Read Caribbean Javanese Sakaria 4 Bible Online

Sakaria 4 - Caribbean Javanese bible

Sakaria 4

¹Mulékat sing ngomong karo aku mau, teka menèh, terus ngomong marang aku kaya nggugah wong ijik turu.

²Tembungé marang aku: “Kowé weruh apa?” Semaurku: “Kula weruh kandelar emas, wadahé lenga ing pérangan nduwur. Kandelar kuwi ana dimar pitu lan ing nduwuré ana sumbuné pitu;

³uga ana menèh wit saitun loro, siji ing tengené wadah lenga, sijiné ing kiwané.”

⁴Aku terus ngomong, takon marang mulékat sing omongan karo aku mengkéné: “Duh bendara, kuwi tegesé kepriyé?”

⁵Mulékat sing omongan karo aku kuwi terus takon: “Kowé apa ora ngerti tegesé kabèh kuwi?” Omonganku: “Ora ngerti, bendara!”

⁶Panjenengané terus ngomong: “Iki tembungé GUSTI marang Sérubabèl: ora karo gagahé lan ora karo kekuwatan, nanging awit karo Roh-Ku. Mengkono tembungé GUSTI sing ngwasani langit lan bumi.

⁷Hé, gunung sing gedé, kowé kuwi sapa? Ing ngarepé Sérubabèl kowé bakal dadi tanah rata lan Sérubabèl bakal ngangkat watu sing pisanan lan wong pada surak-surak: Diberkahi! Diberkahi wongé!”

⁸Terus ana tembungé GUSTI marang aku mengkéné:

⁹“Tangané Sérubabèl wis ndasari griya iki, ya tangané kuwi uga sing bakal ngrampungké, nganti kowé bakal weruh, yèn GUSTI sing ngwasani langit lan bumi sing ngutus aku nemoni kowé.

¹⁰Awit sapa sing ngrèmèhké marang dina kelakoné perkara-perkara sing sepélé kuwi bakal pada bungah-bungah weruh watu pilihan ing tangané Sérubabèl. Sing pitu iki mripaté GUSTI sing ndlajahi sak lumahé bumi.”

¹¹Aku terus ngomong takon mengkéné: “Tegesé wit saitun loro ing tengen lan ing kiwané kandelar kuwi, apa tegesé?”

¹²Aku terus ngomong menèh: “Tegesé pangé wit saitun loro sandingé sumbu emas loro sing ngilèkké dlèdèkan emas sangka nduwuré, kuwi apa tegesé?”

¹³Aku terus diomongi mengkéné: “Kowé apa ora weruh tegesé kuwi?” Semaurku: “Ora ngerti, bendara!”

¹⁴Panjenengané terus ngomong: “Iki wong loro sing dijebatani lan sing ngadek ing ngarepé Gusti sak lumahé bumi!”