Read Caribbean Javanese Sakaria 5 Bible Online

Sakaria 5 - Caribbean Javanese bible

Sakaria 5

¹Aku nolèh terus ndangak, aku weruh ana gulungan kitab ngléyang.

²Aku terus diomongi mengkéné: “Kowé weruh apa?” Omonganku: “Kula weruh ana kitab gulungan ngléyang, dawané rong puluh éluh lan ambané sepuluh éluh.”

³Terus aku diomongi menèh, mengkéné: “Kuwi sumpah bebendu sing nyerang ing sak ratané negara kabèh; awit miturut isiné sumpah bebendu kuwi, saben maling ing kéné ijik bébas sangka paukuman, mengkono uga saben wong sing ngetokké sumpah palsu ya ijik bébas sangka paukuman.[1]

⁴‘Aku sing ngongkon bebendu kuwi’, mengkono tembungé GUSTI Gustiné sing ngwasani langit lan bumi, supaya kuwi mlebu ing omahé maling lan ing omahé wong sing ngetokké sumpah palsu nganggo asma-Ku, lan bakal nginep ing omahé kono lan bakal ndadèkké rusaké, dadia kayuné utawa watu-watuné.”

⁵Mulékat sing omongi karo aku mau teka menèh, lan ngongkon marang aku: “Kowé ngematna lan nitènana apa sing njedul ing kono?”

⁶Aku terus takon: “Apa kuwi?” Tembungé mulékat: “Sing kétok kuwi baril.” Terus ngomong menèh: “Kuwi penggawé alané wong-wong mau ing sak kabèhé negara!”

⁷Delengen, tutupé timah baril kuwi wis diangkat, lan ing njeruhné ana wong wadon sing lungguh.

⁸Tembungé mulékat mau: “Kuwi tindak dursila!” Wong wadon kuwi terus dijongkroké menèh ing barilé, lan tutupé timah kebanting ing nduwuré baril.

⁹Aku terus ndangak lan weruh, ana wong wadon loro sing swiwiné keterak karo angin; swiwiné mau kaya swiwiné manuk ooievaar. Barilé terus diangkat mumbul karo wong loro kuwi ing antarané bumi karo langit.

¹⁰Aku terus njaluk ngerti marang mulékat sing omongan karo aku, mengkéné: “Baril kuwi digawa menyang ngendi?”

¹¹Semauré mulékat: “Menyang ing negara Sinear[2], wong wadon kuwi arep digawèkké omah ing kana; yèn wis dadi, wong wadon mau terus dipapanaké ing omah kono.”