lulangé iwak, sakwisé mengkono pasangen pikulané.

⁹Uga pada njupuka mori wungu tuwa digawé nutupi sikilané kandelaré, japit kanggo ngresiki dimar lan tadahané langes, uga sakkèhé wadah lenga sing kanggo keperluané kandelar kuwi.

¹⁰Sak pirantiné kabèh mau terus buntelen karo lulangé iwak, lan dèkèkna ing sak nduwuré sing kanggo ngusung.

¹¹Mesbèhé emas mori wungu tuwa, dikrukupana lulangé iwak, terus dipasang pikulané mesbèh kuwi.

¹²Uga menèh pada njupuka kabèh piranti sing kanggo ngladèni pangabekti ing omah sutyi, pada dibunteli karo mori wungu tuwa, lan tutupana lulangé iwak, terus dèkèkna ing sak nduwuré usungan.

¹³Awu ing mesbèh resikana, terus tutupana mori wungu nom,

¹⁴ing sak nduwuré ditumpangké sakkèhé piranti sing kanggo penggawéan ing mesbèh, ya kuwi: angklo, porek, lan sérok, bokor kanggo nyirami uga sakkèhé pirantiné mesbèh, terus tutupana lulangé iwak, sakwisé kuwi pasangen pikulané mesbèh.

¹⁵Sakwisé Harun lan para anaké rampung enggoné nutupi barang-barang lan sak kabèhé pirantiné omahé kabèh, yèn arep budalan, wong turunané Kéhat ijik kena mlebu perlu ngusungi barang-barang kuwi, nanging aja nganti nggepok samubarang sing sutyi kuwi, supaya aja nganti nemoni pati. Dadi kuwi barang-barang ing Tarup Kumpulan sing kudu diusung karo turunané Kéhat.

¹⁶Lan Eléazar anaké imam Harun, kuwajipané njaga lengané dimar, dupa wangi-wangian, kurban panganan sing ajek lan lenga jebati; uga kuwajipan njaga Tarup Sutyi lan sak isiné kabèh, ya kuwi barang-barang sing sutyi lan sak pirantiné kabèh.”

¹⁷GUSTI ngetokké tembung marang Moses lan Harun, tembungé:

¹⁸“Kulawargané lan turunané Kéhat kuwi kudu aja nganti entèk sangka sak tengahé wong Lévi.

¹⁹Supaya pada tetep urip lan ora nganti nemoni pati yèn maju nyedaki barang-barang sing Mahasutyi, kowé pada nandangana mengkéné; kanggo wong-wong mau: Harun lan anak-anaké pada mlebua lan mernahké wong turunané Kéhat mau, tyedak karo barang-barang sing kudu diusung.

²⁰Nanging aja ana wong Kéhat sing mlebu arep weruh barang-barang sutyi kuwi senajan mung sak kedèpé mripat, supaya aja nganti nemoni pati.”

²¹GUSTI ngetokké tembung marang Moses:

²²“Para turunané Gèrson ya uga diitung miturut kulawargané lan para turunané,

²³sing umur telung puluh taun munggah tekan umur sèket taun, itungen, ya saben wong sing kudu nandangi kuwajipan ngladèni ana Tarup Kumpulan.

²⁴Sing dadi kuwajipané turunané Gèrson enggoné ngladèni lan ngusung barang-barang kuwi mengkéné:

²⁵Pada ngusungi Tarup Sutyi lan Tarup Kumpulan, payoné lan rangkepané lulangé iwak ing duwuré, lan geberé lawangé Tarup Kumpulan,

²⁶geber-geberé plataran karo geberé gapura plataran ing sak ubengé Tarup Sutyi uga mesbèh, tali-taliné lan sak rupané piranti sing kanggo gawé; wong-wong kuwi pada nindakké kabèh kuwajipané sing gegandèngan karo kuwi kabèh.

²⁷Kuwajipané para turunané Gèrson, enggoné ngusungi barang-barang lan enggoné ngladèni, kabèh kuwi ditindakké miturut sing dadi préntahé Harun lan para anaké; pada kok dunungké apa sing dadi tanggung jawapé kanggo sembarang sing kudu diusung kuwi.

²⁸Kuwi mau sing dadi kuwajipané turunané Gèrson ing Tarup Kumpulan, lan enggoné pada nyambutgawé kuwi dipimpin karo Itamar anaké imam Harun.

²⁹Para wong Mérari itungen miturut turunané lan kulawargané,

³⁰sing umur telung puluh taun munggah nganti tekan umur sèket taun, kuwi itungen, ya kuwi saben wong sing kudu nandangi kuwajipan ngladèni ing Tarup Kumpulan.

³¹Sing dadi kuwajipané sing gegandèngan karo sakkèhé penggawéané ing Tarup Kumpulan: ngusungi balok-balok Tarup Sutyi, kayu palang-palangé, tyagak-tyagaké, umpaké,

³²tyagaké plataran mubeng, umpaké, patok-patoké lan tali-taliné, kabèh pirantiné; kuwi kabèh klebu kuwajipané. Nanging saben wong kudu didunungké tyarané nandangi kuwajipané nggawa barang-barang kuwi.

³³Kuwi mau kuwajipané turunané para turunané Mérari, ya kuwi sakkèhé penggawéané ing Tarup Kumpulan, sing dadi penggedéné Itamar, anaké imam Harun.”

³⁴Kaya mengkono Moses lan Harun lan para penggedéné umat Israèl enggoné pada ngitungi para turunané Kéhat miturut turunané ing kulawargané,

³⁵ya kuwi wong-wong sing umuré telung puluh taun munggah tekan umur sèket taun, sakkèhé wong sing kudu nandangi kuwajipan ngladèni ing Tarup Kumpulan.

³⁶Gunggungé sing diitung kuwi miturut turunané ana 2750 wong.

³⁷Semono okèhé tyatyahé wong turunané Kéhat, sing pada ngladèni ing Tarup Kumpulan, sing pada diitungi karo Moses lan Harun, miturut préntahé GUSTI lantaran Moses.

³⁸Para turunané Gèrson kuwi enggoné diitung miturut turunané ing kulawargané,

³⁹ya kuwi para wong sing umur telung puluh taun munggah tekan umur sèket taun, saben wong sing kudu nandangi kuwajipan ngladèni ing Tarup Kumpulan.

⁴⁰Dadi sing diitung miturut turunané lan kulawargané, gunggungé 2630 wong.

⁴¹Semono okèhé kuwi gunggungé turunané para turunané Gèrson, sing pada ngladèni ing Tarup Kumpulan, sing pada diitungi karo Moses lan Harun, miturut préntahé GUSTI.

⁴²Para turunané Mérari kuwi enggoné diitung miturut turunané lan kulawargané,

⁴³sing umur telung puluh taun munggah tekan umur sèket taun, saben wong sing kudu nandangi kuwajipan ngladèni ing Tarup Kumpulan,

⁴⁴dadi sing diitung miturut turunané, gunggungé 3200 wong.

⁴⁵Semono okèhé gunggungé turunané para turunané Mérari, sing pada ketulis karo Moses lan Harun, miturut préntahé GUSTI lantaran Moses.

⁴⁶Sakkèhé wong Lévi sing diitung karo Moses lan Harun karo para penggedéné Israèl miturut turunané lan kulawargané,

⁴⁷sing umur telung puluh taun tekan umur sèket taun, saben wong sing kudu nandangi kuwajipan ngladèni ing Tarup Kumpulan, lan ngusung barang-barang;

⁴⁸dadi sing ketulis, gunggungé 8580 wong.

⁴⁹Enggoné ngitungi kuwi awit sangka préntahé GUSTI lantaran Moses, saben wong pada dikèki tanggung jawap kanggo apa sing kudu ditandangi lan sing diangkati. Kaya mengkono enggoné diitung, miturut préntahé GUSTI lantaran Moses.