Read Caribbean Javanese Mika 5 Bible Online

Mika 5 - Caribbean Javanese bible

Mika 5

¹Nanging kowé, hé, Bètléhèm ing Efrata, senajan kowé klebu tyilik ing antarané turunané Yéhuda, sangka kowé bakal lair sing ngladèni marang Aku, ratu sing bakal ngwasani Israèl; sing wis ana wiwit ing jaman mbiyèn, wiwit ing jaman mbiyèn.

²Mulané bangsa kuwi mung arep dijarké waé nganti tekan waktuné, wong wadon sing pestiné nglairké anak wis kelakon nglairké, terus turahané para seduluré bakal pada bali ngantyani wong Israèl.

³Panjenengané bakal nandangi lan ngengon wong-wong mau karo nganggo pangwasané GUSTI, ya kaluhurané asmané GUSTI, Gusti Allahé; para wong bangsané bakal pada manggon karo tentrem, awit saiki Panjenengané kuwi dadi luhur nganti tekan pungkasané bumi;

⁴lan Panjenengané bakal dadi sing kanggonan katentreman. Yèn Asyur mlebu ing negara kita, lan mlaku ing negara kita, terus kita pada ngedekké pangon pitu sing nglawan, malah pemimpin manungsa wolu.

⁵Kuwi bakal pada nyukur negara Asyur karo pedang, lan negarané Nimrod karo pedang tanpa rangka, lan ratu bakal nylametaké kita sangka Asyur yèn dèwèké mlebu ing negara kita lan mlaku ing panggonané kita.

⁶Turahé Yakub bakal manggon ing antarané bangsa okèh, kaya ebun sangka GUSTI, kaya nètèsé udan ing tetukulan, sing ora njagakké marang wong, lan ora ngarep-arep marang anak-anaké manungsa.

⁷Uga turahé Yakub kuwi bakal ing antarané para taleré bangsa, lan ing tengahé para bangsa okèh, kaya singa ing antarané kéwan galak alasan, kaya singa nom ing tengahé kumpulan wedus gèmbèl; menyanga ngendi waé parané, mbanting lan nubruk, lan ora ana sing bisa nylametaké.

⁸Tanganmu bakal ngungkuli para lawanmu, lan sak kabèhé mungsuhmu bakal dientèkké.

⁹Tembungé GUSTI: Dina kuwi bakal kelakon, Aku bakal ngentèkké jaranmu sangka tengahmu, lan bakal ngrusak krétamu.

¹⁰Aku bakal ngentèkké kuta-kutané negaramu, lan bèntèngmu bakal pada Tak gempuri.

¹¹Aku bakal ngentèkké pirantimu sulap, lan tukang tenung bakal ora ana menèh ing tengahmu.

¹²Mengkono menèh retya-retyamu, uga tugu-tugu brahalamu bakal Tak gempuri sangka tengahmu, nganti kowé bakal ora sujut menèh marang gawèané tanganmu.

¹³Uga tyagak-tyagaké brahala bakal Tak jeboli sangka tengahmu, lan brahalamu bakal Tak entèkké.

¹⁴Ngertia para bangsa sing ora nggatèkké tembung-Ku, bakal Tak wales karo bebendu lan nesu-Ku.