Read Caribbean Javanese Matius 11 Bible Online

Matius 11 - Caribbean Javanese bible

Matius 11

¹Sakwisé Yésus mungkasi pawelingé marang muridé rolas, Panjenengané terus lunga sangka kono, terus mulangi lan nggelarké Injil ing kuta-kutané.

²Ing pakunjara Yohanes krungu kabar bab penggawéané Kristus,

³terus ngutus muridé supaya takon marang Panjenengané, mengkéné: “Apa Panjenengan kuwi sing mesti teka, apa kita kudu pada ngentèni liyané?”

⁴Yésus nyauri, tembungé: “Wis, pada mbalika, kabarna marang Yohanes apa sing kok krungu lan kok deleng:

⁵wong pityek pada weruh, wong lumpuh pada mlaku, wong lara lépra pada diwaraské, wong budek pada krungu, wong mati pada ditangèkké lan wong mlarat pada dikabari kabar kabungahan.

⁶Rahayu wong sing ora rumangsa isin ngakoni Aku.”

⁷Sak mulihé para kongkonan mau, Yésus wiwit nggelar tembungé marang wong okèh kuwi bab Yohanes, mengkéné: “Kowé pada menyang ara-ara samun arep weruh apa? Arep weruh glagah sing diobat-abitaké karo angin?

⁸Utawa arep ngapa kowé mrana? Arep weruh wong sing nganggo sandangan sing alus? Wong sing nganggo alus kuwi panggonané ing kraton.

⁹Dadi arep apa kowé mrana? Arep weruh nabi? Ya, bener lan Aku ngomong marang kowé, malah sing ngungkuli nabi.

¹⁰Awit ya kuwi sing ketulis, mengkéné: Delengen, Aku ngutus kongkonan-Ku mlaku ndisiki Kowé, arep nyawiské dalanmu ing ngarepmu.

¹¹Sak temené Aku ngomong marang kowé: Ing antarané wong-wong sing lair sangka wong wadon, ora ana wong sing luwih gedé tenimbang Yohanes Pembaptis, senajan mengkono wong sing tyilik déwé ing Kratoné swarga, kuwi luwih gedé tenimbang Yohanes Pembaptis.

¹²Awit wiwit waktu Yohanes Pembaptis njangkah ing gawé nganti saiki, Kratoné swarga kuwi diénggokké lan para sing ngénggokké kuwi mbudidaya arep ngrebut pangwasa.

¹³Awit kabèh nabi lan kitab Torèt kuwi pada ngomongké nganti sak tekané Yohanes.

¹⁴Lan, yèn kowé pada gelem nganggep mengkono, ya wong mau kuwi Elia sing bakal teka.

¹⁵Sapa sing nduwé kuping, rungokna.

¹⁶Tak padakké apa wong golongan iki? Kaya botyah-botyah sing lungguhan ing pasar, nyeluk marang kantya-kantyané mengkéné:

¹⁷Kita wis pada nyuling kanggo kowé, nanging kowé ora pada njogèt. Kita wis pada ngidungké kidung pesambat, nanging kowé ora pada tangisan.

¹⁸Sakrèné Yohanes kuwi teka tanpa mangan tanpa ngombé, mulané wong-wong pada ngomong: Wong kuwi kesurupan demit.

¹⁹Tekané Putrané Manungsa nganggo mangan lan ngombé, lan wong-wong pada ngomong: Delengen kuwi, wong nggragas lan seneng ngombé anggur, kantya-kantyané para juru pajek lan wong dosa. Nanging kawityaksanané Gusti kuwi dibeneraké awit sangka tumindaké.”

²⁰Panjenengané terus wiwit melèhké marang kuta-kuta awit pada ora mratobat, ing kono Panjenengané nindakké mujijat sing okèh déwé:

²¹“Tyilaka kowé Korasin, tyilaka kowé Bètsaida, awit yèn ing Tirus lan ing Sidon ya kelakon mujijat-mujijat kaya sing wis kelakon ing tengah-tengahmu, mesti wis mbiyèn-mbiyèn enggoné pada mratobat lan sedih banget.

²²Nanging Aku ngomong marang kowé: Mbésuk ing dina pengadilan sing disangga karo Tirus lan Sidon bakal luwih èntèng tenimbang kowé.

²³Uga kowé Kapernaum, apa kowé bakal kaluhurké nganti sundul langit? Ora, kowé bakal dityemplungké ing panggonané pepetengé pati. Awit yèn ing Sodom kelakon mujijat-mujijat sing kedadian kaya ing tengah-tengahmu, kuta kuwi mesti lestari tekan saiki.

²⁴Nanging Aku ngomong marang kowé: Mbésuk ing dina pengadilan sing disangga karo negara Sodom bakal luwih èntèng tenimbang kowé.”

²⁵Ing waktu kuwi Yésus ngomong: “Duh, Bapak, Gustiné swarga lan bumi, kula masrahké tembung maturkesuwun, bab kuwi kabèh Panjenengan nggawé ora ngerti kanggo wong wityaksana lan wong pinter, nanging Panjenengan duduhké marang wong tyilik.

²⁶Ya, Bapak, pantyèn mengkéné karep Panjenengan.”

²⁷“Samubarang kabèh wis dipasrahké marang Aku karo Bapak-Ku, lan ora ana wong sing mengertèni marang Putra, kejaba mung Bapak, lan ora ana wong sing mengertèni marang Bapak, kejaba mung Putra lan wong sing wis disenengi sangka karepé Putra.

²⁸Hé, para wong sing kangèlan lan kabotan, pada mrénéa, Aku bakal nggawé ayemmu.

²⁹Pasangan-Ku pada tampanana ing pundakmu lan pada blajara marang Aku, awit Aku iki alus lan andap asor, terus kowé bakal pada olèh ayemé nyawamu.

³⁰Awit pasangan-Ku kuwi kepénak lan momotan-Ku kuwi èntèng.”