Read Caribbean Javanese Sakaria 2 Bible Online

Sakaria 2 - Caribbean Javanese bible

Sakaria 2

¹Aku terus ndangak lan weruh, ana wong lanang sing nyekel tali ukuran,

²Aku terus takon: “Panjenengan lunga menyang ngendi?” Semauré: “Arep ngukur Yérusalèm, kepéngin weruh pira ambané lan pira dawané.”

³Nanging mulékat sing omongan karo aku kuwi terus maju, terus ana mulékat liyané sing nyedaki,

⁴kuwi dipréntahké mengkéné: “Mblayua, wong nom ing kana kaé omongana: Yérusalèm bakal tetep kaya kuta sing kebukak tanpa bèntèng, awit sangka okèhé manungsa lan kéwan ing njeruhné.

⁵Lan Aku déwé, mengkono tembungé GUSTI, bakal dadi bèntèng geni ing sak ubengé, uga dadi kamulyan ing njeruhné.”

⁶Hayuk, hayuk ta! Pada mlayua sangka Negara lor, - mengkono tembungé GUSTI, - awit kowé pada Tak buyaraké ing kéblat papat, - mengkono tembungé GUSTI. -

⁷Hayuk, mblayua menyang Sion, hé, wong sing pada manggon ing Babèl!

⁸Awit tembungé GUSTI sing ngwasani langit lan bumi, ing sak njeruhné kamulyané wis ngutus aku gegandèngan karo para bangsa sing wis ngrampasi kowé, - awit sapa sing nggepok kowé dadi pada nggepok irengé mripaté Panjenengané. -

⁹“Tenan Aku bakal ngobat-ngabétké tangan-Ku marang para wong kuwi, lan terus pada dadi bandangané para wong sing mbiyèn dikwasani.” Terus kowé bakal pada weruh yèn GUSTI sing ngwasani langit lan bumi kuwi sing ngutus aku.

¹⁰“Hé putriné Sion! Pada surak-suraka lan bungah-bungaha, awit Aku teka lan manggon ing tengahmu, mengkono tembungé GUSTI.

¹¹Ing waktu kuwi okèh para umat sing bakal pada gembruduk mèlu sujut marang GUSTI lan manggon dadi umat-Ku, lan Aku bakal manggon ing tengahmu.” Mulané kowé pada ngerti yèn GUSTI sing ngutus aku.

¹²Ing kono Yéhuda bakal dijukuk karo GUSTI dadi duwèké ing negara sing sutyi, lan Yérusalèm bakal dipilih uga.

¹³Hé sak kabèhé sing urip! Pada menenga ing ngarepé GUSTI, awit wis gelem ngadek sangka omahé sing sutyi.