Read Caribbean Javanese Matius 1 Bible Online

Matius 1 - Caribbean Javanese bible

Matius 1

¹Iki kitab tyatetan turunané Yésus Kristus, tyedak turunané Daved, tyedak turunané Abraham.

²Abraham nduwé anak Isak, Isak nduwé anak Yakub, Yakub nduwé anak Yéhuda lan sedulur-seduluré,

³Yéhuda nduwé anak Pèrès lan Serah, patutan sangka Tamar; Pèrès nduwé anak Hézron, Hézron nduwé anak Ram;

⁴Ram nduwé anak Aminadab, Aminadab nduwé anak Nahason, Nahason nduwé anak Salmon;

⁵Salmon nduwé anak Boas patutan sangka Rahab; Boas nduwé anak Obèd patutan sangka Rut; Obèd nduwé anak Isai,

⁶Isai nduwé anak Daved, Daved nduwé anak Salomo, patutan sangka tilas bojoné Uria,

⁷Salomo nduwé anak Réhabéam, Réhabéam nduwé anak Abia, Abia nduwé anak Asa,

⁸Asa nduwé anak Yosafat, Yosafat nduwé anak Yoram, Yoram nduwé anak Uzia;

⁹Uzia nduwé anak Yotam, Yotam nduwé anak Akas, Akas nduwé anak Hiskia;

¹⁰Hiskia nduwé anak Manasé, Manasé nduwé anak Amon, Amon nduwé anak Yosia;

¹¹Yosia nduwé anak Yékonya lan sedulur-duluré, waktu jaman pembuwangan menyang Babèl.

¹²Sakwisé, jaman pembuwangan menyang Babèl, Yékonya nduwé anak Séaltièl, Séaltièl nduwé anak Sérubabèl,

¹³Sérubabèl nduwé anak Abihud, Abihud nduwé anak Elyakim, Elyakim nduwé anak Asor;

¹⁴Asor nduwé anak Sadok, Sadok nduwé anak Akim, Akim nduwé anak Eliud;

¹⁵Eliud nduwé anak Elièsar, Elièsar nduwé anak Matan, Matan nduwé anak Yakub;

¹⁶Yakub nduwé anak Yosèf bojoné Maria, nglairké Yésus, sing disebut Kristus.

¹⁷Dadi kabèhé sangka Abraham tekan Daved kuwi ana patbelas turunan, sangka Daved tekan jaman pembuwangan menyang Babèl ana patbelas turunan lan sangka jaman pembuwangan menyang Babèl tekan Kristus patbelas turunan.

¹⁸Bab lairé Yésus Kristus kuwi kelakoné mengkéné: Waktu Maria ibuné ijik patyangan karo Yosèf, sak durungé tunggal sak peturon, ketemu wis meteng awit sangka Roh Sutyi.

¹⁹Sakrèhné Yosèf bojoné kuwi wong bener lan ora gelem mirangké Maria ing ngarepé wong okèh, mulané arep medot patyangané karo meneng-meneng.

²⁰Nanging bareng ijik nduwé gagasan mengkono kuwi, terus ana mulékaté Gusti ngétoki sak njeruhné ngimpi, ngomong: “Hé, Yosèf, tyedak turunané Daved, aja wedi enggonmu ngepèk Maria dadi bojomu, awit Anak sing dibobot kuwi awit sangka Roh Sutyi,

²¹lan Maria bakal nglairké putra, kuwi jenengna Yésus; awit ya kuwi sing bakal ngluwari umaté sangka dosané.”

²²Kuwi mau kabèh kelakon supaya kedadian apa sing diomongké karo Gusti lantaran nabi, mengkéné:

²³“Ana prawan bakal meteng lan nglairké anak lanang, sing jenengé bakal disebut Imanuèl, tegesé: Gusti Allah nunggal karo kita.”

²⁴Sak tanginé turu, Yosèf terus nuruti kaya sing diomongké karo mulékaté Gusti, lan nampani Maria dadi bojoné,

²⁵nanging ora dityampuri turu, nganti tekané wis nglairké anak lanang, lan Yosèf terus jenengké bayiné Yésus.