Read Caribbean Javanese Nahum 1 Bible Online

Nahum 1 - Caribbean Javanese bible

Nahum 1

¹Tembungé Gusti kanggo Ninewé. Kitab bab wahyu sing Nahum weruh, wong Elkos.

²GUSTI kuwi Gusti Allah sing jalusu lan mbales, GUSTI kuwi mbales lan nesuné sing mulat-mulat, GUSTI ngekèki balesan marang para mungsuhé, lan terus waé nesuné marang para mungsuhé.

³GUSTI kuwi gedé sabaré lan gedé pangwasané, nanging ora pisan-pisan wong sing salah utyul sangka paukumané. Panjenengané mlaku ing sak njeruhné lésus lan prahara, lan mendung kuwi lebuné sikilé.

⁴Segara dinesoni nganti dadi asat, lan sak kabèhé kali pada didadèkké garing, Basan lan Karmèl pada dadi gloyoran tetukulan ing Libanon pada alum.

⁵Gunung-gunung pada gemeter ing ngarepé, lan puntuk-puntuk pada lèlèh. Bumi dadi sepi mamring ing ngarepé uga ndonya lan sing pada ngenggoni kabèh.

⁶Sapa sing kuwat nadahi nesuné? Lan sapa sing bisa tetep ngadek jejek yèn mulat-mulat nesuné? Nesu-Né disokké kaya geni, lan gunung watu nganti pada ambruk.

⁷GUSTI kuwi kebak katrésnan, dadi panggonan pangungsèn ing dina kangèlan; Panjenengané mangertèni marang para wong sing ngungsi marang Panjenengané.

⁸Nanging karo banjir gedé Panjenengané ngentèkké panggonané mungsuh. Lan matèni nganti tyutes wong sing pada nglawan Panjenengané, digiring lan dilungké marang pepeteng.

⁹Apa karepmu nglawan marang GUSTI kuwi? Panjenengané bakal ngentèkké babar pisan; para mungsuhé ora bakal bisa ngadek menèh.

¹⁰Awit wong-wong kuwi bakal entèk kaya eri sing bulet-buletan, bakal dipangan nganti entèk kaya damèn sing garing.

¹¹Sangka kowé apa ora njedul wong sing ngrantyam-ngrantyam sing ala nglawan marang GUSTI, lan sing ngekèki pitutur tindak dursila, ta?

¹²Mengkéné tembungé GUSTI: “Senajan wong-wong kuwi wutuh lan okèh banget tyatyahé, senajan mengkono bakal pada entèk dibabat lan mati. Senajan Aku wis ngasorké Yéhuda, nanging kowé ora bakal Tak asoraké menèh.

¹³Saiki Aku bakal nugel pasangané sing ngebot-eboti kowé, lan Aku bakal medoti tali-tali sing mbanda kowé.”

¹⁴Kanggo kowé ratuné Asyur, GUSTI ngomong mengkéné: “Ora ana turunan sing bakal nganggo jenengmu menèh; sak kabèhé retyamu ukiranmu lan tyitakan bakal pada Tak entèkké sangka panggonané allahmu. Aku bakal nyawiské kuburanmu, awit kowé kuwi asor.”

¹⁵Delengen! Ing gunung-gunung ana wong sing mlaku lan nggawa kabar, sing ngabarké kabar katentreman. Hé Yéhuda, dinamu gedé riyayakna, janjimu tetepana! Awit wong dursila ora bakal teka lan nyerang marang kowé menèh; awit wis dientèkké babar pisan!