Read Caribbean Javanese Matius 23 Bible Online

Matius 23 - Caribbean Javanese bible

Matius 23

¹Yésus terus ngomong marang wong okèh lan marang para muridé, tembungé:

²“Para juru Torèt lan para Farisi kuwi pada nglungguhi lungguhané Moses.

³Mulané apa sing diomongké marang kowé kuwi pada lakonana kabèh lan pada tetepana, nanging aja pada niru tindak-tanduké, awit wong-wong kuwi pada mulangi, nanging ora pada nglakoni déwé.

⁴Mulané wongé, pada mbongkoki momotan-momotan sing abot lan rekasa, terus ditumpangké ing pundaké wong, nanging awaké déwé nyénggol waé ora gelem.

⁵Penggawéané kabèh kuwi pada ditindakké supaya disawang karo wong, awit pada ngambakké sabuk-sabuk sembayangé lan nggedèkké gombyok-gombyoké jubahé.

⁶Pada seneng lungguh ing panggonan sing kajèn ing pésta-pésta lan marang lungguhan sing nomer siji ing sinaguké,

⁷uga seneng nampani panghurmatan ing pasar-pasar lan diarani karo wong, rabbi.

⁸Nanging kowé aja diarani rabbi, awit mung siji Rabbimu lan kowé kabèh pada-pada sedulur.

⁹Apa menèh kowé aja nyebut sapa waé ing bumi iki ‘bapak’, awit mung siji Bapakmu, ya kuwi Panjenengané ing swarga.

¹⁰Kowé aja gelem diarani pemimpin, awit mung siji Pemimpinmu, ya kuwi Kristus.

¹¹Sapa sing gedé déwé ing sak tengahmu kuwi dadia peladènmu.

¹²Lan sapa sing ngluhurké awaké déwé, bakal diasorké, nanging sing ngasorké awaké déwé bakal diluhurké.”

¹³“Tyilaka kowé, hé, para juru Torèt lan para Farisi, wong-wong lamis, awit kowé nutup lawang-lawang Kratoné swarga kanggo wong, awit kowé déwé ora mlebu lan wong-wong sing arep mlebu kok alang-alangi. [

¹⁴Tyilaka kowé, hé, para juru Torèt lan para Farisi, wong-wong lamis, awit kowé pada ngemplok omahé randa-randa nganti entèk, ngapusi nganggo pandonga dawa-dawa, mulané kowé mesti bakal nampa paukuman sing luwih abot.][6]

¹⁵Tyilaka kowé, hé, para juru Torèt lan para Farisi, wong-wong lamis, awit kowé pada mlaku ing segara lan ndlajahi daratan, supaya kowé pada olèh wong sing mlebu ing agamamu, lan yèn kelakon mengkono, wong kuwi kok tyalonké mlebu neraka, sing alané tikel loro tenimbang karo kowé.

¹⁶Tyilaka kowé, hé, para pemimpin sing lamur, sing ngomong: Sapa sing sumpah kanggo Griya Sutyi, sumpahé kuwi ora sah; nanging sapa sing sumpah kanggo emasé Griya Sutyi, sumpahé kuwi nalèni sing sumpah.

¹⁷Hé, kowé wong-wong bodo lan lamur, endi sing luwih gedé tegesé, emas apa Griya Sutyi sing nyutyèkké emasé?

¹⁸Apa menèh sapa sing sumpah kanggo mesbèh, sumpahé kuwi ora sah, nanging sapa sing sumpah kanggo pisungsung ing mesbèh, sumpahé kuwi nalèni sing sumpah.

¹⁹Hé, wong-wong lamur, endi sing luwih gedé tegesé, pisungsungé apa mesbèh sing nyutyèkké pisungsungé?

²⁰Mulané sapa sing sumpah kanggo mesbèh, kuwi sumpahé kanggo mesbèh lan uga kanggo barang-barang sing temumpang ing kono.

²¹Lan sapa sing sumpah kanggo Griya Sutyi, kuwi ya sumpah kanggo Griya Sutyi lan uga kanggo Panjenengané sing manggon ing kono.

²²Uga sapa sing sumpah kanggo swarga, kuwi ya sumpah kanggo damparé Gusti Allah lan ya kanggo Panjenengané sing njagong ing kono.

²³Tyilaka kowé, hé, para juru Torèt lan para Farisi, wong-wong lamis, awit uga godong telasih lan adas lan jinten kuwi kok bayar pra sepuluhé, nanging perkara-perkara sing luwih gedé boboté kanggo angger-angger, ya kuwi: keadilan, kawelasan lan kasetian kuwi kok lalèkké. Sing siji kudu ditindakké, sijiné aja dilalèkké.

²⁴Hé, kowé, pemimpin-pemimpin sing lamur, lemut kok saring sangka ombèn-ombènmu, nanging unta kok èlèk.

²⁵Tyilaka kowé, hé, para juru Torèt lan para Farisi, wong-wong lamis, awit njabané tuwung lan kendi pada kok resiki, nanging ing njeruhné kebak isi rampasan lan murka sing gedé.

²⁶Hé, wong Farisi sing lamur, resikana ndisik njeruhné tuwung kuwi, nganti njabané ya bakal dadi resik.

²⁷Tyilaka kowé, hé, para juru Torèt lan para Farisi, wong-wong lamis, awit kowé kuwi pada kaya kuburan, sing dilabur putih; njabané pantyèn kétok apik, nanging njeruhné kebak isi balungé wong mati lan rereget werna-werna.

²⁸Semono uga kowé, njabamu kétok bener ana ngarepé wong, nanging ing batinmu kebak isi lelamis lan duraka.

²⁹Tyilaka kowé, hé, para juru Torèt lan para Farisi, wong-wong lamis, awit kowé, mbangun kuburané para nabi lan nggambari tugu-tuguné wong-wong sutyi ing kuburan.

³⁰Lan ngomong: “Yèn kita pada urip ing jamané para leluhurku, mesti kita ora pada mèlu komplotan karo wong-wong kuwi ing bab ngutahké getihé para nabi.”

³¹Nanging awit sing mengkono kuwi, kowé pada dadi seksi kanggo awakmu déwé, yèn kowé kabèh kuwi pada turunané wong-wong sing matèni para nabi.

³²Dadi kowé pada nggenepi lelakoné leluhurmu!

³³Hé, ula, hé para tetesané ula upas, kepriyé enggonmu bisa utyul sangka ukumané neraka?”

³⁴“Mulané, delengen, Aku ngutus nabi-nabi lan wong-wong wityaksana lan juru Torèt nekani kowé, nanging kowé bakal pada matèni separo lan nyalip wong sangka sing tak utus kuwi lan kanggo separo liyané sangka kuwi bakal pada kok larani ing sinagukmu lan kok oyak-oyak sangka kuta sing siji menyang kuta sijiné,

³⁵supaya pada diwaleské marang kowé sak kabèhé getih resik sing wis dikutahké ing bumi, wiwit sangka getihé Abil sing bener kuwi, nganti tekan getihé Sakaria, anaké Bérékya, sing kok patèni ing antarané griya Sutyi lan mesbèh.

³⁶Sak temené Aku ngomong marang kowé: Kabèh kuwi bakal diwaleské marang golongan iki.

³⁷Yérusalèm, Yérusalèm sing matèni para nabi lan mbandemi watu marang wong-wong sing diutus nemoni kowé, wis nganti kaping pira enggon-Ku kepéngin nglumpukké anak-anakmu, kaya babon enggoné nglumpukké anak-anaké ing sak ngisoré swiwiné, nanging kowé pada ora gelem.

³⁸Titènana, omahmu iki bakal ditinggalké dadi suwung.

³⁹Lan Aku ngomong marang kowé: Wiwit saiki kowé ora bakal pada weruh Aku menèh, nganti kowé pada omong: Kaberkahan Sing teka atas asmané Gusti.”