Read Caribbean Javanese Matius 24 Bible Online

Matius 24 - Caribbean Javanese bible

Matius 24

¹Sakwisé kuwi Yésus metu sangka Griya Sutyi lan lunga sangka kono. Para muridé terus pada teka ngomongi Panjenengané pernatan bangunan Griya Sutyi.

²Panjenengané ngomong marang para murid: “Apa kowé pada weruh kuwi kabèh? Sak temené Aku ngomong marang kowé, ing kéné bakal ora ana watu siji waé sing tetep temumpang ing watu liyané, kabèh bakal diambrukké.”

³Waktu Panjenengané njagong ing gunung Saitun, para muridé pada nemoni ing ngarepé Panjenengané lan ngomong: “Gusti supaya ngomong marang kita, mbésuk apa kuwi kabèh arep kedadian, lan apa tanda-tandané tekané Panjenengan lan tanda-tandané pungkasané jaman?”

⁴Yésus semaur lan ngomong marang para murid: “Pada digatèkké, aja nganti ana wong sing nasarké kowé!

⁵Awit okèh wong sing bakal teka nganggo jeneng-Ku lan ngomong: Aku iki Kristus, lan bakal nasarké wong okèh.

⁶Kowé bakal krungu swarané perang utawa kabar-kabar bab perang. Nanging digatèkké, aja pada kagèt, awit iki kudu kelakon, nanging kuwi durung pungkasané.

⁷Awit bangsa bakal nyerang nglawan bangsa, kraton nglawan kraton. Bakal ana pailan lan lindu, ing ngendi-endi panggonan.

⁸Nanging kuwi kabèh mung wiwitané sangsara arep tekané jaman anyar.

⁹Ing waktu kuwi kowé bakal pada dipasrahké marang panganiaya lan kowé bakal dipatèni lan kowé bakal disengiti karo sak kabèhé bangsa awit sangka jeneng-Ku.

¹⁰Ing kono bakal okèh wong sing ninggal pengandelé lan pada masrahké liyané lan sengit-sengitan.

¹¹Lan menèh bakal okèh nabi palsu sing njedul lan nasarké wong pirang-pirang.

¹²Apa menèh awit sangka mundak tukulé duraka, terus katrésnané wong okèh pada dadi luntur.

¹³Nanging sapa sing mantep tekan pungkasan, kuwi bakal dislametké.

¹⁴Lan Injilé Kraton iki bakal diwartakké ing sak lumahé jagat kanggo paseksi marang sak kabèhé bangsa. Sakwisé kuwi bakal tekané dina pungkasan.”

¹⁵“Lan yèn kowé pada weruh ‘penggawé alané tukang pengrusak’ ngadek ing panggonan sutyi, sing digelarké lantaran Danièl - sapa sing matya kudu nggatèkké -

¹⁶wong-wong ing Yudéa pada mblayua menyang pegunungan.

¹⁷Wong sing ijik ing payon aja medun njupuk barang-barang sangka omahé.

¹⁸Lan wong sing ijik ing kebon aja mulih njupuk sandangané.

¹⁹Tyilaka wong sing ijik meteng lan sing ijik nusoni ing waktu kuwi.

²⁰Pada ndedongaa, supaya enggonmu pada ngungsi ora kelakon ing waktu bediding utawa ing dina sabat.

²¹Awit ing waktu kuwi bakal ana sangsara gedé; sing durung tau kelakon wiwit wiwitané jagat nganti saiki lan uga ora bakal kelakon menèh.

²²Lan yèn dina-dinané sangsara kuwi ora dityepetké, sak rupané wong ora ana sing slamet; nanging awit wong-wong sing dipilih, dina-dina kuwi bakal dityepetké.

²³Ing waktu kuwi, yèn ana wong sing ngomong marang kowé: Delengen, Mésias ing kéné, utawa Mésias ing kana, kowé aja pada ngandel.

²⁴Awit mésias-mésias palsu lan nabi-nabi palsu bakal njedul lan pada nggawé tanda-tanda gedé lan mujijat-mujijat kanggo nasarké, yèn bisa ya kanggo para sing dipilih uga.

²⁵Aku wis ngomongké kuwi marang kowé sak durungé kelakon.

²⁶Mulané yèn ana wong ngomong marang kowé: Panjenengané ing ara-ara samun, kowé aja terus mrana; utawa: Panjenengané ing kamar ndelik, kowé aja pada ngandel.

²⁷Awit kayadéné klélap njedul sangka wétan semlorot nganti tekan kulon, ya mengkono kuwi mbésuk bakal tekané Putrané Manungsa.

²⁸Ing ngendi ana batang, ing kono manuk gagak bakal pada grombolan.”

²⁹“Sakwisé kasangsaran ing waktu kuwi, terus sak nalika srengéngé bakal dadi peteng lan mbulan bakal ora semlorot padangé lan lintang-lintang bakal pada tyeblok sangka langit, uga tyagak-tyagaké langit bakal pada gonjang-ganjing.

³⁰Ing waktu kuwi bakal kétok tandané Putrané Manungsa ing langit lan sak kabèhé bangsa ing sak lumahé bumi bakal pada ngaduh-aduh, terus pada ndeleng Putrané Manungsa teka numpak mégané langit, nganggo pangwasa lan kamulyan gedé.

³¹Panjenengané terus bakal ngutus para mulékaté karo swarané trompèt sing banter banget lan kuwi bakal pada nglumpukké wong-wong pilihané sangka kéblat papat, sangka pinggiré langit tekan pinggir sisihé.

³²Pada blajara sangka wit anjir, sing ngéné: Yèn pangé memes lan wiwit semi, kowé pada ngerti, yèn wis mèh waktu panas.

³³Semono uga, yèn kowé pada weruh lelakon kuwi mau kabèh, pada ngertènana, yèn wis tyedak, wis ing ngarep lawang.

³⁴Sak temené Aku ngomong marang kowé, golongan iki ora bakal entèk, nganti kuwi mau kabèh kelakon.

³⁵Langit lan bumi bakal entèk, nanging tembung-tembung-Ku ora bakal entèk babar pisan.

³⁶Mung waé, kanggo dina lan wantyiné kuwi, ora ana wong siji-sijia sing mengertèni, dadia para mulékat ing swarga ora, mengkono uga Putra, ya ora, kejaba mung Bapak déwé.”

³⁷“Awit kayadéné waktu jamané Noah, ya mengkono uga bakalé tekané Putrané Manungsa.

³⁸Awit pada kaya ndèk jaman sak durungé banjir bandang, wong-wong pada mangan lan ngombé, omah-omah lan ngomah-omahké, nganti dina enggoné Noah mlebu ing kapal,

³⁹lan pada ora nglegéwa nganti tekané banjir sing ngentèkké wong-wong mau kabèh, mengkono uga mbésuk ing dina tekané Putrané Manungsa.

⁴⁰Ing waktu kuwi bakal ana wong loro ing kebon, sing siji bakal diangkat, sijiné bakal ditinggal.

⁴¹Bakal ana wong wadon loro sing pada nggiling nganggo watu gilingan, siji bakal diangkat sijiné ditinggal.

⁴²Mulané pada jaga-jagaa, awit kowé ora ngerti ing dina apa Gustimu bakal teka.

⁴³Nanging iki ngertènana: Yèn sing nduwé omah ing wayah mbengi ngerti wantyiné tekané maling, mesti terus jaga-jaga, ora bakal pada olèh omahé dibobol.

⁴⁴Awit sangka kuwi, kowé uga pada jaga-jagaa, awit Putrané Manungsa kuwi teka ing wayah sing ora kok sangka.”

⁴⁵“Sapa abdi sing setia lan wityaksana, sing dipilih karo bendarané mimpin para abdiné, dipasrahi nyepaki pangan marang para abdiné ing waktu sing ditemtokké?

⁴⁶Rahayu abdi sing waktu bendarané teka, ketemu nindakké mengkono.

⁴⁷Sak temené Aku ngomong marang kowé, bendara kuwi bakal netepaké abdi mau ngwasani sembarang duwèké kabèh.

⁴⁸Nanging yèn abdi kuwi ala lan nggagas ing sak njeruhné atiné, ngéné:

⁴⁹Bendaraku ora teka-teka, terus wiwit nyabeti kantya-kantyané pada-pada abdiné lan mangan ngombé bebarengan karo wong-wong sing seneng mendem,

⁵⁰bendarané abdi kuwi mau terus teka ing dina sing ora disangka-sangka lan ing wantyi sing ora ngerti.

⁵¹Abdi mau bakal dipatèni lan diukum pada karo para wong lamis. Ing kono bakal ana tangis lan keroté untu.”