Read Caribbean Javanese Sakaria 9 Bible Online

Sakaria 9 - Caribbean Javanese bible

Sakaria 9

¹ Utyapané Gusti Allah. Ana nubuaté GUSTI marang aku, kanggo negara Hadrak lan kuta Damaskus. Awit mripaté GUSTI ana ning kuta-kuta ing Aram lan sak kabèhé taleré Israèl,

²uga Hamat, sing adu wates karo Damaskus mau, lan Tirus karo Sidon, senajan kuwi pada wityaksana banget.

³Senajan Tirus kuwi nggawé témbok bèntèng lan numpuk slaka nganti kaya lebu, uga emas nganti kaya blétokan ing dalan.

⁴Nanging Tirus bakal didadèkké mlarat karo Gusti lan kekuwatané bakal dijeguraké ing segara lan kuta kuwi déwé bakal entèk dipangan karo geni.

⁵Askélon bakal weruh nganti wedi; uga Gaza, terus luwih banget gemeteré; Ekron ya semono uga, awit pengarep-arepé ora katekan. Ratuné Gaza bakal dientèkké, lan Askélon bakal dadi suwung.

⁶Asdod bakal dienggoni karo keturunan tyampuran, lan sing digolgolaké wong Filistèn bakal Tak entèkké.

⁷Aku bakal ngguwak getih ing tutuké lan panganan liyané sing njijiki, lan turahé bakal dadi duwèké Gusti Allah kita, lan bakal dianggep kaya sakwijiné turunané Yéhuda; lan wong Ekron dadi sak pepadané wong Yébus.

⁸Aku bakal lèrèn ing sak tyedaké negara-Ku, perlu njaga wong sing pada liwat mlebu metu ing kono. Bakal ora ana wong sing nindes menèh sing nekani, awit saiki Aku déwé sing ngewaské.

⁹Hé putri Sion, surak-suraka sing banter; hé putri Yérusalèm, surak-suraka! Ratumu nekani kowé; Panjenengané kuwi adil lan menang, andap asor atiné, numpak kimar, kimar lanang nom.

¹⁰Kuwi bakal matèni sak kabèhé kréta perangé Efraim lan sak kabèhé jarané Yérusalèm, uga gendéwané perang bakal dientèkké. Sak terusé ratu kuwi bakal ngabaraké bab katentreman marang para bangsa. Panggonan pangwasané kuwi jembar wiwit sangka segara tekan ing segara lan sangka kali Efrat tekan ing pojok-pojokané bumi.

¹¹Kanggo kowé, awit sangka getih perjanjian-Ku karo kowé, Aku bakal ngetokké wongmu ing paukuman sangka juglangan sing ora ana banyuné.

¹²Hé para wong paukuman sing kebak karo pengarep-arep, pada muliha menyang ing sak njeruhné bèntèngmu! Ing dina iki uga kowé pada Tak wènèhi weruh: Kowé bakal Tak wènèhi ijolan tikel pindo.

¹³Awit Yéhuda Tak pentang kanggo gendéwané, lan Tak isèni Efraim kanggo panahé; uga, hé Sion, anak-anakmu bakal Tak obong supaya nglawan para anakmu, hé Yunani, lan kowé Tak dadèkké kaya pedangé pahlawan.

¹⁴GUSTI bakal ngétok marang umaté, panahé bakal dityulké kaya klélap. Lan Gusti Allah bakal terus ngunèkké trompèt lan lunga maju ing sak njeruhné lésus sing sangka kidul.

¹⁵GUSTI sing ngwasani langit lan bumi bakal ngayomi umaté, nganti kuwi bakal ngentèkké lan ngidak-idak watu-watu bandil. Bakal pada ngombé getih mungsuhé kaya anggur, lan pada dadi kebak kaya bokor siraman, kaya pojok-pojoké mesbèh.

¹⁶Ing dina kuwi bakal pada dikèki keslametan karo GUSTI, Gusti Allahé, awit pada dadi kaya kumpulané umaté, lan bakal pada dadi kaya inten mripaté makuta sing pating glebyar, kaya mengkono kahanané ing tanahé.

¹⁷Tenan kahanané luwih gedé lan apik! Para nom-nomané pada subur tukulé awit sangka gandum lan prawané awit sangka anggur anyar.