Read Caribbean Javanese Matius 7 Bible Online

Matius 7 - Caribbean Javanese bible

Matius 7

¹“Aja pada ngadili salahé wong, supaya kowé aja diadili.

²Awit pepakon sing kok enggo ngadili, ya kuwi sing bakal dienggo ngadili kowé. Lan takeran sing kok enggo naker, ya kuwi sing bakal dienggo naker kowé.

³Kepriyé kowé weruh kayu sak tyuwil ing mripaté sedulurmu, nanging kayu glondongan ing mripatmu déwé, kowé kok ora weruh?

⁴Kepriyé kowé kok bisa ngomong karo sedulurmu: Maraa, kayu sak tyuwil ing mripatmu kuwi tak ilangané, nanging mripatmu déwé ana glondongan kayu?

⁵Hé, wong lamis, ilangana ndisik kayu glondongan ing mripatmu, mengko kowé bakal karo jelas enggonmu ngilangi kayu sak tyuwil ing mripaté sedulurmu.”

⁶“Barang sing sutyi aja kok wènèhaké marang asu, lan mutiaramu aja kok untyalké marang babi, supaya ora diidak-idak lan terus minger nyrongot kowé.”

⁷“Pada njaluka, mesti bakal dikèki. Pada nggolèka, mesti bakal nemu. Pada totok-totoka, mesti bakal dibukakké.

⁸Awit saben wong sing njaluk bakal nampa, sing nggolèk bakal nemu lan sing totok-totok kuwi bakal dibukakké lawang.

⁹Apa ana tunggalmu sing dijaluki roti anaké, kok ngekèki watu,

¹⁰utawa yèn dijaluki iwak, kok ngekèki ula?

¹¹Yèn kowé sing ala pada mengertèni bab pawèh sing betyik marang anak-anakmu, apa menèh Bapakmu ing swarga, mesti pawèh sing betyik marang wong sing pada ndedonga marang Panjenengané.”

¹²“Mulané sembarang penggawé sing kok karepké ing bab tumindaké wong marang kowé, kuwi ya tindakna uga marang wongé, awit ya mengkono kuwi piwulangé Torèt lan kitabé para nabi.

¹³Pada mlebua liwat ing lawang sing tyiut, awit amba lawangé lan jembar dalané sing tekan menyang karusakan, nanging okèh wong sing pada mlebu ing kono.

¹⁴Kosok baliné rupek lawangé lan tyiut dalané sing nuju menyang urip, nanging mung setitik wong sing nemu kuwi.”

¹⁵“Sing ati-ati marang para nabi palsu, sing pada nekani kowé nganggo nylamur kaya wedus gèmbèl, nanging sejatiné kuwi asu alasan sing galak.

¹⁶Bakalé kowé bisa nitik marang bab mau sangka wohé. Apa ana wong ngunduh anggur sangka tetukulan eri, utawa woh anjir sangka rerungkutan?

¹⁷Nanging wit sing betyik ngetokké woh betyik, wit sing gering wohé ya ora apik.

¹⁸Wit sing betyik ora bisa ngetokké woh sing ala, lan wit sing gering ora bisa ngetokké woh sing betyik.

¹⁹Sak rupané wit sing ora ngetokké woh sing betyik, mesti ditegor terus dityemplungké ing geni.

²⁰Nanging wong-wong mau bakal kétok sangka wohé.

²¹Sing bakal mlebu ing Kratoné swarga kuwi duduk angger wong sing ngomong marang Aku: Gusti, Gusti, nanging mung wong sing nglakoni karepé Bapak-Ku ing swarga.

²²Ing dina pungkasan bakal okèh wong sing pada ngomong marang Aku: Gusti, Gusti, apa ora kula wis nubuat atas asma Panjenengan, lan wis nundungi demit atas asma Panjenengan, apa menèh wis nganakké mujijat okèh atas asma Panjenengan?

²³Ing waktu kuwi bakal pada Tak blakani mengkéné: Aku ora kenal karo kowé. Pada sumingkira sangka ngarep-Ku, hé, wong sing pada duraka.”

²⁴“Mulané saben wong sing ngrungokké tembung-Ku kuwi mau lan terus dilakoni, kuwi kaya wong wityaksana, sing ngedekké omahé ing sak nduwuré watu.

²⁵Bareng udan deres, terus banjir lan ana angin gedé, sing nyerang omah mau, nanging ora ambruk, awit dasaré watu atos.

²⁶Nanging saben wong sing ngrungokké tembung-Ku kuwi mau nanging ora dilakoni, kuwi kaya wong sing bodo, sing ngedekké omahé ing sak nduwuré wedi.

²⁷Bareng udan deres, terus banjir, lan ana angin gedé sing nyerang, omah mau terus ambruk lan banget rusaké.”

²⁸Kadung Yésus wis mungkasi tembungé kuwi mau, wong kabèh pada nggumun banget marang piwulangé,

²⁹jalaran enggoné mulangi nganggo pangwasa, ora kaya para juru Torèt.