Read Caribbean Javanese Sakaria 12 Bible Online

Sakaria 12 - Caribbean Javanese bible

Sakaria 12

¹Utyapané Gusti. Tembungé GUSTI sing dipréntahké kanggo Israèl: Tembungé GUSTI sing njèrèng langit lan sing nelesi bumi lan sing nggawé roh ing sak njeruhné manungsa:

²“Yérusalèm Tak dadèkké bokor ngombé sing mendemi kanggo sak kabèhé bangsa ing sak ubengé lan Yéhuda bakal ngrasakaké susah yèn Yérusalèm dikepung.

³Ing waktu kuwi Yérusalèm bakal Tak dadèkké watu sing diangkat kanggo sak kabèhé bangsa. Sapa waé sing ngangkat mesti banget enggoné ngalami tatu. Lan sak kabèhé bangsa ing bumi bakal pada nglumpuk nglawan marang Yérusalèm mau.

⁴Ing waktu kuwi, mengkono tembungé GUSTI Aku bakal nggawé bingungé sak kabèhé jaran lan sak kabèhé wong sing numpaki pada dadi édan, nanging kanggo para turunané Yéhuda, Aku bakal melèké mripat-Ku, nanging jarané bangsa liya bakal Tak dadèkké pityekké.”

⁵Sakwisé mengkono para turunané ing Yéhuda bakal pada ngomong mengkéné: Wong isiné Yérusalèm kuwi pada kanggonan kekuwatan awit sangka GUSTI sing ngwasani langit lan bumi, kuwi Gusti Allahé.

⁶Ing waktu kuwi para turunané Yéhuda pada Tak dadèkké kaya anglo isi geni ing sak tengahé tumpukan kayu lan kayu ontyor sing murup ing sak tengahé bentèlan gandum; sak nalika geni loro-loroné kuwi nylomot ngiwa nengen marang sak kabèhé bangsa ing sak ubengé, nanging Yérusalèm tetep ing panggonané mbiyèn.

⁷Tarupé Yéhuda bakal pada dipitulungi ndisik karo GUSTI, supaya turunané Daved lan para wong isiné Yérusalèm aja banget-banget enggoné pada ngegul-ngegulké Yéhuda.

⁸Ing waktu kuwi GUSTI bakal ngayomi marang para isiné Yérusalèm, uga tunggalé sing kejengklok bakal dadi kaya Daved lan brayaté Daved bakal pada dadi kaya Gusti Allah, kaya Mulékaté GUSTI, sing dadi pengarepé.

⁹Uga ing dina kuwi Aku ngupaya matèni sak kabèhé bangsa sing maju perang marang Yérusalèm.

¹⁰ “Aku bakal ngesokké rohé kawelasan lan rohé penjaluk marang brayaté Daved lan para wong isiné Yérusalèm, terus kuwi bakal pada mandeng marang sing wis ketumbak déwé lan bakal nangisi sing disuduk mau, tyarané kaya nangisi anak sing ora ana tunggalé lan nangis kelara-lara, tyarané kaya nangisi anak mbarep.

¹¹Ing waktu kuwi petangisan ing Yérusalèm bakal kaya tangisé Hadad-Rimon ing legokan Megido.

¹²Wong sak negara bakal pada nganakké petangisan, saben sak brayat déwé, sak golongané turunané Daved déwé lan bojoné ya déwé; sak golongané turunané Natan déwé, lan bojoné ya déwé;

¹³turunané Lèwi déwé, lan bojoné ya déwé; turunané Simèi déwé, lan bojoné ya déwé;

¹⁴mengkono uga golongan liyané saben turunané déwé lan bojoné ya déwé.”