Read Caribbean Javanese Nahum 3 Bible Online

Nahum 3 - Caribbean Javanese bible

Nahum 3

¹Tyilaka kuta sing ngutahké getih kuwi! Samubarang kabèh mung goroh tok, lan kebak rebut-rebutan barang rayahan, lan ora lèrèn-lèrèn enggoné ndekep.

²Rungokna tyemetiné petyut lan gemblèdèké glindingan, rungokna playuné jaran sing pating ketoplak lan gembrejeké kréta-krétané!

³Suradaduné jaran nyerang pedangé tyemlèrèt lan tumbaké gemebyar! Akèh sing pada mati, layon tumpuk-undung, tanpa itungan tyatyahé layon, wong-wong nganti pada kesandung karo layon!

⁴Kuwi kabèh awit sangka akèhé laku bédang sing ditindakké karo wong wadon lonté, sing apik rupané lan pinter nyulap, sing mblingerké bangsa-bangsa karo enggoné laku bédang, lan taler-taleré karo pinter sulapané.

⁵Tembungé GUSTI sing ngwasani langit lan bumi: “Aku bakal ngukum kowé, pojoké putyuk morimu bakal Tak bukaké nganti tekan ing praupanmu, lan bakal nduduhké wewadimu marang bangsa-bangsa, lan kewiranganmu marang kraton-kraton.

⁶Aku bakal ngebyuki regetan marang kowé, kowé bakal Tak anggep ora kajèn lan Tak dadèkké tontonan.”

⁷Terus sak kabèhé wong sing weruh kowé, bakal mlayu ninggal kowé, karo ngomong: “Ninewé wis rusak! Sapa sing mesakké marang dèwèké? Sangka ngendi enggonku olèh juru panglipur kanggo kowé?”

⁸Apa kowé ngungkuli karo Tebe, kutané retya Amon, sing sak tyedaké kali Nil sing diubengi karo banyu, sing bèntèngé segara, lan bèntèngé banyu?

⁹Etiopia kuwi dadi sumberé kekuwatané, uga Egipte, karo tanpa wates; wong Put lan para wong Libia pada dadi abdiné.

¹⁰Nanging kuwi déwé uga kepeksa dilungakké menyang ing pembuwangan, kepeksa pada mlebu ing tawanan. Bayi-bayiné pada dikeplèkké ing pojoké sak kabèhé sak uruté dalan, para wong sing kajèn pada dilotré, lan para penggedéné pada dibanda kabèh nganggo ranté.

¹¹Kowé uga bakal mendem, lan bakal pada tanpa kekuwatan; kowé uga bakal nggolèki panggonan pangungsèn awit sangka anané mungsuh.

¹²Sak kabèhé bèntèngmu kuwi kaya wit anjir sing wohé mateng dadakan; yèn dierok, wohé nibani tutuké wong sing arep mangan.

¹³Lah, suradadu ing sak tengahmu kuwi wadon-wadon; mungsuhmu pada kebukaan gapurané negaramu, sloroké pada dipangan karo geni nganti entèk.

¹⁴Pada ngangsua banyu, kanggo tyepakan yèn dikepung, bèntèngmu pada kuwatana! Ngidaka blétokan, ngidaka lempung, njikuka tyitakan bata!

¹⁵Kowé bakal entèk dipangan karo geni ing kana, bakal dientèkké karo pedang, sing mangan kowé kaya walang gragas. Senajan tyatyahmu okèh kaya walang gragas, lan kaya walang gragas,

¹⁶senajan wongmu dagang kok dadèkké okèh ngungkuli lintang-lintang ing langit pisan, wong-wong kuwi bakal pada kaya walang sing megarké swiwiné terus mabur bablas.

¹⁷Senajan para pemimpinmu tyatyahé kaya walang lan para pegawému kaya walang grombolan sing pada méntylok ing témbok-témbok ing waktu adem, nanging bareng srengéngé njedul, terus pada ngilang, ora ngerti panggonané.

¹⁸Hé, ratu ing negara Asyur, tyilaka kowé! Para pangonmu wis pada turu kepati! Para pengarepmu pada keturon, rayatmu pada pating slebar ing gunung-gunung, lan ora ana sing nglumpukké.

¹⁹Tyirimu kuwi ora ana tambané, lan tatumu wis ora bisa waras, sak kabèhé wong sing krungu bab kahananmu, pada keplok-keplok awit sangka kowé kuwi, awit sapa waé sing ora katekan karo penggawé alamu terus-terusan?