Read Caribbean Javanese Nahum 2 Bible Online

Nahum 2 - Caribbean Javanese bible

Nahum 2

¹Lah, ana tukang pengrusak sing nekani kowé, nganakna penjagan ing bèntèng ngungaka ing dalan, bangkèkanmu sabukana sing kentyeng, nglumpukna sak kabèhé kekuwatan!

²GUSTI mulihké menèh kaluhurané Yakub, kaya kaluhurané Israèl, awit wis dirusak karo tukang pengrusak pangé wis pada disempalké.

³Tamèngé para pahlawané rupané abang, para suradaduné pada nganggo abang-abang, krétané nggilap murup kaya geni ontyor ing dina enggoné dirakit, jaran-jarané pada kétok njingrak-jingkrak.

⁴Krétané mbalap ing dalan, susul-susulan ing lapangan, kétoké kaya ontyor, playuné kaya klélap.

⁵Penggedéné suradadu dibudalké, sikilé mèh kejengklok waktu ijik maju. Mblayoni bèntèngé kuta karo kesusu, lan piranti kanggo njebol wis didekké.

⁶Gapura-gapurané kali-kali wis pada mbukak, lan kratoné terus gempur.

⁷Ninewé kaya ratu wadon, digawa metu lan diblèjèti, lan para baturé wadon pada nangis kaya ndengkuré manuk dara, karo ngantem-ngantem dada.

⁸Ninewé déwé kuwi kaya blumbang sing banyuné mili metu. Ana wong sing mbengok: “Mandeka, mandeka!” Nanging ora ana sing nolèh.

⁹Pada ngrebuta slaka, ngrebuta emas, awit tanpa itungan simpenané banda, piranti-piranti sing apik okèhé ora karuan.

¹⁰Wis ludes, pandes, nandes! Ati nglokro, dengkul oklak-aklik, wetengé gemeter kabèh, praupané wong kabèh pada putyet tanpa getih.

¹¹Ing ngendi ta pandelikané singa lan guwané singa-singa nom, panggonané singa lan singa wédok klinteran, panggoné anak singa, sing ora diganggu-gawé karo wong?

¹²Singa kuwi lumrahé ndekep kanggo nyukupi pangané anak-anaké, lan nekek memangsané kanggo sing wadon, lan ngebaki guwané karo pangan lan pandelikané karo dekepané.

¹³Tembungé GUSTI sing ngwasani langit lan bumi: “Aku bakal nglawan marang kowé, Ninewé, terus sak kabèhé krétamu bakal Tak obong nganti dadi kebul, lan singamu nom bakal pada dipangan karo pedang nganti entèk; lan memangsamu bakal Tak entèkké sangka bumi, swarané para kongkonanmu bakal ora krungu menèh.”