Read Caribbean Javanese Markus 14 Bible Online

Markus 14 - Caribbean Javanese bible

Markus 14

¹Rong dina menèh ana riyaya Paskah lan Riyaya Roti tanpa ragi. Para pengarepé imam lan para juru Torèt pada ngrantyam kepriyé enggoné nyekel lan matèni Yésus karo réka-daya ala,

²awit pada rerasan: “Aja sak njeruhné riyaya, supaya ora nggawé ributé rayat.”

³Nalika Panjenengané ing Bétania, ing omahé Simon sing wis tau lara lépra, ijik njagong mangan, ana wong wadon teka nggawa botol marmer isi lenga narwastu tulèn, sing larang regané. Sakwisé metyah guluné botol kuwi, wong mau terus ngesokké lengané ing sirahé Gusti Yésus.

⁴Ana wong karo rasa ora trima pada rerasan: “Apa gunané mbuwang-mbuwang lenga jebat narwastu kuwi?

⁵Awit lenga kuwi apa ora kena didol luwih sangka 300 dinar lan kena dikèkké marang wong-wong mlarat.” Wong-wong kuwi terus nyenèni wong wadon mau.

⁶Nanging Yésus ngomong: “Enengna waé wong kuwi. Kenèng apa kowé pada nggawé répoté? Wong kuwi wis nindakké penggawé betyik marang Aku.

⁷Awit wong-wong mlarat tansah ing tengahmu, lan sak wantyi-wantyi kowé nduwé karep, kowé bisa nindakké penggawé betyik marang wong-wong mlarat; nanging Aku iki ora slawasé bebarengan karo kowé.

⁸Wong wadon kuwi wis nindakké apa sing bisa dilakoni. Lan wis nglengani awak-Ku kanggo tyetyawis panguburan-Ku.

⁹Sak temené Aku ngomong marang kowé: Ing ngendi waé Injil diwartakké ing sak ubengé jagat, apa sing wis ditindakké karo wong wadon kuwi bakal dityeritakké kanggo pengéling-éling.”

¹⁰Yudas Iskariot, salah sijiné muridé rolas, terus ngadek marani para pengarepé imam, karo karep masrahké Panjenengané.

¹¹Bareng krungu, wong-wong kuwi pada bungah lan janji bakal ngekèki duwit marang Yudas. Yudas terus nggolèk tyara enggoné arep masrahké Yésus ing waktu sing tyotyok.

¹²Ing dina wiwitan Riyaya Roti tanpa ragi, wantyiné mbelèh tyempé Paskah, para muridé pada ngomong marang Yésus: “Gusti ing ngendi ngarepké kita pada lunga tata-tata kanggo mangan Paskah Gusti?”

¹³Panjenengané terus ngutus muridé loro, lan ngomong marang kongkonan kuwi: “Pada menyanga ing kuta; ing kana ana wong sing nggawa kendi isi banyu bakal metuki kowé. Kowé pada ngetutna wong kuwi,

¹⁴lan ing omah sing dileboni, kowé ngomonga marang sing nduwé omah mau: Guru meling: Kamar endi sing bakal kanggo mangan Paskah karo para sedulur-Ku?

¹⁵Wong kuwi terus bakal nduduhké marang kowé kamar nduwur, sing jembar sing wis dityawiské. Ya ing kono kuwi kowé pada tyawiské pésta Paskah kanggo Aku lan kowé kabèh!”

¹⁶Muridé kuwi terus pada budal, lan bareng tekan kuta pada ngalami kabèh kaya sing diomongké karo Yésus mau; terus pada nyawiské Paskah.

¹⁷Bareng wis soré Panjenengané teka bareng karo muridé rolas.

¹⁸Nalika pada lungguh lan pada mangan, Yésus ngomong: “Sak temené Aku ngomong marang kowé, ana siji sangka tunggalmu sing bakal ngiyanati Aku, ya sing ijik mangan karo Aku.”

¹⁹Para muridé terus wiwit pada sedih lan siji-sijiné pada ngomong marang Panjenengané: “Duduk kula ta, Gusti?”

²⁰Panjenengané terus ngomong marang para muridé: “Wong kuwi ya salah siji sangka tunggalmu wong rolas, sing nyelupké roti ing mangkok bebarengan karo Aku.

²¹Awit Putrané Manungsa bakal lunga kaya sing wis ketulis kanggo Panjenengané, nanging tyilaka wong sing dadi jalarané Putrané Manungsa dikiyanati. Luwih betyik, yèn wong kuwi ora lair.”

²²Nalika Yésus lan para muridé ijik pada mangan, Panjenengané njupuk roti, terus ndedonga sukur, lan nyuwil-nyuwil roti mau terus ngekèkké marang para muridé, karo ngomong: “Pada tampanana, iki badan-Ku.”

²³Panjenengané terus njupuk tuwungé, masrahké ing pandonga lan ngekèkké tuwung kuwi marang para muridé. Kabèh terus pada ngombé sangka tuwung mau.

²⁴Uga Panjenengané ngomong marang para muridé: “Iki getih-Ku, getihé perjanjian, sing dikutahké kanggo wong okèh.

²⁵Sak temené Aku ngomong marang kowé: Aku bakal ora ngombé menèh wohé wit anggur, nganti tekané dinané Aku bakal ngombé sing anyar ing Kratoné Gusti Allah.”

²⁶Sakwisé pada nyanyi kidung pamuji, terus pada lunga menyang gunung Saitun.

²⁷Yésus terus ngomong marang para muridé: “Kowé kabèh, bakal gonjing pertyayamu, awit wis ketulis: Aku bakal nggepuk juru pangoné, lan wedus-wedusé bakal pada buyar.

²⁸Nanging yèn Aku wis ditangèkké, Aku bakal ndisiki kowé menyang Galiléa.”

²⁹Pétrus terus ngomong marang Panjenengané: “Senajan kabèh pada gonjing pertyayané, kula ora.”

³⁰Yésus terus ngomong marang Pétrus: “Sak temené Aku ngomong marang kowé, ing dina iki, ing wantyi mbengi iki uga, sak durungé pitik jago kluruk kaping pindo, kowé wis nyélaki Aku kaping telu.”

³¹Nanging karo luwih nandes Pétrus ngomong: “Yèn kula kudu mati bareng-bareng karo Gusti, kula ora arep nyélaki Gusti.” Wong liya-liyané kabèh ya pada ngomong mengkono.

³²Yésus lan para muridé terus teka ing panggonan sing jenengé Gètsémani. Yésus ngomong marang para muridé: “Pada lungguha ing kéné, sak suwéné Aku ndedonga.”

³³Panjenengané ngejak Pétrus lan Yakobus lan Yohanes mèlu. Yésus wiwit krasa susah banget lan wedi ing ati.

³⁴Panjenengané terus ngomong marang muridé telu kuwi: “Atiku sedih banget, nganti kaya arep mati. Kowé pada ing kéné lan pada melèka.”

³⁵Sakwisé njangkah maju, Yésus terus sendeku ing bumi lan ndedonga, supaya yèn bisa wantyiné kuwi sumingkir sangka Panjenengané,

³⁶lan ngomong: “Duh Abba, duh Bapak, kanggo Panjenengan samubarang bisa klakon; tuwung iki supaya Panjenengan singkirké sangka Kula, mung waé aja karep Kula, nanging karep Panjenengan.”

³⁷Yésus terus mbalik lan nemoni muridé telu kuwi pada turu. Panjenengané terus ngomong marang Pétrus: “Simon, apa kowé turu? Apa kowé ora kuwat melèk sak jam waé?

³⁸Pada jaga-jagaa lan ndedongaa, supaya kowé ora kena ing panggoda; roh kuwi pantyèn nurut niyaté, nanging dagingé manungsa, ringkih.”

³⁹Panjenengané terus lunga menèh lan ndedonga nganggo tembung-tembung sing pada.

⁴⁰Nalika teka menèh, Yésus nemoni muridé telu kuwi ijik pada turu, awit mripaté mbliyut, uga pada ora ngerti apa sing kudu diomongké marang Panjenengané.

⁴¹Panjenengané teka sing kaping teluné terus ngomong marang muridé telu kuwi: “Apa ijik pada turu lan ngasuh? Wis tyukup, wis tekan wantyiné, delengen, Putrané Manungsa dipasrahké marang tangané para wong dosa.

⁴²Pada tangia, hayuk pada lunga. Sing ngiyanati Aku wis tyedak.”

⁴³Nalika Yésus ijik ngomong, Yudas salah sijiné muridé rolas, dadakan teka bareng karo wong okèh sing pada nggawa pedang lan pentung atas préntahé para pengarepé imam, lan para juru Torèt lan para pinituwa.

⁴⁴Wong sing ngiyanati Panjenengané wis ngekèki tanda marang wong-wong mau: “Wong sing bakal tak ambung, ya kuwi wongé, kuwi tyekelen, jaganen sing kuwat.”

⁴⁵Sakwisé teka, Yudas gelis-gelis nyedekki Panjenengané, terus ngomong: “Rabbi,” lan ngambung Panjenengané.

⁴⁶Wong-wong mau terus nyandak lan nyekel Panjenengané.

⁴⁷Sangka antarané wong-wong ing kono kuwi ana sing ngetokké pedang, lan nyabetké pedangé marang abdiné imam gedé lan merung kupingé.

⁴⁸Yésus terus ngomong marang wong-wong kuwi: “Kowé kok kaya ngadepi bégal, pada teka karo nggawa pedang lan pentung kanggo nyekel Aku?

⁴⁹Saben dina Aku apa ora ya bareng karo kowé, mulangi ing Griya Sutyi; lan kowé ora pada nyekel Aku. Nanging supaya kelakon sing ketulis ing Kitab.”

⁵⁰Para muridé terus ninggal Panjenengané, pada mblayu kabèh.

⁵¹Ana nom-noman pada mèlu Panjenengané, nutupi badané mung nganggo kemul mori. Wong-wong pada arep nyekel nom-noman kuwi,

⁵²nanging nom-noman mau ninggal moriné, mblayu wuda.

⁵³Yésus terus dituntun menyang omahé imam gedé. Para pengarepé imam, pinituwa lan juru Torèt pada nglumpuk ing kono.

⁵⁴Nanging Pétrus pada mèlu Panjenengané sangka kadohan nganti tekan lataré imam gedé, terus lungguh ing tengahé para pengawal lan bediang.

⁵⁵Para pengarepé imam uga juru Hukum Agama kabèh, pada nggolèk paseksi sing nglawan Yésus, supaya Panjenengané bisa ditibani paukuman pati, nanging ora pada olèh.

⁵⁶Awit okèh wong sing ngekèki paseksi palsu nglawan Yésus, nanging paseksi-paseksi kuwi siji lan sijiné ora tyotyok.

⁵⁷Terus ana wong sing ngomongké paseksi palsu, nglawan Panjenengané karo ndakwa, ngéné,

⁵⁸“Kita wis pada krungu wong kuwi omongan mengkéné: Aku bakal ngembrukké Griya Sutyi sing digawé karo tangané manungsa iki lan sak njeruhné telung dina Aku bakal mbangun liyané, sing duduk gawéané tangané manungsa.”

⁵⁹Bab iki, paseksiné wong-wong kuwi uga angèl karo liyané.

⁶⁰Imam gedé terus ngadek ing sak tengahé kumpulan, terus takon marang Yésus: “Apa kowé ora nyauri babar pisan? Kepriyé kanggo paseksiné wong-wong sing ndakwa kowé kuwi?”

⁶¹Nanging Panjenengané meneng waé, ora nyauri apa-apa. Imam gedé takon Yésus menèh, tembungé: “Apa kowé kuwi Mésias, Putrané sing Dipuji?”

⁶²Semauré Yésus: “Ya Aku iki Panjenengané, lan kowé bakal pada weruh Putrané Manungsa njagong ing sak tengené sing Mahakwasa lan teka ing mégané langit.”

⁶³Imam gedé terus nyuwèk-nyuwèk jubahé lan ngomong: “Kanggo apa kita ijik mbutuhké seksi menèh?

⁶⁴Sampéyan wis pada krungu nyenyamahé marang Gusti Allah. Kepriyé panemuné sampéyan?” Wong-wong kabèh bebarengan pada netepaké Yésus kudu diukum pati.

⁶⁵Wong terus wiwit ngidoni Panjenengané, lan nutupi praupan-Né lan njotosi karo omong marang Panjenengané: “Hé, nabi, tyoba bedèken!” Uga para pengawal ya mèlu pada ngantemi Yésus.

⁶⁶Nalika kuwi Pétrus ijik ing ngisor, ing plataran. Terus ana wong wadon, abdiné imam gedé, sing teka,

⁶⁷lan bareng weruh Pétrus bediang, terus namatké praupané lan ngomong: “Sampéyan kuwi apa ora ya tansah bareng karo Yésus, wong Nasarèt kuwi.”

⁶⁸Nanging Pétrus sélak, semauré: “Kula ora ngerti lan ya ora mudeng apa sing sampéyan karepké kuwi.” Pétrus terus ngalih menyang èmpèr ngarep. (Terus ana pitik jago kluruk.)

⁶⁹Bareng wong wadon mau weruh Pétrus menèh, terus ya ngomong marang wong-wong ing kono: “Wong kuwi ya sangka golongané.”

⁷⁰Nanging Pétrus sélak menèh. Ora let suwé wong-wong ing kono pada ngomong menèh marang Pétrus: “Sampéyan kuwi nggenah tunggalé, apa menèh sampéyan wong Galiléa!”

⁷¹Nanging Pétrus terus wiwit sumpah: “Kula ora kenal wong sing sampéyan omongké kuwi!”

⁷²Sak nalika kuwi uga pitik jago kluruk kaping pindoné. Pétrus terus kèlingan marang tembungé Yésus: “Sak durungé pitik jago kluruk kaping pindo, kowé wis nyélaki Aku kaping telu.” Terus nangis ngguguk.