Read Caribbean Javanese Matius 3 Bible Online

Matius 3 - Caribbean Javanese bible

Matius 3

¹Ing waktu semono Yohanes Pembaptis teka ing ara-ara samun bawah Yudéa, nggelarké piwulang, tembungé,

²“Pada mratobata, awit Kratoné swarga wis tyedak!”

³Sak temené ya Yohanes iki sing diomongké karo nabi Yésaya, mengkéné: “Ana swara sing mbengok-mbengok ing ara-ara samun: Pada tyawiské dalané Gusti, dalan-dalan kanggo Panjenengané pada lentyengna.”

⁴Yohanes kuwi penganggoné sing digawé sangka wulu unta lan sabukan lulang; lan pangané walang lan madu alas.

⁵Terus diparani karo wong-wong sangka Yérusalèm, sangka Yudéa kabèh lan sangka panggonan sak kiwa-tengené laut Yordan.

⁶Wong-wong mau terus pada dibaptisi karo Yohanes ing laut Yordan, karo ngakoni dosané.

⁷Nanging bareng Yohanes weruh para Farisi lan para Saduki pada teka njaluk dibaptis, terus pada diomongi, mengkéné: “Hé, tetesané ula upas, sapa sing ngomongi kowé nyingkiri bebendu sing bakal teka?

⁸Yèn mengkono pada kétoké penggawému sing sembada karo mertobatmu.

⁹Lan aja pada nduwé pikiran, mengkéné: Aku apa ora anak-anaké bapak Abraham. Nanging aku ngomong marang kowé, watu iki Gusti Allah kwasa ndadèkké watu-watu iki dadi anak-anak turunané Abraham.

¹⁰Kampak wis tyumawis ing poké wit-witan; saben wit sing ora ngetokké woh sing betyik, mesti ditegor lan diobong ing geni.

¹¹Aku iki mbaptisi kowé kabèh nganggo banyu supaya dadi tanda mratobatmu, nanging sing bakal teka sakwisé aku, kuwi luwih kwasa tenimbang aku lan nyopot sepatuné waé aku ora pantes. Panjenengané bakal mbaptisi kowé karo Roh Sutyi lan geni.

¹²Panjenengané wis nggawa tampah; panutoné bakal diresiki nganti tyutes lan gandumé bakal diklumpukké ing lumbung, nanging merangé bakal diobong ing geni sing ora kena disirep.”

¹³Waktu kuwi Yésus sangka Galiléa teka ing laut Yordan nemoni Yohanes, karepé supaya dibaptis.

¹⁴Nanging Yohanes menggak, semauré: “Kula sing perlu Panjenengan baptis, lah kok Panjenengan nemoni kula.”

¹⁵Nanging Yésus nyauri, tembungé: “Wis ta, saiki bèn kedadian, awit ya mengkono kuwi Aku lan kowé pada nggenepi kabèh karepé Gusti Allah.” Yohanes terus meneng.

¹⁶Sakwisé dibaptis, Yésus terus mentas sangka banyu, lah ing kono langit terus mbiyak lan Panjenengané weruh Rohé Gusti Allah medun kaya manuk dara, mentylok ing Panjenengané.

¹⁷Terus ana swara sangka swarga, sing ngomong: “Iki Putra-Ku, sing Tak trésnani, sing ndadèkké senengé ati-Ku.”