Read Caribbean Javanese Itungan 8 Bible Online

Itungan 8 - Caribbean Javanese bible

Itungan 8

¹GUSTI ngetokké tembung marang Moses:

²“Kowé ngomonga marang Harun: Yèn kowé masang dimar-dimar kuwi, dimaré pitu supaya bisa madangi ing ngarepé sikilé kandelar.”

³Harun ya terus nandangi mengkono. Dimaré pada dipasang madep ing ngarepé sikilé kandelar, kaya sing dadi préntahané GUSTI marang Moses mau.

⁴Dadiné penggawéné kandelar kuwi mengkéné: sing digawé emas gemblèngan; dadia sikilané utawa kenopé kembangané digawé sangka emas gemblèngan; miturut tyonto sing wis diduduhké karo GUSTI marang Moses, kaya mengkono penggawéné kandelar mau.

⁵GUSTI ngetokké tembung marang Moses:

⁶“Wong Lévi kuwi pada ajokna sangka tengahé wong Israèl lan pada sutyèkna.

⁷Nanging enggonmu nyutyèkké kuwi tyarané mengkéné: Pada kepyurna banyu ngresiki dosa; terus dityukur awaké sekujur lan pada kudu ngumbah sandangané, terus pada dadi sutyi.

⁸Sakwisé mengkono terus pada njupuka sapi lanang nom siji, karo kurbané panganan rupa glepung gandum pilihan, dityampur lenga, lan kowé njupuka sapi lanang nom siji engkas kanggo kurban ngluwari dosa.

⁹Wong Lévi terus ajokna menyang ngarepé Tarup Kumpulan; lan kowé ngomonga marang sak pasamuan wong Israèl kabèh supaya pada nglumpuk.

¹⁰Wong Lévi kuwi terus pada ajokna menyang ing ngarepé GUSTI, lan wong Israèl pada numpangké tangané ing sirahé wong Lévi kuwi;

¹¹uga wong Lévi kuwi pada digoyangké karo Harun dadi pisungsung goyangan ing ngarepé GUSTI sangka wong Israèl, supaya pada nindakké kuwajipané nglakoni kerjanané GUSTI.

¹²Sakwisé wong Lévi pada numpangké tangané ing endasé sapi-sapi nom mau, sing siji terus pasrahna dadi kurban ngluwari dosa lan sijiné kanggo kurban obongan ngadep marang GUSTI, digawé nganakké rukunan kanggo para wong Lévi mau.

¹³Wong Lévi terus kok kongkon maju ing ngarepé Harun lan ing ngarepé para anaké, lan kok goyangné dadi pisungsung goyangan ngadep marang GUSTI.

¹⁴Kaya mengkono enggonmu nyutyèkké para wong Lévi sangka tengahé wong Israèl, supaya pada dadia duwèk-Ku.

¹⁵Sakwisé mengkono wong Lévi kena mlebu nindakké penggawéan ing Tarup Kumpulan, ya kuwi yèn wis pada kok sutyèkké lan kok goyang dadi pisungsung goyangan.

¹⁶Awit kudu pada diajokké sak kabèhé marang Aku sangka sak tengahé wong Israèl; kanggo gantiné sembarang sing lair ndisik, ya gantiné sakkèhé anak mbarep wong Israèl, kuwi wis pada Tak jikuk kanggo Aku.

¹⁷Awit sembarang anak mbarepé wong Israèl kuwi duwèk-Ku, dadia manungsa utawa kéwan. Enggon-KU nyutyèké kuwi kabèh dadi duwèk-Ku kuwi nalikané Aku matèni sakkèhé para anak mbarep ing negara Egipte.

¹⁸Jalaran sangka kuwi wong Lévi pada Tak jikuk dadi gantiné sakkèhé sing mbarep ing sak tengahé wong Israèl,

¹⁹lan wong Lévi mau pada Tak pasrahaké sangka sak tengahé wong Israèl kanggo pawèhé marang Harun lan para anaké, supaya pada nindakké sakkèhé kerjanané wong Israèl ing Tarup Kumpulan, lan pada nganakké rukunan kanggo wong Israèl, supaya wong Israèl aja nganti kena bebendu yèn pada nyedaki marang omah sutyi-Ku.”

²⁰Nanging Moses lan Harun lan sak pasamuan wong Israèl kabèh terus pada nindakké mengkono marang para wong Lévi; uga wong Israèl ya pada nindakké tyotyok kaya sing dipréntahké karo GUSTI marang Moses kanggo wong Lévi.

²¹Wong Lévi pada ngresiki dosané lan ngumbah sandangané, terus pada digoyangké karo Harun dadi pisungsung goyangan ing ngarepé GUSTI; sakwisé mengkono Harun nganakké rukunan kanggo wong-wong mau supaya pada ngguwak najisé.

²²Sak rampungé kuwi wong Lévi pada mlebu, nindakké kerjanané ing Tarup Kumpulan, lan dipimpin Harun lan para anaké. Kaya sing wis dadi préntah GUSTI marang Moses gegandèngan karo wong Lévi, ya kaya mengkono sing ditindakké marang wong-wong mau.

²³GUSTI terus ngetokké tembung marang Moses, mengkéné:

²⁴“Iki pernatan kanggo wong Lévi: Saben wong sing umur selawé taun munggah kuwi kuwajipan nindakké penggawéan ngladèni ing Tarup Kumpulan,

²⁵nanging yèn wis nyandak umur sèket taun terus dililani mundur sangka enggoné ngladèni, wis ora perlu nglakoni kuwajipan menèh.

²⁶Ya dililani yèn mèlu ngréwangi para seduluré ing Tarup Kumpulan, mung waé wis ora perlu ngladèni déwé. Kaya mengkono sing dadi kuwajipané kanggo para wong Lévi.”