Read Caribbean Javanese Lukas 21 Bible Online

Lukas 21 - Caribbean Javanese bible

Lukas 21

¹Bareng Yésus ndangak, weruh wong-wong sugih pada nglebokké pisungsungé ing peti pisungsung.

²Terus ya weruh randa mlarat sing nglebokké pisungsung rong keping.

³Terus ngomong: “Aku ngomong marang kowé: Sak temené pawèhé randa mlarat kuwi luwih okèh tenimbang wong kabèh kuwi.

⁴Awit wong-wong kabèh kuwi pawèhé pisungsung sangka kesugihané, nanging randa iki pawèhé sangka kekurangané, malah masrahké sak kabèhé duwèké sing kanggo uripé.”

⁵Bareng ana wong sing pada rembukan bab Griya Sutyi lan pada ngelem awit digambari ing watu-watu sing apik lan barang pisungsung werna-werna, Yésus terus ngomong:

⁶“Apa sing pada kok deleng kuwi - bakal tekan wantyiné ora ana watu siji waé sing tetep temumpang ing watu liyané; kabèh bakal pada dirubuhké.”

⁷Wong-wong mau terus pada takon: “Guru, mbésuk apa bakal kedadian? Lan apa tandané yèn kuwi arep klakon?”

⁸Semauré: “Pada sing ati-ati, supaya kowé aja nganti disasarké. Awit bakal ana wong okèh sing pada teka nganggo jeneng-Ku lan omong: Ya aku iki Panjenengané lan iki wis tyedak wantyiné. Kowé aja mèlu-mèlu wong-wong kuwi.

⁹Lan yèn kowé krungu kabar bab peperangan lan pambruntakan, aja pada kagèt. Awit kuwi kabèh mesti kudu kelakon ndisik, nanging kuwi durung tegesé, yèn bakal gelis tekan ing pungkasané jaman.”

¹⁰Panjenengané terus ngomong marang wong-wong mau: “Bakal ana bangsa sing nglawan pada bangsa, kraton nglawan pada kraton,

¹¹lan bakal ana lindu sing medèni lan ing kana-kéné bakal ana lara pès lan patyeklik, uga bakal kelakon perkara-perkara sing medèni lan tanda-tanda sing medèni sangka langit.

¹²Nanging sak durungé kuwi kabèh, kowé bakal pada dityekel lan dianiaya; kowé bakal dipasrahké menyang sinaguk lan ing paukuman-paukuman lan bakal pada dituntun nang ngarepé para ratu lan para pangwasa awit sangka jeneng-Ku.

¹³Kuwi bakal dadi jalarané kowé kabèh bakal pada ngetokké paseksi.

¹⁴Mulané sing pada mantep waé, aja ngrantyam-ngrantyam ndisik bab kepriyé enggonmu bakal nyauri.

¹⁵Awit Aku déwé sing bakal ngekèki marang kowé tembung-tembung lan kawityaksanan, terus kowé ora bisa dilawan utawa dibantah karo mungsuh-mungsuhmu.

¹⁶Apa menèh kowé bakal ya pada dipasrahké karo wong tuwamu, sedulur-sedulurmu, sanak kadangmu lan kantya-kantyamu lan ana tunggalmu sing bakal dipatèni,

¹⁷uga kowé bakal pada disengiti karo wong kabèh awit sangka jeneng-Ku.

¹⁸Nanging rambutmu sakeler waé ora bakal ilang.

¹⁹Yèn kowé pada tetep mantep, kowé bakal pada nampani uripmu.”

²⁰“Yèn kowé weruh Yérusalèm dikepung karo suradadu, ngertènana, yèn ambruké wis tyedak.

²¹Nalika kuwi wong-wong ing Yudéa pada mblayua menyang pegunungan lan wong-wong ing njeruh kuta pada minggira lan wong-wong ing pedésan aja mlebu ing kuta menèh,

²²awit, ya kuwi waktu tekané balesan, sing dadi genepé sembarang sing wis ketulis kabèh.

²³Nanging mesakké banget para wong sing ijik meteng, utawa sing ijik nusoni bayi ing waktu kuwi! Awit bakal ana kasangsarané gedé ing sak ubengé negara, lan bangsa iki bakal nampa paukuman.

²⁴Wong-wong mau bakal pada mati kena landepé pedang lan bakal pada direbut dadi tawanané bangsa-bangsa kabèh, lan Yérusalèm bakal diidak-idak karo bangsa kapir, nganti tekan sak rampungé jamané bangsa kapir.”

²⁵“Uga bakal ana tanda ing srengéngé, ing mbulan lan ing lintang-lintang, lan ing bumi, para bangsa bakal pada wedi lan bingung awit sangka gemleger lan ombaké segara.

²⁶Wong-wong bakal pada mati kewedèn karo giris awit kuwatér marang apa sing bakal nekani jagat; awit kabèh pangwasané langit bakal gonjing.

²⁷Nalika kuwi wong bakal pada weruh Putrané Manungsa teka numpak mendung, nganggo pangwasa lan kamulyan gedé.

²⁸Lan yèn kuwi kabèh wiwit kelakon, pada njenggèlèka lan ndangaka, awit wis tyedak enggonmu bakal ditulungi.”

²⁹Yésus terus ngekèki semonan ngéné: “Pada nyawanga wit anjir lan wit apa waé.

³⁰Yèn kowé pada weruh yèn wis pada semi, kowé pada mangertèni déwé, yèn wis arep tekané waktu panas.

³¹Mengkono uga yèn kowé pada weruh lelakon mau, pada ngertènana yèn Kratoné Gusti Allah wis tyedak.

³²Aku ngomong marang kowé: Sak temené wong-wong jaman iki bakal ora entèk sak durungé kuwi mau kelakon kabèh.

³³Langit lan bumi bakal pada entèk, nanging tembung-Ku ora bakal entèk babar pisan.”

³⁴“Pada jaganen awakmu déwé, supaya atimu aja nganti mung mikir bab pésta gedèn lan mendem-mendeman, uga kasusahané urip, supaya kowé tansah jaga-jaga yèn dinané Gusti sing tekané dadakan kuwi aja nganti nyerang marang kowé kaya jiret.

³⁵Awit dina kuwi bakal nibani sak kabèhé wong sing manggon ing bumi iki.

³⁶Pada tansah jaga-jagaa lan ndedongaa, supaya kowé dikèki kekuwatan sing njalari pada ora bakal ngalami lelakon kuwi lan supaya kowé pada bisa kuwat enggonmu ngadep Putrané Manungsa.”

³⁷Yèn wantyi awan Yésus mulangi ing Griya Sutyi, nanging yèn mbengi metu lan nginep ing gunung Saitun.

³⁸Esuké, nalika ijik mruput wong okèh pada teka marang Panjenengané ing Griya Sutyi, ngrungokké tembungé.