Read Caribbean Javanese Itungan 5 Bible Online

Itungan 5 - Caribbean Javanese bible

Itungan 5

¹GUSTI ngetokké tembung marang Moses:

²“Kowé mréntaha marang wong Israèl, supaya saben wong sing ngalami lara lépra, wong sing ngetokké dlèdèkan lan sing nggrajak getih, uga sing najis awit sangka layon, pada etokna sangka tarupé wong Israèl,

³lanang lan wadon pada etokna, ya kok etokna menyang ing sak njabané tarup, supaya aja nganti ndadèkké najisé tarupé sing Tak panggoni bareng karo umat-Ku.”

⁴Wong Israèl terus ya pada nglakoni kaya mengkono, wong-wong pada dietokké sangka tarupé wong Israèl; apa préntahé GUSTI marang Moses, kuwi digatèkké karo wong Israèl.

⁵GUSTI ngetokké tembung marang Moses:

⁶“Kowé mréntaha marang wong Israèl: Yèn ana wong lanang utawa wong wadon, nglakoni dosa marang sak pepadané, lan awit sangka kuwi ngowahi kasetiané marang GUSTI, nganti wong mau ngalami dosa,

⁷kuwi ngakonana dosané sing wis digawé, terus mbayara tebusané kabèh ditambahké sak pralimané, diwènèhké marang wong sing dèkné nindakké kesalahan.

⁸Nanging yèn wong kuwi wis ora nduwé sanak sedulur sing wajip nampani tebusané kesalahan mau, ing kono tebusan kesalahan sing kudu dibayar kuwi dadi duwèké GUSTI, lan dadi pandumané imam; kuwi durung mlebu wedus gèmbèl lanang rukunan sing dienggo nganakké rukunan kanggo wong mau.

⁹Kanggo pisungsung-pisungsungmu sutyi sing dipasrahké wong Israèl marang imam kuwi, pisungsungé spésial dadia pandumané imam.

¹⁰Nanging pisungsung sutyi, sing digawa karo wong, kuwi pandumané wong kuwi déwé; mung apa sing diwènèhké karo wong marang imam, kuwi dadi pandumané imam kuwi.”

¹¹GUSTI ngetokké tembung marang Moses:

¹²“Kowé omongana marang wong Israèl, pada omongana: Yèn ana bojoné wong sing laku ngiwa dadi ora setia marang sing lanang,

¹³awit wong wadon kuwi bédang turu karo wong lanang liyané, nanging bojoné ora ngerti, awit enggoné nggawé mlaku bédang awaké kuwi digawé reget, ora ana seksiné, malah ora konangan;

¹⁴yèn sing lanang terus kanggonan rohé jalusu, nganti ndakwa marang sing wadon, nanging wong wadon mau dasar nyata wis gawé regeté awaké, utawa yèn sing lanang rumangsa mèri, nganti ndakwa sing wadon, senajan sing wadon mau ora nggawé regeté awaké,

¹⁵ing kono wong lanang terus nggawa bojomu nang ngarepé imam. Wong kuwi kudu nggawa kurban awit sangka sing wadon kuwi, rupa glepung jewawut sak prasepuluhé éfa, aja karo diesoki lenga lan aja ditumpangi menyan, awit kuwi kurban panganan jalusu, ya kurban pengéling-éling marang kesalahané.

¹⁶Imam terus ngakonana wong wadon kuwi maju, digawa ing ngarepé GUSTI.

¹⁷Imam terus nggawaa banyu sutyi diwadahi gentong lemah, lan njupuka lebuné ing jogané Tarup Sutyi, dityemplungké ing banyu mau.

¹⁸Sakwisé wong wadon kuwi digawa ing ngarepé GUSTI, rambuté terus diudarana, èpèk-èpèké tumpangana kurban pengéling-éling, ya kuwi kurban panganan jalusu, nanging tangané imam didèkèki banyu pait sing nekakké bebendu.

¹⁹Wong wadon mau disumpah karo imam lan ngutyapké: Yèn nyata kowé ora bédang turu karo wong lanang liyané, lan ora laku ngiwa, awit kowé kuwi ing kwasané bojomu, kowé jujura yèn kowé ora mlaku bédang, kowé ora kena banyu pait sing nekakké bebendu iki;

²⁰nanging yèn kowé nyata laku bédang, nganti ndadèkké regetmu, awit bédang turu karo wong lanang liyané; nanging kowé kuwi ing kwasané bojomu,

²¹ing kono imam nyumpaha wong wadon mau karo sumpah bebendu, lan ngomonga marang wong wadon mau, mengkéné: Kowé didadèkké tadahé-sumpah bebendu karo GUSTI ing tengahé bangsamu, pupumu bakal dadi tyilik lan wetengmu dadi mlembung,

²²awit banyu sing nekakké bebendu iki bakal manggon ing awakmu, ndadèkké mlembungé wetengmu lan tyiliké pupumu. Wong wadon mau terus ngomonga: Amin, amin.

²³Imam terus nulisa bebendu kuwi mau ing kertas lan terus ngilangana tulisané kuwi karo banyu pait kuwi,

²⁴banyu pait sing nekakké kwalat kuwi terus diombèkké marang wong wadon mau, lan banyu kuwi bakal mlebu ing awaké lan njalari wong mau terus lara banget.

²⁵Imam terus njupuka kurbané panganan jalusu sangka tangané wong wadon mau, lan digoyang ing ngarepé GUSTI lan digawa menyang ing mesbèh.

²⁶Kurban panganan mau dijukuk sak gegem karo imam kanggo pisungsung pengéling-éling lan diobongi ing mesbèh, sakwisé mengkono banyuné terus diombèkké marang wong wadon kuwi.

²⁷Sakwisé mengkono, yèn wong wadon kuwi nyata reget lan ora setia marang bojoné, mesti terus kelakon banyu sing nekakké bebendu mau bakal manggon ing awaké, lan njalari lara banget, nganti wetengé dadi mlembung lan pupuné dadi tyilik. Sak terusé wong wadon kuwi bakal ngalami bebendu ing sak tengahé bangsané.

²⁸Nanging yèn wong wadon kuwi ora nggawé regeté awaké, nanging resik, mesti bakal ora kena bebendu lan bakal nduwé anak.”

²⁹Kaya mengkono pernatan kanggo jalusu, yèn ana wong wadon sing laku bédang lan nggawé regeté awaké, nanging ing kwasané bojoné,

³⁰utawa yèn wong lanang kanggonan rohé jalusu, nganti ndakwa bojoné mlaku bédang, sing wadon terus digawa marang ngarepé GUSTI lan imam nindakké pernatan kuwi kabèh marang wong wadon mau.

³¹Sing lanang bakal ora kesalahan, nanging sing wadon sing nanggung wohé kesalahané.