Read Caribbean Javanese Sakaria 11 Bible Online

Sakaria 11 - Caribbean Javanese bible

Sakaria 11

¹Hé Libanon, gapuramu pada bukaken, supaya witmu tyemara pada dipangan geni.

²Hé wit sanobar, pada nangis, awit wité tyemara wis pada ambruk, wit sing ngidap-idapi wis pada dirusak. Hé, wit élon ing Basan, pada ngaduh-aduha, awit alasé wis rata.

³Rungokna, para pangon pada sambata, awit sing dadi kesenengané wis dirusak. Rungokna, singa-singa pada nggeruh, awit apiké laut Yordan wis ilang.

⁴Tembungé GUSTI, Gusti Allahku mengkéné: “Kowé ngengona kumpulan wedus gèmbèl sing dibelèh kuwi.

⁵Wong sing tuku pada mbelèh lan ora rumangsa salah, nanging sing ngedol pada ngomong: Pinujia GUSTI! Aku wis dadi sugih! Nanging para pangoné déwé ora pada welas.

⁶Awit Aku ora bakal ngéman menèh marang para wong isiné bumi, mengkono tembungé GUSTI, nanging wong kuwi siji-sijiné Tak pasrahké ing tangané sak pada-pada lan ing tangané ratuné; iki bakal pada ngentèkké bumi lan wong siji-sijia ora ana sing Tak luwari sangka tengahé wong kuwi mau.”

⁷Kumpulan wedus gèmbèl sing dibelèh kuwi bakal Tak engon, kanggo para pedagang wedus lan aku njupuk teken loro: Sing siji Tak jenengké “Nyenengké”, sijiné: “Nyawiji”; aku terus ngengon wedus-wedusé kuwi.

⁸Sak njeruhné sesasi aku matèni pangoné telu. Awit atiku terus mangkel banget marang dèkné lan dèkné ya pada jelèh marang aku.

⁹Ing kono omongku: “Aku emoh, ngengon kowé menèh, sing arep mati, bèn mati, sing arep ilang, bèn ilang lan sing ijik kèri kuwi, bèn pada pangan-panganan dagingé.”

¹⁰Tekenku sing jenengé “Nyenengké” tak jupuk, tak tugel, kanggo mbatalké perjanjian sing tak anakaké karo sak kabèhé bangsa.

¹¹Dadiné ing dina kuwi perjanjian wis batal, nganti wong sing pada dagang wedus sing ijik nggatèkké aku kuwi pada ngerti, yèn kuwi tembungé GUSTI.

¹²Aku terus ngomong marang wong-wong mau: “Yèn kuwi kok anggep betyik, aku wènèhana upahé lan yèn ora, ya wis.” Terus aku ditimbangké duwit telung puluh sèkel slaka kanggo upahku.

¹³Nanging GUSTI ngomong marang aku: “Kuwi dipasrahké marang tukang ngetyor logam!”[4] Semono setitiké enggoné ngregani kanggo aku. Mulané duwit slaka telung puluh sèkel kuwi mau terus tak jupuk, terus tak pasrahké marang tukang ngetyor logam ing griyané GUSTI.

¹⁴Sakwisé mengkono tekenku sijiné ya kuwi sing jenengé “Nyawiji”, tak tugel kanggo medot sedulurané Yéhuda lan Israèl.

¹⁵Sakwisé mengkono tembungé GUSTI marang aku mengkéné: “Kowé sepisan engkas dadia kaya-kaya pangon sing goblok!

¹⁶Awit Aku bakal nangèkké pangon ing negara kéné, sing ora ngéman wedus gèmbèl sing ilang, ora nggolèki sing kesasar, ora nambani sing ketaton, ora ngrumati sing waras, malah sing lemu-lemu dipangan dagingé lan njabuti tratyaké.

¹⁷Tyilaka pangon sing ora ana gunané, sing ninggal wedus-wedusé! Tangan tengené dibabat lan mripaté tengen dityungkil karo pedang! Garinga banget lengené lan mripaté sing tengen dadia lamur banget!”