Read Caribbean Javanese Lukas 3 Bible Online

Lukas 3 - Caribbean Javanese bible

Lukas 3

¹Sak njeruhné pemrintahané kaisar Tiberius wis nyandak limalas tauné, nalika Pontius Pilatus dadi gubernur ing Yudéa, lan Hérodes dadi ratuné bawah Galiléa, Filipus seduluré dadi ratuné bawah Ituréa lan Trakonitis lan Lisanias dadi ratuné bawah Abiléné,

²uga Hanas lan Kayafas dadi imam gedé, Gusti Allah ngekèki tembungé marang Yohanes, anaké imam Sakaria, ing ara-ara samun.

³Yohanes terus ndlajahi sak kabèhé panggonan laut Yordan lan ngabaraké baptisan mratobat kanggo pangapurané dosa,

⁴kaya sing ketulis ing kitab Yésaya, tembungé: “Ana swarané wong sing mbengok ing ara-ara samun. Pada tyawiské dalané Gusti, lentyengna dalan-dalan-Né kanggo Panjenengané!

⁵Saben jurang bakal diuruk, lan saben gunung lan puntukan bakal digawé rata; sing ménggak-ménggok bakal diluruské, sing mendukul-mendukul bakal diratakké,

⁶uga sak kabèhé wong bakal weruh keslametan sing sangka Gusti.”

⁷Yohanes terus ngomong marang wong okèh sing pada teka njaluk dibaptis: “Hé, turunané ula upas! Sapa sing ngongkon kowé nyingkiri bebendu sing bakal nibani?

⁸Mulané pada ngetokna wohé mratobat sing sembada. Lan aja pada nduwèni pikiran: Abraham kuwi bapak leluhur kita! Awit aku ngomong marang kowé: Gusti Allah kwasa nggawé turunané Abraham sangka watu-watu iki!

⁹Kampak wis tyumepak ing poké wit lan saben wit sing ora ngetokké woh sing betyik, bakal ditegor lan dityemplungké ing geni.”

¹⁰Wong okèh mau terus pada takon: “Yèn mengkéné, apa sing kudu pada kita tandangi?”

¹¹Semauré: “Sapa sing nduwé klambi loro, supaya ngekèki wong sing ora nduwé lan sapa sing nduwé pangan, ya tumindaka mengkono.”

¹²Ana juru pajek sing uga teka arep njaluk dibaptis, kuwi pada njaluk ngerti: “Guru, kita kudu pada nandangi apa?”

¹³Semauré: “Aja pada nagih ngluwihi sing wis ditentokké kanggo kowé!”

¹⁴Para suradadu uga pada njaluk ngerti: “Yèn kita, apa sing kudu pada kita lakoni?” Semauré Yohanes: “Aja ngrampas lan aja meres, tyukupna karo gajianmu déwé.”

¹⁵Nanging awit wong okèh ijik pada ngentèn-entèni lan ngarep-arep Mésias, kabèh pada ngomong apa Yohanes kuwi Panjenengané,

¹⁶Yohanes terus semaur, tembungé: “Aku iki mbaptisi kowé nganggo banyu, nanging Panjenengané sing kwasané ngungkuli aku, bakal teka lan ngutyuli taliné sepatuné waé, aku ora pantes. Panjenengané bakal mbaptisi kowé nganggo Roh Sutyi lan geni.

¹⁷Panjenengané wis nggawa piranti kanggo ngresiki gandum lan panggonan penutoné; gandumé diklumpukké ing lumbungé, nanging merangé bakal diobong ing geni sing ora bisa disirep.”

¹⁸Karo ngekèki pitutur liyané sing okèh Yohanes nggelarké Injil marang wong okèh.

¹⁹Nanging bareng piyambaké melèhké Hérodes, ratuné bawah kono, bab lelakoné karo Hérodias, bojoné seduluré lan bab enggoné nindakké sak kabèhé sing ala liya-liyané,

²⁰ratu kuwi mundak tambah durakané, karo enggoné ngukum Yohanes.

²¹Nalika wong okèh kuwi wis pada dibaptis lan nalika Yésus uga dibaptis lan ijik ndedonga, langit terus mbiyak,

²²terus kedunan karo Roh Sutyi rupa manuk dara. Terus ana swara sing nyuwara sangka langit ngéné: “Kowé kuwi Putra-Ku sing Tak trésnani, sing ndadèkké senengé ati-Ku.”

²³Nalika Yésus wiwit nyambutgawé, umuré kurang luwih telung puluh taun lan miturut pangirané wong-wong, Panjenengané kuwi anaké Yosèf, anaké Eli,

²⁴anaké Matat, anaké Lèwi, anaké Malki, anaké Yanai, anaké Yosèf,

²⁵anaké Matitya, anaké Amos, anaké Nahum, anaké Hèsli, anaké Nagai,

²⁶anaké Maat, anaké Matitya, anaké Simèi, anaké Yosèk, anaké Yoda,

²⁷anaké Yohanan, anaké Résa, anaké Sérubabèl, anaké Séaltièl, anaké Nèri,

²⁸anaké Malki, anaké Adi, anaké Kosam, anaké Elmadam, anaké Er,

²⁹anaké Yosua, anaké Elièsar, anaké Yorim, anaké Matat, tyedak turunané Lèwi,

³⁰anaké Siméon, anaké Yéhuda, anaké Yosèf, anaké Yoram, anaké Elyakim,

³¹anaké Méléa, anaké Mina, anaké Matata, anaké Natan, anaké Daved,

³²anaké Isai, anaké Obèd, anaké Boas, anaké Salma, anaké Nahason,

³³anaké Aminadab, anaké Admin, anaké Arni, anaké Hèsron, anaké Pèrès, anaké Yéhuda,

³⁴anaké Yakub, anaké Isak, anaké Abraham, anaké Térah, anaké Nahor,

³⁵anaké Séruk, anaké Réhu, anaké Pèlèg, anaké Eber, anaké Sela,

³⁶anaké Kénan, anaké Arpaksad, anaké Sèm, anaké Noah, anaké Lamèk,

³⁷anaké Métusalah, anaké Hénokh, anaké Yarèd, anaké Mahalalèl, anaké Kénan,

³⁸anaké Enos, anaké Sèt, anaké Adam, Putrané Gusti Allah.