Read Caribbean Javanese Matius 28 Bible Online

Matius 28 - Caribbean Javanese bible

Matius 28

¹Bareng dina sabat wis kliwat, ing wantyi ésuk mruput, arep tekané dina kaping pisan ing minggu kuwi, Maria Makdaléna karo Maria sijiné pada lunga niliki kuburan.

²Terus ana lindu gedé, awit ana mulékaté Gusti medun sangka langit lan nyedek ngglundungké watuné lawangé kuburan, terus dijagongi.

³Rupané kétok kaya klélap, penganggoné putih kaya salju.

⁴Awit sangka wediné marang mulékat, sing pada njaga gemeter wedi banget nganti kaya wong mati.

⁵Nanging mulékat mau ngomong marang wong-wong wadon kuwi: “Kowé aja pada wedi, awit aku ngerti, kowé pada nggolèki Yésus sing dipentèng kuwi.

⁶Panjenengané ora ing kéné, awit wis tangi, kaya sing wis diomongké. Pada mrénéa, delengen panggonané Panjenengané diglétakké.

⁷Lan gelis pada lungaa lan omongna marang para muridé, yèn Panjenengané wis tangi sangka antarané wong mati lan ngertènana, Panjenengané ndisiki kowé lunga menyang Galiléa. Ing kana, kowé bakal pada weruh Panjenengané. Ngertènana, Aku wis ngomong marang kowé.”

⁸Wong-wong wadon kuwi terus gelis-gelis pada lunga sangka kuburan karo wedi lan karo kabungahan gedé, pada mlayu arep ngekèki kabar marang para muridé Yésus.

⁹Sak nalika Yésus metuki wong-wong wadon kuwi lan ngomong: “Pada rahayu!” Terus pada nyedaki Panjenengané lan nyandak sikilé lan nyembah Panjenengané.

¹⁰Yésus terus ngomong marang wong-wong wadon kuwi: “Aja pada wedi. Pada lungaa, ngekèki kabar marang sedulur-sedulurku supaya pada menyang Galiléa, ing kana bakal pada weruh Aku.”

¹¹Nalika wong-wong wadon kuwi pada budal, wong sing pada njaga pada mlebu ing kuta, ngomongi kabar marang para pengarepé imam, bab kabèh sing kelakon.

¹²Lan sakwisé ngumpul karo para pinituwa lan nggawé putusan, terus pada ngekèki duwit okèh marang para suradadu,

¹³lan tembungé: “Kowé pada ngomonga ngéné, ‘Ing wantyi mbengi para muridé pada teka nyolong layoné, nalika kita pada turu.’

¹⁴Nanging yèn perkara iki dikrungu karo gubernur, kita bakal pada ngomong panjenengané, supaya kowé ora nemu kangèlan.”

¹⁵Bareng wis pada nampani duwité, para suradadu terus pada nglakoni kaya enggoné pada dikongkon. Lan nyeritakné kuwi kasebar ing antarané wong Ju nganti saiki.

¹⁶Para murid sewelas terus pada budal menyang Galiléa, menyang gunung sing wis dipréntahké Yésus marang para murid mau.

¹⁷Bareng pada weruh Panjenengané terus pada sujut, nanging muridé pada mangga-mara.

¹⁸Yésus terus nyedaki para muridé lan ngomong: “Sak kabèhé pangwasa ing swarga lan ing bumi wis dikèkké marang Aku.

¹⁹Mulané pada lungaa, sak kabèhé bangsa pada dadèkna murid-Ku, lan baptisen ing asmané sang Bapak, sang Putra lan sang Roh Sutyi

²⁰lan pada wulangana netepi sembarang sing wis tak wulangké marang kowé kabèh. Ngertia, Aku ngantyani kowé ing saben dina, nganti tekan pungkasané jaman.”