Read Caribbean Javanese Matius 25 Bible Online

Matius 25 - Caribbean Javanese bible

Matius 25

¹“Ing waktu kuwi bab Kratoné swarga dipadakké kaya prawan sepuluh, sing njupuk ontyoré terus budal metuk pengantèn lanang.

²Lima sangka sing sepuluh kuwi bodo, nanging sing lima wityaksana.

³Sing bodo mau nggawa ontyoré ora nggawa sèrep lenga,

⁴nanging sing wityaksana, nggawa ontyor lan lenga ing adahé.

⁵Awit pengantèné suwé ora teka-teka, prawan-prawan mau pada ngantuk lan terus turu.

⁶Bareng wayah tengah wengi ana wong surak-surak: kuwi pengantèné! Pada petuken!

⁷Prawan-prawan mau pada tangi lan nata ontyor-ontyoré.

⁸Prawan-prawan sing bodo terus nembung marang sing wityaksana: Kita pada wènèhana lengamu setitik, awit ontyor kita pada arep mati.

⁹Nanging prawan-prawan sing wityaksana pada nyauri karo ngomong: Aja, mengko ora nyukupi kanggo kita lan kowé. Aluwung pada lungaa menyang enggoné sing adol lan tukua kanggo awakmu déwé.

¹⁰Waktu ijik pada lunga tuku lenga, pengantèn teka lan sing wis siap pada bareng pengantèn mlebu ing pésta, lawangé terus dikantying.

¹¹Sakwisé mengkono prawan-prawan liyané ya teka lan ngomong: Bendara, bendara, kita dibukakké lawangé!

¹²Nanging pengantèné nyauri, tembungé: Sak temené Aku ngomong marang kowé: Aku ora kenal karo kowé.

¹³Mulané pada jaga-jagaa, awit kowé pada ora ngerti dinané lan wantyiné.”

¹⁴“Awit bab kuwi kayadéné wong sing arep lelungan menyang negara mantya, terus ngundangi abdi-abdiné lan masrahké bandané marang abdi-abdiné mau.

¹⁵Marang sing siji bendara kuwi ngekèki limang talénta, marang sijiné rong talénta lan marang sijiné menèh sak talénta, siji lan sijiné miturut kesaguhané déwé-déwé, lan bendara mau terus budal.

¹⁶Sing nampa limang talénta terus lunga, mlaku dagang nganggo duwité kuwi lan pada olèh bati limang talénta.

¹⁷Mengkono uga sing nampa rong talénta ya pada olèh bati rong talénta.

¹⁸Nanging sing nampa sak talénta kuwi lunga ngeduk lemah nggawé juglangan lan nyimpen duwité bendarané.

¹⁹Sakwisé suwé bendarané abdiné mau mulih, terus itung-itungan karo abdi-abdiné.

²⁰Sing nampa limang talénta masrahaké batiné limang talénta, karo ngomong: Bendara, Panjenengan masrahké limang talénta marang kula; iki kula olèh bati limang talénta.

²¹Bendarané ngomong marang batur kuwi: Apik, hé abdi sing betyik lan temen; kowé wis temen kanggo perkara sing tyilik, kowé bakal tak pertyaya perkara sing gedé; maraa mlebua mèlu ngrasaké kebungahané bendaramu.

²²Sing nampa rong talénta uga maju, karo ngomong: Bendara, Panjenengan masrahké rong talénta marang kula; kula olèh bati rong talénta.

²³Bendarané omong marang batur kuwi: Apik, hé abdi sing betyik lan temen; kowé wis temen kanggo perkara sing tyilik, kowé bakal tak pertyaya perkara sing gedé; maraa mlebua mèlu ngrasaké kebungahané bendaramu.

²⁴Sing nampa sak talénta uga terus maju karo ngomong: Bendara, kula ngerti, yèn panjenengan kuwi wong kereng sing manèni ing panggonan sing ora panjenengan sebari lan njukuki sangka panggonan sing ora panjenengan tanduri.

²⁵Mila kula karo wedi, kula terus lunga nyimpen talénta panjenengan ing njeruhné lemah. Iki panjenengan tampani apa sing dadi duwèké panjenengan!

²⁶Bendarané terus nyauri: Hé, abdi sing ala lan kesèt, kowé wis ngerti, yèn aku manèni ing panggonan sing ora tak sebari lan nglumpukké sangka panggonan sing ora tak tanduri.

²⁷Yèn mengkono, kowé kuduné masrahké duwitku marang wong sing nglakokké duwit lan yèn aku teka aku nampani bali, kuwi uga sak anakané.

²⁸Mulané taléntané kuwi jaluken, terus wènèhna marang sing nduwé sepuluh talénta kuwi.

²⁹Awit sapa sing nduwé, bakal dikèki lan bakal nduwé nganti lubèr-lubèr. Nanging sangka wong sing ora nduwé, bakal dijukuk sembarang duwèké kabèh.

³⁰Lan abdi sing tanpa guna kuwi untyalna menyang pepeteng sing peteng déwé. Ing kono bakal ana tangis lan keroté untu.”

³¹“Mbésuk yèn Putrané Manungsa teka nganggo kamulyan-Né lan sak kabèhé mulékat pada mèlu, Panjenengané terus njagong ing dampar kamulyan-Né.

³²Sak kabèhé bangsa terus bakal tak klumpukké ing ngarepé lan Panjenengané bakal misah-misahké bangsa-bangsa kuwi siji lan sijiné, kayadéné pangon enggoné misah-misahké wedus gèmbèl karo wedus

³³lan pangon kuwi mapanké wedus gèmbèl ing tengené, nanging wedus ing kiwané.

³⁴Terus ratu bakal ngomong marang sing ana tengené: Hé, para sing kaberkahan karo Bapak-Ku, maraa, pada tampanana warisan Kraton, sing wis dityawiské marang kowé wiwit kedadiané jagat.

³⁵Awit waktu Aku ngelih, kowé ngekèki mangan Aku; waktu Aku ngelak, kowé ngekèki ngombé Aku; waktu Aku dadi wong mantya, kowé ngekèki inepan Aku;

³⁶waktu Aku wuda, kowé ngekèki salin Aku, waktu Aku lara, kowé niliki Aku; waktu Aku diukum, kowé niliki nemoni Aku.

³⁷Ing kono para wong sing mlakuné bener kuwi bakal pada ngomong: Gusti, waktu kapan kita ngerti Panjenengan ngelih terus kita ngekèki mangan, utawa ngelak terus kita ngekèki ngombé?

³⁸Kapan kita ngerti Panjenengan dadi wong mantya terus ngekèki inepan, utawa wuda terus kita ngekèki salin?

³⁹Kapan kita ngerti Panjenengan lara utawa diukum, terus kita teka nemoni Panjenengan?

⁴⁰Ratu nyauri, tembungé marang wong-wong kuwi: Sak temené Aku ngomong marang kowé: Sak pira sing kok tindakké marang salah siji sangka sedulur-sedulurku sing tyilik déwé iki, kuwi kowé nindakké kanggo Aku.

⁴¹Sakwisé mengkono Panjenengané ya bakal ngomong marang ing kiwané: Hé wong sing pada kena karo bebendu, minggira sangka ngarep-Ku, menyang ing geni langgeng, sing wis dityawiské kanggo iblis lan para mulékaté.

⁴²Awit waktu Aku ngelih, kowé ora ngekèki mangan Aku; waktu Aku ngelak, kowé ora ngekèki ngombé;

⁴³waktu Aku dadi wong mantya, kowé ora nampani Aku ing brayatmu; waktu Aku wuda kowé ora ngekèki klambi Aku; waktu Aku lara lan ing paukuman, kowé ora niliki Aku.

⁴⁴Ing kono wong-wong mau ya bakal pada nyauri karo ngomong: Gusti, waktu apa kita ngerti Panjenengan ngelih, utawa ngelak, utawa mantya, utawa wuda utawa lara, utawa diukum lan kita ora ngladèni Panjenengan?

⁴⁵Panjenengané terus bakal nyauri wong-wong mau karo ngomong: Sak temen-temené Aku ngomong marang kowé, sak pira sing ora kok tindakké marang sing tyilik déwé iki, kuwi ya ora kok tindakké kanggo Aku.

⁴⁶Lan wong-wong kuwi bakal pada mlebu ing paukuman langgeng, nanging para wong sing mlakuné bener bakal mlebu ing urip langgeng.”