Read Caribbean Javanese Matius 4 Bible Online

Matius 4 - Caribbean Javanese bible

Matius 4

¹Sakwisé mengkono Yésus digawa karo Roh menyang ara-ara samun supaya digoda karo iblis.

²Sakwisé pasa patang puluh dina patang puluh mbengi, pungkasané krasa ngelih.

³Iblis nggoda terus teka ing ngarepé lan ngomong marang Panjenengané, mengkéné: “Yèn Panjenengan Putrané Gusti Allah, hayuk watu-watu iki Panjenengan préntahké supaya dadi roti.”

⁴Nanging Panjenengané nyauri: “Ana ketulis, mengkéné: Uripé manungsa kuwi ora mung sangka roti waé, nanging sangka kabèh pitutur-pitutur sing metu sangka tembungé Gusti Allah.”

⁵Iblis terus nggawa Panjenengané menyang kuta sutyi lan didekké ing nduwuré payoné griya sutyi,

⁶terus ngomong marang Panjenengané, mengkéné: “Yèn Sampéyan Putrané Gusti Allah, hayuk kula njaluk anjlok medun, awit ana tulisan mengkéné: Gusti bakal mréntah para mulékaté kanggo Panjenengan, lan Panjenengan bakal ditadahi karo tangané, supaya sikilmu aja nganti kesandung karo watu.”

⁷Tembungé Yésus: “Ana menèh ketulis mengkéné: Kowé aja njajal Gusti Allahmu.”

⁸Iblis terus nggawa Panjenengané menèh munggah ing gunung sing duwur banget lan dikèki weruh kabèh kraton ing ndonya uga kamulyané,

⁹terus ngomong mengkéné: “Kuwi kabèh kula pasrahké marang Panjenengan, anggeré Panjenengan gelem nyembah sujut marang kula.”

¹⁰Yésus terus ngomong: “Wis, lungaa, sétan!” Awit wis ketulis mengkéné: “Gusti Allahmu sing kudu kok sembah lan Panjenengané Piyambak sing kudu kok bektèni.”

¹¹Iblis terus ninggalké Panjenengané; ing kono terus ana mulékat-mulékaté sing pada teka lan ngladèni Panjenengané.

¹²Nanging bareng Yésus krungu kabar, yèn Yohanes wis ketyekel, Panjenengané terus lunga sumingkir menyang Galiléa,

¹³ngalih sangka Nasarèt lan manggon ing Kapernaum, ing pinggir segara ing panggonan Sébulon lan Naftali,

¹⁴supaya digenepi apa sing didawuhké karo nabi Yésaya, mengkéné,

¹⁵“Tanah Sébulon lan tanah Naftali, dalan ing segara, ing sabrangé laut Yordan, Galiléa, panggonané bangsa-bangsa kafir.

¹⁶Bangsa sing manggon ing pepeteng, kuwi wis weruh Pepadang sing gedé, lan wong sing pada manggon ing negara sing dikwasani ing ayang-ayangé pati, kuwi wis kepletèkan Pepadang.”

¹⁷Wiwit waktu kuwi Yésus nggelarké piwulang, tembungé: “Pada mratobat, awit Kratoné swarga wis tyedak!”

¹⁸Waktu pinuju lunga ing sak pinggiré tlaga Galiléa, Panjenengané weruh wong loro ijik sedulur, ya kuwi Simon sing diarani Pétrus karo Andréas seduluré, ijik pada nguntyalké jala ing tlaga, awit pada dadi tukang nggolèk iwak.

¹⁹Panjenengané terus ngomong marang wong loro kuwi, tembungé: “Hayuk, pada mèlua Aku, kowé bakal pada tak dadèkké tukang nggolèk wong.”

²⁰Sak nalika terus pada ninggal jalané, mèlu Panjenengané.

²¹Sak terusé waktu lunga sangka kono, Panjenengané weruh wong loro menèh, uga ijik pada sedulur, ya kuwi Yakobus, anaké Sebédéus karo Yohanes seduluré, ing prau ijik ngréwangi Sebédéus bapaké enggoné nyulami jalané. Panjenengané terus nyeluk wong loro kuwi.

²²Sak nalika pada ninggalké prauné lan bapaké, terus pada mèlu Panjenengané.

²³Yésus terus ndlajahi bawah Galiléa kabèh, mulangi ing sinaguk-sinaguk wong kono, lan nggelarké Injilé kraton, uga maraské sak rupané lelara lan sak rupané memala, sing ketemu ing sak tengahé bangsa kono.

²⁴Kabar bab Panjenengané kuwi terus kasebar ing panggonan Siria kabèh; kabèh wong sing ngalami lara terus pada digawa menyang Panjenengané, rupa-rupa lelarané lan sangsarané, wong ketèmpèlan, wong ayanen lan wong lumpuh, lan Panjenengané terus maraské wong-wong kuwi.

²⁵Wong golongan okèh pada gembruduk ngetutké Panjenengané, sangka Galiléa, Dékapolis, Yérusalèm, Yudéa lan sangka sabrangé laut Yordan.